راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

چیرۆكێكی‌ ناخ هه‌ژێن
ژێرزه‌مینه‌كانی موسڵ هه‌میشه‌ نابنه‌ گۆڕی قوربانییه‌كان

نەوزەت شەمدین
له‌ژێر داروپه‌ردووه‌ رووخاوه‌كانی‌ موسڵ به‌ده‌یان چیرۆك‌و رازو نهێنی‌ شاراوه‌ هه‌ن، هه‌ندێكیان بۆ هه‌تا هه‌تایه‌ له‌گۆڕنران، هه‌ندێكی‌ دیكه‌یان كه‌سێكی‌ وه‌ك ئه‌م كچه‌ شایه‌تحاڵه‌ به‌سه‌ر ئازاره‌كانه‌وه‌.
1.02.2018  |  موسڵ
Central bank
Central bank

له‌وه‌ته‌ی له‌ ناوجه‌رگه‌ی تاریكییه‌وه‌ چاوی كردووه‌ته‌وه‌ ده‌ستی خوشكه‌كه‌ی گرتووه‌. ئازارێك هه‌ناسه‌كانی داگیركردوه‌‌و به‌ ترپه‌كانی دڵی وه‌كو چه‌كوش له‌ هه‌موو شوێنك ده‌دا، هه‌ندێك كاتی پێویست بوو تا دركی پێبكات ئه‌وه‌ ئه‌و مۆته‌كه‌یه‌ نییه‌ كه‌ رۆژانه‌ له‌ سه‌عاته‌ كه‌مه‌كانی نووستنیدا له‌وه‌ته‌ی جه‌نگ ده‌ستیپێكردووه‌، راوی ده‌نێت.

 

ئه‌و رووبه‌ڕه‌ به‌رته‌سكه‌ گۆڕئاسایه‌ی تێیدا به‌خه‌به‌رهات كه‌لێنێك بوو داروپه‌ردووی ژێرزه‌مینه‌ رووخاوه‌كه‌ دروستیكردبوو، ئه‌و ده‌سته‌ بچووكه‌ ساردوسڕه‌ش كه‌ به‌ده‌ستی گرتبووی، ته‌نیا شتێكی دیاربوو له‌ جه‌سته‌ی "ته‌باره‌ك" كه‌ كه‌وتبووه‌ ژێر ستوونێكی به‌ردینه‌وه‌.

 

"ئه‌ریج" كچێكی گه‌نجی موسڵاویه‌ له‌ شوباتی 2017دا هه‌ژده‌یه‌مین ساڵی ته‌مه‌نی ته‌واوكردووه‌ كه‌ هه‌مان ئه‌و مانگه‌یه‌ تێیدا هێزه‌ عێراقییه‌كان به‌ پشتیوانی فڕۆكه‌كانی هاوپه‌یمانی نێوده‌وڵه‌تی‌و موشه‌كه‌كانیان جه‌نگی ئازادكردنی به‌ری راستی شاری موسڵیان (400كم له‌ باكووری به‌غدا) له‌ژێر ده‌ستی چه‌كدارانی داعش ده‌ستپێكرد.

 

ئه‌ریج حسابی ئه‌و كاته‌ نازانێت كه‌ به‌سه‌ریدا تێپه‌ڕیوه‌ له‌ تاریكیدا‌و به‌ تۆقیوی له‌ بیرۆكه‌ی مان‌و نه‌مان هاواری كردووه‌، ئه‌و له‌هۆش خۆی ده‌چو‌و ده‌گه‌ڕایه‌وه‌ بۆ درێژه‌دان به‌ بانگكردنه‌ بێ ئومێده‌كانی، به‌ڵكو ئاماژه‌یه‌كی ده‌نگی دایكی پێبگات، ده‌ستی چه‌پی به‌رده‌وام پاسه‌وانی ساردوسڕی په‌نجه‌كانی ته‌باره‌كی ده‌كرد له‌ترسی ئه‌وه‌ی نه‌بادا له‌ده‌ستی به‌رببێت، له‌به‌ر هیوایه‌ك له‌ ناخیدا كه‌ هه‌رگیز نه‌یتوانیوه‌ ده‌ستبه‌رداری ببێت به‌وه‌ی خوشكه‌كه‌ی به‌ به‌شه‌كانی دیكه‌ی جه‌سته‌یه‌وه‌ رزگاری بووه‌‌و هه‌ڵاتووه‌ بۆ ده‌ره‌وه‌ی ژێرزه‌مینه‌كه‌.

 

ئه‌و تا ئێستاش له‌وه‌ تێناگات چۆن ئه‌و چه‌ندین تۆن به‌رد‌و شیشه‌ به‌ری نه‌كه‌وتووه‌‌و روحی ئه‌ندامانی دیكه‌ی خێزانه‌كه‌ی سه‌ندووه‌ته‌وه‌، هه‌ر كه‌ بیریده‌كه‌وێته‌وه‌ چۆن له‌ سه‌رزه‌وی ژێرزه‌مینه‌كه‌ له‌نێوان دایكی‌و پوری‌و هه‌ردوو كچكه‌یدا راكشاوه‌‌و ته‌باره‌كی خوشكیشی یاخود "توته‌" وه‌ك له‌خۆشه‌ویستیدا ناویان نابوو، له‌ته‌نیشتیه‌وه‌یه‌، هه‌ست به‌ ئازارێكی سووتێنه‌ری ویژان ده‌كات. له‌ سووچه‌كه‌ی به‌رامه‌به‌ریشدا باوكه‌ په‌ككه‌وته‌كه‌ی له‌ ئه‌نجامی رووداوێكی كۆندا‌و براگه‌وره‌كه‌ی‌و مێردی پوری لێیه‌.

