راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

فه‌وجێكی‌ پۆلیسی‌ شه‌به‌ك قه‌یرانی‌ تایفی‌ له‌نه‌ینه‌وا گڕ ده‌دات

عه‌بدوڵڵا سالم
جارێكی‌ تر قسه‌و باسی‌ ناكۆكی‌ تایفی‌ له‌نه‌ینه‌وا سه‌ریهه‌ڵدایه‌وه‌، به‌رپرسانی‌ حیزبی‌‌و كوتله‌ سیاسیه‌كانیش له‌نێوان…
4.10.2012  |  موسڵ
A Shabak man at a protest in Iraq. Photo:Getty Images
A Shabak man at a protest in Iraq. Photo:Getty Images

قه‌یرانه‌ نوێیه‌كه‌ له‌و كاته‌وه‌ سه‌ریهه‌ڵدا كه‌ لیژنه‌یه‌كی‌ وه‌زاره‌تی‌ ناوخۆی‌ عێراق چووه‌ موسڵ‌ بۆ ده‌ستنیشانكردنی‌ 500 كه‌س له‌شه‌به‌كی‌ شیعه‌ تا له‌فه‌وجێكدا كۆبكرێنه‌وه‌و ئه‌ركه‌كه‌شیان بریتی‌ ده‌بێت له‌پاراستنی‌ گونده‌ شه‌به‌ك نشینه‌كان له‌قه‌زای‌ حه‌مدانیه‌ی‌ خۆرهه‌ڵاتی‌ نه‌ینه‌وا، ئه‌و ناوچه‌یه‌ی‌ به‌سه‌هلی‌ نه‌ینه‌وا ناسراوه‌.

یه‌كه‌م كه‌س كه‌ ئه‌م مه‌سه‌له‌یه‌ی‌ وروژاند ئه‌سیل نوجێفی‌ پارێزگاری‌ نه‌ینه‌وا بوو، كاتێك مه‌سه‌له‌كه‌ی‌ به‌فیتنه‌ ناوبردو پێی‌ وابوو هه‌ڵه‌یه‌كی‌ گه‌وره‌یه‌ بۆ دروستكردنی‌ ناكۆكی‌ تایفی‌‌و له‌لێدوانێكیشیدا بۆ "نیقاش" هێمای‌ بۆ ئه‌وه‌كرد كه‌ داوایه‌كی‌ یاسایی‌ دژی‌ وه‌زاره‌تی‌ ناوخۆ تۆمار ده‌كات، به‌وپێیه‌ی‌ به‌پێچه‌وانه‌ی‌ ده‌ستوره‌وه‌ مامه‌ڵه‌ ده‌كه‌ن‌و ته‌نها یه‌ك پێكهاته‌یان دیاریكردووه‌ بۆ دروستكردنی‌ فه‌وجی‌ ئه‌منی‌، له‌كاتێكدا ناوچه‌كه‌ چه‌ندین نه‌ته‌وه‌و پێكهاته‌ی‌ تری‌ تێدایه‌.

پارێزگار له‌لێدوانه‌كه‌یدا ئاماژه‌ی‌ بۆ ئه‌وه‌ كرد كه‌ شه‌به‌كی‌ سوننه‌و عه‌ره‌ب‌و مه‌سیحی‌‌و كوردو توركمان له‌و گوندو ناوچانه‌ بڵاوبوونه‌ته‌وه‌و پێكهاته‌یه‌كی‌ جوگرافی‌ هاوبه‌شیان هه‌یه‌ له‌گه‌ڵ‌ شه‌به‌كی‌ شیعه‌دا، له‌گه‌ڵ‌ ئه‌وه‌شدا بێبه‌شكراون له‌وه‌ی‌ بچنه‌ ناو ئه‌و فه‌وجه‌وه‌.

پارێزگار درێژه‌ی‌ به‌قسه‌كانیداو وتی‌ "داوام له‌ئه‌نجومه‌نی‌ پارێزگا كردووه‌ رێوشوێنی‌ پێویست بگرنه‌ به‌ر له‌به‌رامبه‌ر ئه‌و فه‌رمانه‌ وه‌زارییه‌ بۆ پێكهێنانی‌ فه‌وجێكی‌ پۆلیسی‌ تایفی‌، بۆ ئه‌وه‌ی‌ هیچ هه‌نگاوێكی‌ له‌و جۆره‌ش نه‌نرێت ئه‌وا داوایه‌كی‌ یاسایی‌ دژی‌ وه‌زاره‌تی‌ ناوخۆ ده‌جوڵێنین".

