راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

ئه‌میره‌ عروبه‌
پێشمه‌گه‌ پشتی‌ له‌ئێزدییه‌كان كردو ئاینده‌مان له‌عێراقدا نه‌ماوه‌

نەوزەت شەمدین
ئه‌میره‌ عروبه‌ بایه‌زید ئیسماعیل به‌گ، كچی‌ ئه‌میری‌ پێشووی‌ ئێزدییه‌كان بایه‌زید ئیسماعیل‌و كوڕه‌زای‌ ئه‌میر ئیسماعیل جۆڵ‌ به‌گ…
28.08.2014  |  به‌رلین

Tweet
//


ئه‌میره‌ عروبه‌ یه‌كێكه‌ له‌چالاكوانه‌ دیاره‌كان‌و له‌زۆربه‌ی‌ كۆڕو كۆبوونه‌وه‌كان بۆ پشتیوانی‌ ئێزدییه‌كان ده‌بینرێت، له‌گه‌ڵ‌ ئه‌وه‌شدا یه‌كه‌مین وێبسایتی‌ تایبه‌ت به‌ژنانی‌ ئێزدی‌ به‌ڕێوه‌ ده‌بات.

نیقاش: له‌شه‌نگال چی‌ روویدا، بۆچی‌ به‌و شێوه‌یه‌ داعش ئێزدییه‌كانی‌ كرده‌ ئامانج؟

ئه‌میره‌ عروبه‌: به‌ره‌به‌یانی‌ رۆژی‌ 9ی‌ ئاب هێزه‌كانی‌ داعش به‌شێوه‌یه‌كی‌ چاوه‌ڕواننه‌كراو هاتنه‌ ناو شه‌نگاله‌وه‌ كه‌ زۆرینه‌ی‌ دانیشتوانه‌كه‌ی‌ ئێزدییه‌، بۆیه‌ خه‌ڵكه‌كه‌ هه‌ڵهات‌و هه‌رچییه‌كیان هه‌بوو جێیان هێشت، به‌شێكیان به‌ئاراسته‌ی‌ پارێزگای‌ دهۆك‌و به‌شێكی‌ تریان به‌ره‌و چیای‌ شه‌نگال رۆیشتن‌و كه‌سیان له‌شه‌نگال‌و كۆمه‌ڵگاكانی‌ ده‌وروبه‌ری‌ نه‌مان، ته‌نها به‌ته‌مه‌ن‌و نه‌خۆش‌و په‌ككه‌وته‌كان نه‌بێت كه‌ نه‌یانتوانی‌ هه‌ڵبێن، چه‌كدارانی‌ رێكخراوی‌ به‌دی‌ داعشیش هه‌ركه‌سیان كه‌وته‌ ده‌ست پارچه‌ پارچه‌یان كردن‌و چاویان ده‌رهێنان‌و دایاننه‌ به‌ر ده‌ستڕێژی‌ گولله‌، ئه‌و پیاوانه‌ی‌ ده‌یانگرتن ده‌یانكوشتن‌و ژن‌و كچه‌كانیشیان ده‌ستبه‌سه‌ر ده‌كردن.

داعش ده‌یه‌وێت ده‌وڵه‌ته‌ ئیسلامییه‌كه‌ی‌ هیچ پێكهاته‌یه‌كی‌ تری‌ تیا نه‌بێت، هه‌ر له‌به‌ر ئه‌وه‌ش ئێزدییه‌كانیان كرده‌ ئامانج كه‌ پێیان وایه‌ كافرن‌و هاوبه‌ش بۆ خودا په‌یدا ده‌كه‌ن، ئه‌م رێكخراوه‌ تیرۆریسته‌ هه‌ر كه‌سێك موسوڵمان نه‌بێت به‌كافری‌ ده‌زانێت، ئه‌مه‌ش پێچه‌وانه‌ی‌ ئه‌وه‌یه‌ كه‌ له‌قورئاندا هاتووه‌ كاتێك ده‌ڵێت "ئاینی‌ خۆتان بۆ خۆتان‌و ئاینی‌ خۆم بۆ خۆم".

نیقاش: قورسترین دیمه‌ن چی‌ بوو كه‌ له‌قه‌یرانه‌كه‌ی‌ شه‌نگالدا بینیت؟

ئه‌میره‌ عروبه‌: هه‌ر خێزانێكی‌ ئێزدی‌ كه‌ له‌شه‌نگال ژیابێت چیرۆكێكی‌ كاره‌ساتباری‌ خۆی‌ هه‌یه‌ كه‌ به‌ر گوێت ده‌كه‌ون هه‌ست به‌ئازارێكی‌ زۆر ده‌كه‌یت، ئه‌مه‌ش بۆ رووداوی‌ گوندی‌ "كۆجۆ" راسته‌ كه‌ یه‌كێكه‌ له‌گونده‌كانی‌ شه‌نگال، زیاتر له‌هه‌فته‌یه‌ك داعش گه‌مارۆیدان‌و مۆڵه‌تێكیان دیاریكرد بۆ خه‌ڵكه‌كه‌ی‌ یان خۆ بده‌ن به‌ده‌سته‌وه‌ یان ده‌كوژرێن، ئه‌و ده‌مه‌ له‌رێی‌ ده‌زگاكانی‌ راگه‌یاندنه‌وه‌ هاواری‌ زۆرمانكرد بۆ ئه‌وه‌ی‌ بچن به‌هانایانه‌وه‌، به‌ڵام كه‌س گوێی‌ لێنه‌گرتین، پاش ته‌واوبوونی‌ مۆڵه‌ته‌كه‌ داعش چوونه‌ ناو گونده‌كه‌و هه‌ر كوڕێك ته‌مه‌نی‌ له‌سه‌روو 12 ساڵه‌وه‌ بێت بردیان تا ژماره‌یان گه‌یشته‌ 400 كه‌س، كاتێكیش رازی‌ نه‌بوون ببن به‌موسڵمان، سه‌رجه‌میان كوشتن‌و ژنه‌كانیشیان وه‌ك كه‌نزیه‌ بردن كه‌ ژماره‌یان ده‌گه‌یشت 700 كه‌س، ئاخر چ ئاینێك ئه‌مه‌ قبوڵ‌ ده‌كات.

شه‌نگال چه‌ندین چیرۆكی‌ كاره‌ساتباری‌ تری‌ به‌خۆوه‌ دیوه‌، كاریگه‌رترین‌و ئازاربه‌خشترینیان ئه‌وه‌ بوو كه‌ ژنێك پاش ده‌ ساڵ‌ بووه‌ خاوه‌نی‌ منداڵێك، به‌ڵام خۆشییه‌كه‌ی‌ درێژه‌ی‌ نه‌كێشاو داعش په‌لاماری‌ شه‌نگالیدا، له‌گه‌ڵ‌ منداڵه‌كه‌ی‌ به‌ره‌و چیای‌ شه‌نگال هه‌ڵهاتن، به‌هۆی‌ برسێتییه‌وه‌ منداڵه‌كه‌ی‌ مردو سێ‌ رۆژ له‌باوه‌شی‌ خۆی‌ هێشتییه‌وه‌‌و ئاماده‌نه‌بوو به‌خاكی‌ بسپێرێت.

نیقاش: زانیاریتان هه‌یه‌ له‌باره‌ی‌ ئه‌وانه‌ی‌ له‌چیای‌ شه‌نگال گیریان خواردووه‌، ئه‌ی‌ ژماره‌ی‌ ئه‌و ژنانه‌ی‌ له‌لایه‌ن داعشه‌وه‌ رفێندراون؟

ئه‌میره‌ عروبه‌: ژماره‌یه‌كی‌ زۆری‌ ئێزدی‌ ئاماده‌نین چیاكه‌ جێبهێڵن‌و چاوه‌ڕێن ناوچه‌كانیان ئازادبكرێت بۆ ئه‌وه‌ی‌ بگه‌ڕێنه‌وه‌، ژماره‌ی‌ ئه‌و ژنه‌ ئێزدییانه‌ی‌ وه‌كو كه‌نیزه‌ فڕێندراون نزیكه‌ی‌ 1500 ژنه‌.

نیقاش: چۆن له‌كاردانه‌وه‌ی‌ حكومه‌تی‌ ناوه‌ندو هه‌رێم ده‌ڕوانن به‌رامبه‌ر ئه‌وه‌ی‌ له‌شه‌نگال روویدا؟

ئه‌میره‌ عروبه‌: حكومه‌تی‌ هه‌رێمی‌ كوردستان سه‌ركه‌وتوو نه‌بوو له‌پاراستنی‌ ئێزدییه‌كان، پێشمه‌رگه‌ كه‌ ئه‌وكات له‌قه‌زای‌ شه‌نگال فه‌رمانڕه‌وا بوو، یه‌كه‌مین لایه‌ن بوو كه‌ پاشه‌كشه‌ی‌ كردوو هه‌موو ناوچه‌كه‌ی‌ به‌جێهێشت، خه‌ڵكه‌ سیڤیله‌كه‌ی‌ دایه‌ ده‌ست داعش.