په‌یامنێری‌ "نیقاش" ئاماده‌ی‌ دانیشتنی‌ ئاسایی‌ ژماره‌ 147ی‌ ئه‌نجومه‌نی‌ پارێزگای‌ نه‌ینه‌وا بوو كه‌ دوا هه‌فته‌ی‌ مانگی‌ ئه‌یلولی‌ رابردوو گرێدرا، له‌و دانیشتنه‌دا شه‌ڕه‌ قسه‌ له‌نێوان قوسه‌ی‌ عه‌باس نوێنه‌ری‌ كۆتای‌ شه‌به‌ك‌و ئه‌مین فنش یاریده‌ده‌ری‌ پارێزگار دروستبوو، ئه‌مه‌ی‌ دووهه‌میان به‌ئاشكرا قوسه‌ی‌ تۆمه‌تباركرد به‌دروستبوونی‌ ئه‌و قه‌یرانه‌ی‌ ئێستا له‌ئارادایه‌.

یاریده‌ده‌ری‌ پارێزگار ئاماژه‌ی‌ به‌وه‌ كرد كه‌ بڕیاری‌ دروستكردنی‌ ئه‌و فه‌وجه‌ به‌ر له‌ماوه‌یه‌ك له‌لایه‌ن وه‌زاره‌تی‌ ناوخۆوه‌ ده‌رچووه‌، به‌ڵام مه‌رجی‌ ئه‌وه‌ی‌ تێدا نه‌بووه‌ كه‌ ته‌نها یه‌ك پێكهاته‌ له‌خۆبگرێت، كه‌چی‌ قوسه‌ی‌ عه‌باس چووه‌ ره‌زامه‌ندی‌ ئه‌نجومه‌نی‌ وه‌زیرانی‌ هێناوه‌ته‌وه‌ بۆ ئه‌وه‌ی‌ فه‌وجێك ته‌نها بۆ شه‌به‌كی‌ شیعه‌ دروست بكرێت.

له‌به‌رامبه‌ردا نوێنه‌ره‌كه‌ی‌ كۆتای شه‌به‌ك ئه‌و قسانه‌ی‌ ره‌تكرده‌وه‌و داوایكرد به‌ڵگه‌ بهێنرێته‌وه‌، له‌و كاته‌ی‌ كه‌ روخساری‌ وای‌ ده‌نواند له‌ساتی‌ توڕه‌بووندا بێت له‌كاتی‌ پشووی‌ دانیشتنه‌كه‌دا به‌"نیقاش"ی‌ راگه‌یاند سه‌رله‌به‌ری‌ مه‌سه‌له‌كه‌ به‌بێ‌ هیچ به‌ڵگه‌یه‌ك له‌لایه‌ن هه‌ندێ‌ له‌سیاسه‌تمه‌دارانی‌ نه‌ینه‌واوه‌ دروستكراوه‌.

هه‌روه‌ها وتی‌ "مه‌سه‌له‌ی‌ پێكهێنانی‌ ئه‌و فه‌وجه‌ دوو ساڵ‌ به‌ر له‌ئێستا له‌لایه‌ن ئه‌نجومه‌نی‌ وه‌زیرانه‌وه‌ گفتوگۆی‌ له‌سه‌ركراوه‌، كه‌ ئه‌وكات سه‌رۆكی‌ ئه‌نجومه‌نی‌ پارێزگای‌ نه‌ینه‌واو جێگره‌كه‌ی‌‌و سه‌رۆكی‌ لیژنه‌ی‌ ئه‌منی‌ ئه‌نجومه‌نه‌كه‌ ئاماده‌ی‌ بوون، له‌به‌رده‌می‌ ئه‌واندا لای‌ مالیكی‌ سكاڵام كرد كه‌ ناوچه‌ی‌ سه‌هلی‌ نه‌ینه‌وا له‌بارێكی‌ نائارامدایه‌و خه‌ڵكی‌ ناوچه‌كه‌ به‌رده‌وام ده‌كرێنه‌ ئامانج".