له‌به‌رامبه‌ر خه‌ڵكی‌ كورد له‌پارێزگای‌ دهۆك‌و قه‌زای‌ زاخۆو شارو شارۆچكه‌كانی‌ تری‌ هه‌رێم هاوسۆزییه‌كی‌ زۆریان بۆ ئاواره‌ ئێزدییه‌كان ده‌ربڕی‌‌و چییان له‌ده‌ستهات بۆ هاوكاریكردنیان، پێشكه‌شیان كردن.

هه‌رچی‌ حكومه‌تی‌ ناوه‌ندو رێكخراوه‌ نێوده‌وڵه‌تییه‌كانه‌نه‌ دواكه‌وتن له‌هاوكاریكردن‌و نه‌كه‌وتنه‌ جوڵه‌ هه‌تا ئه‌و كاته‌ی‌ داعش شه‌نگالی‌ داگیركرد‌و خه‌ڵكه‌كه‌ی‌ له‌چیاكه‌ گه‌مارۆدا، له‌ئاسمانه‌وه‌ هاوكارییان بۆ ئاواره‌كان به‌ردایه‌وه‌و به‌شێكیان گواستنه‌وه‌ به‌و فرۆكانه‌ی‌ له‌به‌غداوه‌ نێردرابوون.

فرۆكه‌ ئه‌مه‌ریكییه‌كانیش پێداویستییه‌ مرۆییه‌ گرنگه‌كانی‌ به‌سه‌ر ئه‌و ئاوارانه‌دا دابه‌شكرد كه‌ له‌چیاكه‌ گیریان خواردبوو، نابێت رۆڵی‌ یه‌كینه‌كانی‌ پاراستنی‌ گه‌ل (یه‌په‌گه‌) له‌یاد بكه‌ین كه‌ هاوكاریی‌ زۆریان پێشكه‌شی‌ خه‌ڵكی‌ شه‌نگال كردو شه‌ره‌فمه‌ندانه‌ پاڵپشتییان كردن.

نیقاش: ئه‌و هاوكارییه‌ نێوده‌وڵه‌تیانه‌ به‌س بوون؟، ئه‌ی‌ ره‌وه‌ندی‌ ئێزدی‌ له‌جیهاندا چۆن به‌شدارییان كرد؟

ئه‌میره‌ عروبه‌: ئه‌و هاوكارییانه‌ی‌ پێشكه‌شكراون به‌س نین به‌به‌راورد به‌ژماره‌ی‌ ئاواره‌كان كه‌ به‌پێی‌ كۆمسیۆنی‌ باڵای‌ په‌نابه‌رانی‌ نه‌ته‌وه‌ یه‌كگرتووه‌كان ژماره‌ی‌ ئاواره‌كانی‌ موسڵ‌ گه‌یشتووه‌ته‌ 700 هه‌زار كه‌س، له‌گه‌ڵ‌ ئه‌وه‌شدا ئه‌مه‌ریكا فرۆكه‌ی‌ ناردووه‌ بۆ هاوكاری‌ ئه‌و ئاواره‌نه‌ی‌ گیریان خواردووه‌ له‌گه‌ڵ‌ لێدانی‌ داعش، چه‌ند وڵاتێكی‌ تریش هه‌یه‌ له‌مه‌سه‌له‌ی‌ ناردنی‌ چه‌كی‌ پێشكه‌وتوو هاوكاریی‌ مرۆیی‌ ده‌كۆڵنه‌وه‌ وه‌ك فه‌ره‌نساو ئه‌ڵمانیاو چیك‌و چه‌ند وڵاتێكی‌ تری‌ ئه‌وروپی‌.

هه‌رچی‌ ره‌وه‌ندی‌ ئێزدیشه‌ له‌جیهان رۆڵی‌ گه‌وره‌یان هه‌بووه‌، به‌خۆپیشاندان‌و كۆبوونه‌وه‌و ده‌نگی‌ به‌رز توانیویانه‌ په‌یامی‌ به‌هاناوه‌چوونی‌ براكانیان بگه‌یه‌نن به‌رٍِێكخراوو ده‌سته‌ تایبه‌تمه‌نده‌كانی‌ مافی‌ مرۆڤ، ئێستا جیهان ده‌زانێت ئه‌وه‌ی‌ رووده‌دات جینۆسایده‌ به‌رامبه‌ر به‌ئێزدییه‌كان.

نیقاش: پاش ئه‌وه‌ی‌ به‌سه‌ر ئێزدییه‌كانی‌ شه‌نگالدا هات، چ بژارده‌یه‌كیان له‌به‌رده‌مدایه‌ بۆ ئاینده‌یان؟

ئه‌میره‌ عروبه‌: ته‌نها دوو بژارده‌یان له‌به‌رده‌مدا ماوه‌، یه‌كه‌میان: كۆچی‌ به‌كۆمه‌ڵ‌ بۆ ئه‌وه‌ی‌ رزگاریان ببێت له‌و كێژاوه‌ی‌ ناوه‌ ناوه‌ تێی‌ ده‌كه‌ونه‌وه‌ له‌سه‌ر ده‌ستی‌ گه‌لێك كه‌ پێیان وایه‌ خوا ته‌نها هیدایه‌تی‌ ئه‌وانی‌ داوه‌.

بژارده‌ی‌ دووه‌م: بریتییه‌ له‌وه‌ی‌ ناوچه‌یه‌كی‌ ئارامی‌ نێوده‌وڵه‌تی بۆ ئێزدییه‌كان‌و پێكهاته‌ كه‌ مایه‌تییه‌كانی‌ تری‌ عێراق دروست بكرێت وه‌ك مه‌سیحی‌‌و شه‌به‌ك‌و توركمان، ئه‌مه‌ش پاش ئه‌وه‌ی‌ حكومه‌تی‌ هه‌رێمی‌ كوردستان‌و حكومه‌تی‌ ناوه‌ند نه‌یانتوانی‌ بیانپارێزن، به‌پێی‌ یاسای‌ نێوده‌وڵه‌تی‌ هه‌ر ده‌سته‌یه‌ك له‌خه‌ڵك پارێزراو نه‌بوون كۆمه‌ڵگای‌ نێوده‌وڵه‌تی‌ ده‌توانێت بیانپارێزێت، ئه‌مه‌ش له‌رێی‌ رێكخراوه‌ نێوده‌وڵه‌تییه‌كان‌و دروستكردنی‌ ناوچه‌یه‌كی‌ ئارام له‌سه‌ر ده‌ستی‌ هێزی‌ ئاشتی‌ پارێز كه‌ بڕیاری‌ ئه‌نجومه‌نی‌ ئاسایشیان پێبێت، پێكهێنانی‌ ئه‌م هێزه‌ش ره‌زامه‌ندی‌ حكومه‌تی‌ عێراقی‌ ناوێت، ئه‌گه‌ر پارێزگاری‌ نێوده‌وڵه‌تیش ده‌سته‌به‌ر نه‌بوو، ئه‌وا ده‌بێت له‌رێی‌ پێكهێنانی‌ هێزێكی‌ سه‌ربازییه‌وه‌ له‌خه‌ڵكی‌ ناوچه‌كه‌ پارێزگاری‌ بكرێت.

نیقاش: ئه‌گه‌ر بژارده‌كه‌ كۆچكردن بوو، ئایا له‌ئاینده‌ی‌ ئێزدییه‌كان له‌عێراق ناترسن؟

ئه‌میره‌ عروبه‌: كۆچكردن بژارده‌یه‌كی‌ زۆر قورسه‌، چونكه‌ مه‌سه‌له‌كه‌ په‌یوه‌ندی‌ هه‌یه‌ به‌ده‌ستهه‌ڵگرتن له‌و خاكه‌ی‌ له‌سه‌ری‌ ژیاوین خوێنمان بۆ رشتووه‌و ئاومان له‌سه‌ری‌ خواردووه‌ته‌وه‌، به‌ڵام وڵاتێك ئه‌گه‌ر رۆشنبیری‌ دیالۆگ‌و رای‌ پێچه‌وانه‌ی‌ تیا نه‌بێت‌و خه‌ڵكه‌كه‌ی‌ به‌شێوه‌یه‌كی‌ تایفی‌ ته‌كفیری‌ ره‌گه‌زپه‌رستی‌ بیربكه‌نه‌وه‌و به‌چاوی‌ رق‌و دوژمنكارانه‌وه‌ لێمان بڕوانن، ناتوانین له‌گه‌ڵیاندا بژین، به‌تایبه‌تی‌ كه‌ یاسا نییه‌و هۆزو عه‌شیره‌ت باڵاده‌سته‌، پێم وانییه‌ ئێزدییه‌كان له‌عێراقدا ئاینده‌یان هه‌بێت ئه‌گه‌ر شوێنكه‌وتووانی‌ ته‌كفیرو ته‌خوین به‌رده‌وام بن.