قوسه‌ی‌ درێژه‌ی‌ به‌قسه‌كانیداو وتی‌ "پێشنیارم كرد فه‌وجێكی‌ تر پێكبهێنرێت له‌ناوچه‌ی‌ سه‌هلی‌ نه‌ینه‌وا، چونكه‌ ناوچه‌یه‌كی‌ به‌رفراوانه‌و له‌قه‌زای‌ ته‌لكێف له‌خۆرئاوای‌ پارێزگاكه‌وه‌ ده‌ست پێده‌كات تا ده‌گاته‌ قه‌زای‌ حه‌مدانیه‌ له‌خۆرهه‌ڵات، هه‌موو ئه‌و ناوچه‌یه‌ش ته‌نها یه‌ك فه‌وجی‌ فریاكه‌وتنی‌ تێدایه‌، كه‌چی‌ له‌قه‌زاكانی‌ تری‌ نه‌ینه‌وا فه‌وجێك یان دوو فه‌وج بونیان هه‌یه‌".

وه‌ك ئه‌وه‌ی‌ قوسه‌ی‌ ئاماژه‌ی‌ پێده‌كات مالیكی‌ ئه‌وكات بڕیاری پێكهێنانی‌ فه‌وجێكی‌ داوه‌‌و هه‌ر به‌راستیش فه‌وجه‌كه‌ له‌ 700 پۆلیس پێكهاتووه‌، به‌ڵام به‌ته‌نها مه‌سیحیه‌كانی‌ تێدا بووه‌و داواكراوه‌ بۆ ئه‌و كاره‌ شه‌به‌كه‌كانیش له‌به‌رچاو بگیرێن، هه‌تا به‌م دواییه‌ بڕیاردرا بۆ پێكهێنانی‌ فه‌وجێك له‌شه‌به‌ك كه‌ 500 پۆلیس له‌خۆبگرێت‌و گرێبدرێته‌وه‌ به‌فه‌رمانده‌یی‌ پۆلیسی‌ نه‌ینه‌واو به‌فه‌وجی‌ فریاكه‌وتنی‌ حه‌مدانیه‌وه‌، به‌جۆرێك ئه‌فسه‌ره‌كانی له‌رۆڵه‌كانی‌ نه‌ینه‌وابن.

قوسه‌ی‌ عه‌باس سوربوو له‌سه‌ر ره‌تكردنه‌وه‌ی‌ ناوهێنانی‌ ئه‌و حاڵه‌ته‌ به‌تایفی‌‌و ته‌نها ئاماژه‌ی‌ به‌وه‌ كرد كه‌ شه‌به‌كه‌كانی‌ ناوچه‌ی‌ حه‌مدانیه‌ زۆر پێویستیان به‌پارێزگارییه‌.

گونده‌ شه‌به‌كنشینه‌كانی‌ نه‌ینه‌وا له‌باكوری‌ موسڵه‌وه‌ ده‌ست پێده‌كات‌و به‌شێوه‌یه‌كی‌ كه‌وانه‌یی‌ ده‌گه‌نه‌ ئه‌وپه‌ڕی‌ رۆژهه‌ڵاتی‌ شاره‌كه‌، سه‌رجه‌می‌ شه‌به‌كه‌كان موسوڵمانن نزیكه‌ی‌ له‌سه‌دا 60 له‌شیعه‌ پێكدێن‌و زۆربه‌یان ئه‌وه‌ ره‌ت ده‌كه‌نه‌وه‌ له‌نێو نه‌ته‌وه‌ی‌ عه‌ره‌ب‌و كورددا بناسرێن، به‌ڵكو شه‌به‌ك به‌نه‌ته‌وه‌یه‌كی‌ سه‌ربه‌خۆ ده‌زانن.

ئه‌و له‌سه‌دا 40ی‌ تر كه‌ ده‌مێننه‌وه‌و سوننه‌ن‌و وه‌ها خۆیان ده‌ناسێنن كه‌ كوردن، هه‌ردوو به‌شه‌كه‌ش یه‌ك زمانی‌ هاوبه‌ش كۆیان ده‌كاته‌وه‌ كه‌ تێكه‌ڵه‌یه‌كه‌ له‌عه‌ره‌بی‌‌و كوردی‌‌و فارسی‌‌و سریانی‌‌و توركمانی‌، جل‌و به‌رگیشیان جلوبه‌رگێكی‌ عه‌ره‌بییه‌.

ئه‌و شه‌به‌كانه‌ی‌ له‌ناوچه‌ سوننه‌ نشینه‌كانی‌ موسڵ‌ نیشته‌جێن به‌تایبه‌تی‌ له‌لای‌ چه‌پی‌ شاره‌كه‌و له‌ناوچه‌كانی‌ (عه‌تشانه‌و باب شه‌مس‌و نه‌بی‌ یونس‌و كه‌رامه‌و عه‌ده‌ن‌و نورو ته‌ئمیم) به‌سه‌دانیان رووبه‌رووی‌ كوشتن‌و ته‌قاندنه‌وه‌ی‌ ماڵه‌كانیان بوونه‌وه‌، به‌دیاریكراوی‌ له‌سه‌روبه‌ندی‌ جه‌نگی‌ تایفی‌ ساڵی‌ 2006 له‌پاش ته‌قاندنه‌وه‌ی‌ دوو قوبه‌ی‌ سامه‌را، له‌م هێرشانه‌شدا شه‌به‌كی‌ شیعه‌و سوننه‌ له‌یه‌ك جیانه‌ده‌كرانه‌وه‌.

ئه‌م رووداوانه‌ وایكرد به‌هه‌زارانیان روو له‌گونده‌ شه‌به‌ك نشینه‌كان بكه‌ن، به‌دیاریكراوی‌ گوندی‌ عه‌لی‌ ره‌ش كه‌ مه‌رقه‌دێكی‌ شیعه‌ی‌ تێدایه‌، له‌گه‌ڵ‌ گونده‌كانی‌ بازوایاو كۆكچڵی‌‌و خه‌زنه‌و ته‌یس‌و خه‌راب‌و شاقولی‌، كۆبوونه‌وه‌ی‌ ئه‌و ژماره‌ زۆره‌ش بووه‌ مایه‌ی‌ دروستبوونی‌ هه‌ندێ‌ گوندی‌ نوێ‌، له‌گه‌ڵ‌ ئه‌وانه‌شدا هێرشه‌كان بۆ سه‌ریان هه‌ر كۆتایی‌ نه‌هات‌و ته‌قینه‌وه‌ی‌ گونده‌كان به‌رده‌وام بوون‌و ژماره‌یه‌كی‌ زۆرتریان بوونه‌ قوربانی‌.

نوێنه‌رانی‌ شه‌به‌كی‌ شیعه‌ پێیان وایه‌ ناوچه‌ی‌ حه‌مدانیه‌و ناوه‌نده‌كه‌ی‌ قه‌ره‌قوشی‌ مه‌سیحی‌‌و شارۆچكه‌ی‌ به‌رته‌له‌ی‌ مه‌سیحی‌ له‌رووی‌ ئه‌منیه‌وه‌ پارێزراوترن‌و 2500 پۆلیسی‌ تایبه‌ت به‌خۆیان هه‌یه‌ بۆ پاراستنی‌ شوێنه‌ مه‌سیحیه‌كان، ئه‌مه‌ له‌كاتێكدایه‌ ده‌یان گوندی‌ شه‌به‌ك نشین كه‌ هه‌ندێكی‌ وه‌ك بازوایاو كۆكچڵی‌ به‌قه‌د شارۆچكه‌یه‌كی‌ بچووكن، هیچ یه‌كێك له‌نه‌وه‌كانی‌ خۆیان پارێزگاریان ناكات.

هه‌ر له‌م رووه‌وه‌ حه‌نین قه‌دۆ په‌رله‌مانتاری‌ پێشووی‌ شه‌به‌ك ره‌خنه‌ له‌پارێزگاری‌ نه‌ینه‌واو ئه‌ندامانی‌ ئه‌نجومه‌نی‌ ئه‌و پارێزگایه‌ ده‌گرێت به‌وه‌ی‌ رازی‌ نین هێزێكی‌ ئه‌منی‌ پێكبهێنرێت بۆ پارێزگاری‌ حسێنیه‌كانی‌ شیعه‌‌و گونده‌ شه‌به‌ك نشینه‌كان، سه‌ره‌ڕای‌ ئه‌وه‌ی‌ چه‌ند مانگێكه‌ رووبه‌رووی‌ هه‌ڵمه‌تی‌ تیرۆریستی‌ بوونه‌ته‌وه‌.