نیقاش: ئه‌گه‌ر ئێزدییه‌كان بوونه‌ خاوه‌نی‌ ناوچه‌یه‌كی‌ تایبه‌ت به‌خۆیان، چۆن به‌ڕێوه‌ی‌ ده‌به‌ن؟

ئه‌میره‌ عروبه‌: داوكاری‌ خێرایی‌ ئێزدییه‌كان ئێستا ئه‌وه‌یه‌، ئه‌و ئاوارانه‌ی‌ به‌چیاكه‌وه‌ گیریان خورادووه‌ ئازاد بكرێن‌و هاوكاریی‌ مرۆیی‌ ده‌ستبه‌جێیان بگه‌یه‌نرێتێ‌، هه‌روه‌ها رێگه‌ خۆشبكرێت بۆ كۆچی‌ به‌كۆمه‌ڵ‌ ئه‌ویش له‌رێی‌ كردنه‌وه‌ی‌ ده‌رگای‌ پێدانی‌ مافی‌ په‌نابه‌رێتی‌ له‌وڵاتانی‌ ئه‌وروپا به‌ئێزدییه‌كان، له‌و وڵاتانه‌ی‌ مانای‌ مرۆڤایه‌تی‌‌و كه‌رامه‌تی‌ مرۆڤ ده‌زانن‌و ده‌ستوره‌كه‌یان له‌سه‌ر بنه‌مای‌ ره‌گه‌زو ره‌نگ‌و عه‌قیده‌ جیاكاری‌ ناكات.

هه‌ریه‌كێك له‌ئێزدییه‌كانیش نایه‌وێت وڵات جێبهێڵێت ئه‌وا ده‌كرێت ناوچه‌یه‌كی‌ ئارامیان بۆ دروست بكرێت كه‌ تیایدا هه‌ست به‌دڵنیایی‌ بكه‌ن، ئه‌م ناوچه‌یه‌ ده‌بێت له‌سه‌هلی‌ نه‌ینه‌وا بێت‌و دوو ئیداره‌ی‌ جیاوازی‌ هه‌بێت، یه‌كێكیان له‌شێخان‌و به‌عشیقه‌ (باكورو خۆرهه‌ڵاتی‌ موسڵ‌) یه‌كێكی‌ تر له‌قه‌زای‌ شه‌نگال (خۆرئاوا)، چونكه‌ ناوچه‌ ئێزدییه‌كان دووبه‌شن‌و له‌یه‌كه‌وه‌ دورن‌و هه‌ریه‌كه‌شیان ژینگه‌یه‌كی‌ تایبه‌تیان له‌ده‌وره‌، شه‌نگال به‌ناوچه‌ی‌ عه‌ره‌بی‌ ده‌وره‌ دراوه‌‌و شێخان‌و به‌عشیقه‌ به‌ناوچه‌ی‌ كوردی‌‌و مه‌سیحی‌ ده‌وره‌ دراون، بۆیه‌ واباشتره‌ دوو ئیداره‌ی‌ هه‌بێت، ئه‌م دوو ئیداره‌یه‌ش رێكبكه‌ون‌و پرۆتۆكۆڵی هاوكاری‌ ئیمزا بكه‌ن كه‌ پێكه‌وه‌ بڕیار بده‌ن.

نیقاش: ساڵانێكی‌ زۆره‌ ئێزدییه‌كان ده‌كرێنه‌ ئامانج، بۆ پێشوه‌خت ئاماده‌كاریتان نه‌كرد تا كارگه‌یشته‌ رووداوه‌كه‌ی‌ شه‌نگال؟

ئه‌میره‌ عروبه‌: به‌درێژایی‌ مێژوو تائێستا 74 حاڵه‌تی‌ جینۆسایدمان به‌سه‌ردا هاتووه‌، ئه‌وه‌ی‌ له‌شه‌نگال روویدا سه‌ره‌تای‌ ئه‌م مانگه‌ حاڵه‌تێكی‌ تر بوو، شه‌نگال ناوچه‌یه‌ك بوو له‌ژێر ده‌ستی‌ پێشمه‌رگه‌داو دانیشتوانه‌كه‌ی‌ دڵنیابوون، پێیان وابوو له‌ده‌ستێكی‌ ئه‌میندان، پێشمه‌رگه‌ له‌یه‌كه‌م رووبه‌رووبوونه‌وه‌ی‌ داعشدا پاشه‌كشه‌یان كرد، ئه‌مه‌ش كه‌س چاوه‌ڕێی‌ نه‌ده‌كرد، بۆیه‌ متمانه‌مان به‌نزیكترین كه‌سی‌ خۆمان نه‌ماوه‌و به‌حیسابی‌ خۆماندا ده‌چینه‌وه‌.