به‌پێی‌ به‌یاننامه‌یه‌ك كه‌ له‌لایه‌ن قه‌دۆوه‌ ده‌ركراوه‌و "نیقاش" وێنه‌یه‌كی‌ ده‌ستكه‌وتووه‌، داوایكردووه‌ وه‌ك ئه‌وه‌ی‌ خۆی‌ ناویبردوون میلیشیا مه‌سیحیه‌كان هه‌ڵبوه‌شێته‌وه‌و هێزی‌ پێشمه‌رگه‌ له‌ناوچه‌ی‌ سه‌هلی‌ نه‌ینه‌وا ده‌ربكرێن به‌و پێیه‌ی‌ كۆنترۆڵی‌ ئه‌و ناوچانه‌یان كردووه‌، له‌كاتێكدا ناوچه‌ی‌ جێناكۆكن.

ئاماژه‌ی‌ به‌وه‌ش كردووه‌ هه‌بوونی‌ هێزی‌ پێشمه‌رگه‌و مه‌سیحی‌ له‌سه‌ر بنه‌مایه‌كی‌ نه‌ته‌وه‌یی‌‌و ئاینی‌ به‌لای‌ هه‌ندێ‌ كه‌سه‌وه‌ قبوڵه‌، به‌ڵام بوونی‌ هێزی‌ شه‌به‌ك‌و كه‌مینه‌كانی‌ تر وه‌ك هه‌ڕه‌شه‌یه‌ك هه‌ژمار ده‌كرێن به‌سه‌ر پێكهاته‌ی‌ كۆمه‌ڵایه‌تی‌ پارێزگاكه‌وه‌.

ئه‌ندامانی‌ ئه‌نجومه‌نی‌ پارێزگا كه‌ نوێنه‌رایه‌تی‌ تایفه‌و پێكهاته‌ جیاوازه‌كان ده‌كه‌ن، پێكهێنانی‌ فه‌وجێكی‌ شیعه‌ی‌ شه‌به‌ك به‌وه‌ وه‌سف ده‌كه‌ن كه‌ تۆوی‌ تایفی‌ له‌خۆرهه‌ڵاتی‌ نه‌ینه‌وا ده‌چێنێت، له‌مڕووه‌وه‌ سه‌عید تانیوس نوێنه‌ری‌ مه‌سیحیه‌كان له‌و ئه‌نجومه‌نه‌ ئاماژه‌ی‌ به‌وه‌ كرد كه‌ ده‌بێت ئه‌و فه‌وجه‌ له‌هه‌موو پێكهاته‌كان پێكبێت‌و ناكرێت له‌سه‌ر بنه‌مایه‌كی‌ تایفی‌ دابمه‌زرێت.

هاوكاره‌كه‌شی‌ نه‌دیم كه‌جانی‌ نوێنه‌ری‌ لیستی‌ برایه‌تی‌ كوردی‌ ئاماژه‌ی‌ به‌وه‌ كرد نه‌ینه‌وا له‌سوننه‌و شیعه‌و عه‌ره‌ب‌و كوردو ئێزدی‌‌و مه‌سیحی‌‌و توركمان پێكدێت‌و ئه‌ندامانی‌ ئه‌نجومه‌ن كه‌ نوێنه‌ری‌ هه‌موو ئه‌و پێكهاتانه‌ن بوونی‌ فه‌وجێك له‌سه‌ر بنه‌مای‌ تایفی‌‌و نه‌ته‌وه‌یی‌ ره‌ت ده‌كه‌نه‌وه‌.

له‌لای‌ خۆیانه‌وه‌ چاودێرانی‌ سیاسی‌ ئاماژه‌ به‌وه‌ ده‌كه‌ن ئه‌و هاندانه‌ تایفیه‌ی‌ ئێستا له‌نه‌ینه‌وا رووده‌دات ئه‌گه‌ر كوتله‌و هێزه‌ سیاسیه‌كان بچنه‌ پشتیه‌وه‌ ئه‌نجامه‌كه‌ی‌ كاره‌سات ده‌بێت، وه‌ك ئه‌وه‌ی‌ محه‌مه‌د سه‌لام حیكمه‌ت توێژه‌رو نوسه‌ری‌ سیاسی‌ سه‌ربه‌خۆ ئاماژه‌ی‌ پێده‌كات كۆتایی‌ هێنان به‌ناكۆكی‌ نه‌ته‌وه‌یی‌ نێوان عه‌ره‌ب‌و كورد به‌گه‌ڕانه‌وه‌ی‌ لیستی‌ برایه‌تی‌ نه‌ینه‌وا بۆ ئه‌نجومه‌نی‌ پارێزگا پاش سێ‌ ساڵ‌ به‌یكۆتكردن، به‌دوای‌ خۆیدا شه‌رێكی‌ تایفی‌ هێنایه‌ ئاراوه‌ كه‌ هه‌ندێ‌ كه‌س ئاگره‌كه‌ی‌ بۆ خۆش ده‌كه‌ن.

محه‌مه‌د هێمای‌ بۆ داواكارییه‌كانی‌ وه‌قفی‌ شیعه‌ كرد به‌گوێزانه‌وه‌ی‌ موڵكدارێتی‌ جێگه‌كانی‌ وه‌قفی‌ سوننه‌ بۆ ئه‌وان‌و پاشانیش ده‌ستێوه‌ردانی‌ جكومه‌تی‌ ناوه‌ند له‌مه‌سه‌له‌كه‌دا، هه‌روه‌ك داواكاری‌ بۆ گۆڕینی‌ قه‌زای‌ ته‌له‌عفه‌ری‌ خۆرئاوای‌ موسڵ‌ بۆ پارێزگا له‌سه‌ر بنه‌مایه‌كی‌ تایفی‌‌و نه‌ته‌وه‌یی‌، دوای‌ ئه‌وه‌ش هه‌واڵی‌ پێكهێنانی‌ فه‌وجێكی‌ ئه‌منی‌ له‌سه‌ر هه‌مان بنه‌ما، به‌بڕوای‌ محه‌مه‌د هه‌موو ئه‌م حاڵه‌تانه‌ خه‌ریكه‌ ده‌بنه‌ دیارده‌یه‌كی‌ میللی‌، به‌ڵام په‌ته‌كه‌ی‌ به‌ده‌ستی‌ هێزه‌ سیاسییه‌ گه‌وره‌كانه‌وه‌یه‌.

محه‌مه‌د سه‌لام ئه‌وه‌ش روونده‌كاته‌وه‌ ئه‌م كێشانه‌ له‌و كاته‌وه‌ سه‌ریهه‌ڵداوه‌ كه‌ كێشه‌كانی‌ نێوان لیستی‌ عێراقیه‌و ده‌وڵه‌تی‌ یاسا قوڵبوونه‌ته‌وه‌، ئه‌وه‌ی‌ یه‌كه‌میان له‌لایه‌ن دوو براوه‌ له‌موسڵدا سه‌رۆكایه‌تی‌ ده‌كرێت كه‌ یه‌كێكیان ئه‌سیل نوجێفی‌ پارێزگارو ئه‌وه‌ی‌ تریان ئوسامه‌ نوجێفی‌ سه‌رۆكی‌ په‌رله‌مانه‌.

هه‌رچی‌ ده‌وڵه‌تی‌ یاساشه‌ ئه‌وه‌ حاكمی‌ سه‌ره‌كی‌ وڵاته‌ كه‌ دیارترین سه‌ركرده‌ی‌ نوری‌ مالیكی‌ سه‌ره‌ك وه‌زیرانه‌، هاوكات هه‌ر خۆی‌ ماوه‌یه‌كی‌ دوورو درێژه‌ فه‌رمانده‌ی‌ گشتی‌ هێزه‌ چه‌كداره‌كان‌و وه‌زیری‌ ناوخۆو به‌رگرییه‌ به‌وه‌كاله‌ت، بۆیه‌ محه‌مه‌د سه‌لام ده‌ڵێت "ئه‌وه‌ی‌ ده‌ڵێت شه‌ڕه‌كه‌ ده‌ستی‌ پێكردووه‌ ئه‌وه‌ خه‌یاڵپڵاوه‌، چونكه‌ ئه‌وه‌ی‌ ئێستا روده‌دات ئاماده‌كارییه‌ بۆ جه‌نگێكی‌ تایفی‌ كه‌مه‌رشكێن كه‌ كه‌س نازانێت كه‌ی‌ ده‌ست پێده‌كات‌و كه‌ی‌ ته‌واو ده‌بێت".