نیقاش: بۆچی‌ به‌م دواییه‌ رێگه‌نه‌درا ئێزدییه‌كان له‌هه‌رێمی‌ كوردستان خۆپیشاندان بكه‌ن؟

ئه‌میره‌ عروبه‌: له‌زاخۆ چه‌ند گه‌نجێكی‌ ئاواره‌ی‌ ئێزدی‌ خۆپیشاندانێكیان رێكخست‌و لافیته‌یان به‌رزكردبۆوه‌ كه‌ له‌سه‌ری‌ نوسرابوو "كوشتنمان رابگرن" به‌ڵام هێزه‌ كوردییه‌كان رێیان لێگرتن‌و ئازاریان دان به‌بیانووی‌ پاراستنی‌ ئاسایش، پرسیاره‌كه‌ لێره‌دا ئاوه‌یه‌ ئاخۆ ئه‌و گه‌نجانه‌ مه‌ترسی‌ بوون له‌سه‌ر ئاسایشه‌وه‌ كه‌ داوای‌ چاره‌نوسی‌ ژنه‌كانیان ده‌كردن؟ ئه‌ی‌ سه‌له‌فی‌‌و دڵره‌قه‌كان چین كه‌ رۆژانه‌ له‌سه‌ر شاشه‌ی‌ ته‌له‌فزیۆنه‌وه‌ ده‌رده‌كه‌ون‌و رق به‌رامبه‌ر ئێزدییه‌كان بڵاو ده‌كه‌نه‌وه‌، ئه‌وانه‌ ئێستا له‌هه‌رێمی‌ كوردستانن، ئاخۆ مه‌ترسی‌ دروست ناكه‌ن.

نیقاش: به‌و پێیه‌ی‌ ئێوه‌ راوێژكاری‌ پارێزگارن، چیت بۆ گه‌له‌كه‌ی‌ خۆی‌ كردووه‌؟

ئه‌میره‌ عروبه‌: من به‌گرێبه‌ست له‌گه‌ڵ پارێزگادا كارم ده‌كرد كه‌ ئێستا ماوه‌كه‌ی‌ ته‌واو بووه‌‌و به‌هۆی‌ بارودۆخی‌ ناوچه‌كه‌و هێرشی‌ داعش نوێنه‌كراوه‌ته‌وه‌، به‌ڵام ئێستا وه‌ك چالاكوانێك ده‌نگی‌ ئێزدییه‌كان ده‌گه‌یه‌نم به‌لایه‌نه‌ په‌یوه‌ندیداره‌كان به‌مافی‌ مرۆڤ‌و یه‌كێتی‌ ئه‌وروپاو هه‌موو ئه‌و رێكخراوانه‌ی‌ ده‌توانن یارمه‌تی‌ بگه‌یه‌نن به‌كه‌سوكارمان.

نیقاش: ئێزدییه‌كان بۆ دراوسێ‌ كوردو عه‌ره‌به‌كان كریڤ (دۆست‌و هاوخوێن) ده‌مێنن؟

ئه‌میره‌ عروبه‌: هیچ حاڵه‌تێك نییه‌ بتوانین به‌سه‌ر نه‌ته‌وه‌یه‌كی‌ دیاریكراودا بیسه‌پێنین، كوردو عه‌ره‌ب خه‌ڵكی‌ خراپ نین، به‌ڵكو كه‌سانی‌ میانڕه‌وو باشیان تێدایه‌ كه‌ هه‌ر كریڤی‌ ئێمه‌ن‌و په‌یوه‌ندی‌ باشمان ده‌مێنێت، به‌ڵام له‌مه‌ودوا ئێزدییه‌كان ده‌بێت به‌پێی‌ ئه‌و په‌نده‌ بجوڵێنه‌وه‌ كه‌ ده‌ڵێت "به‌ئاگابوون له‌زیان ده‌تپارێزێ‌".