 

گه‌رده‌لولێك له‌ دوكه‌ڵ له‌ ژێرزه‌مینه‌كه‌ی دا‌و هه‌موو ده‌وروبه‌ره‌كه‌ی سڕیه‌وه‌، پاشان له‌گه‌ڵ ئه‌و ده‌نگدا كه‌وته‌ له‌رزین كه‌ وا ده‌رده‌كه‌وت ناخی بڕیبێت، له‌ناخیدا ته‌قیه‌وه‌‌و له‌گه‌ڵیدا هه‌موو شتێك دیار نه‌ما، ته‌نیا ئه‌وه‌ی به‌بیردێته‌وه‌، دوای ژه‌مێك گریان ئه‌ریج ده‌نگی بۆده‌گه‌ڕێته‌وه‌‌و ده‌ڵێت: " بۆچی ئه‌وان مردن‌و من مامه‌وه‌؟".

 

هه‌مان ئه‌و پرسیاره‌ی توتی ئاسا له‌ پزیشك‌و پرینپێچه‌كانی ئه‌و نه‌خۆشخانه‌ مه‌یدانییه‌ دووباره‌ ده‌كرده‌وه‌ كه‌ ئه‌ندامانی پۆلیسی فیدراڵی گواستبویانه‌وه‌ بۆی، ئه‌ویش دوای دۆزینه‌وه‌ی له‌رێی بیستنی ده‌نگیه‌وه‌، رۆژی پێنجشه‌ممه‌ 22ی حوزه‌یرانی 2017 به‌ چه‌ند روشاوی‌و برینێكی سووكه‌وه‌ ده‌ریان هێنا دوای ئه‌وه‌ی سێ رۆژی ته‌واو له‌ژێر داروپه‌ردوودا گیریخواردبوو.

 

پزیشكه‌كان بۆ ماوه‌ی دوو هه‌فته‌ی ته‌واو به‌ ده‌رمانی هێوركه‌ره‌وه‌ رووبه‌ڕووی نۆره‌ هیستریاییه‌كانی ده‌بوونه‌وه‌‌و هه‌وڵیان ده‌دا رێی لێبگرن نه‌چێته‌ ده‌ره‌وه‌ بۆ دڵنیابوونه‌وه‌ له‌وه‌ی ئایا كه‌سوكاره‌كه‌ی هه‌موویان له‌و هێرشه‌ موشه‌كییه‌دا مردوون.

 

كاتێكیش خزمه‌كانی باوكی بردیانه‌ سه‌ر داروپه‌ردووی ماڵه‌كه‌یان له‌ ناوچه‌ی "ئیقلیعات" له‌ ناوه‌ڕاستی موسڵی كۆن له‌ به‌ری راستی روباری دیجله‌، لێیگه‌ڕان به‌رد‌و بارسته‌ گه‌چینه‌كان ئه‌مدیو‌و ئه‌و دیو بكات‌و به‌دوای یاده‌وه‌رییه‌ له‌ گۆڕنراوه‌كانیدا بگه‌ڕێت، له‌ ناخیشیدا ئه‌و ئومێده‌ سه‌رسه‌خته‌ هه‌بوو كه‌ ره‌نگه‌ یه‌كێك له‌كه‌سوكاركه‌ی له‌ژیاندا مابێت.

 

به‌له‌پی ده‌ستی فرمێسكه‌ رێچكه‌به‌ستووه‌كه‌ی ده‌سڕێت‌و به‌رده‌وام ده‌بێت: "له‌گه‌ڵ هه‌ر ته‌قینه‌وه‌یه‌كدا له‌ ده‌ره‌وه‌ ئێمه‌ش ده‌له‌رینه‌وه‌، خۆمان له‌ سووچه‌كان گیرده‌كرد‌و باوه‌شمان به‌یه‌كتریدا ده‌كرد، گوێم لێبوو دایكم دوعا‌و ئایه‌تی ده‌خوێند له‌خودا ده‌پاڕایه‌وه‌ی تا رزگارمان بكات".

 

ئه‌ریج هه‌مان ئه‌و ده‌سته‌ی درێژكرد وه‌ك ئه‌وه‌ی به‌دوای ده‌سته‌ گریمانه‌ییه‌كه‌ی خوشكه‌كه‌یدا بگه‌ڕێت. ده‌ستی گرت‌و مشتی لێ توندكرد‌و پاشان بۆ چه‌ند چركه‌یه‌ك به‌ چاو داخستنه‌وه‌ راما وه‌ك ئه‌وه‌ی بیه‌وێت بزانێت هێشتا ده‌سته‌كه‌ سارد‌وسڕه‌. وتی: "له‌و رۆژانه‌دا زۆر لێم نزیك بوو. هه‌ستم به‌ ترسه‌كه‌ی‌و ترپه‌ خێراكانی دڵی ده‌كرد‌و بێده‌نگ ده‌بووم‌و توانای وه‌ڵامدانه‌وه‌ی ئه‌و پرسیاره‌ خێرایانه‌یم نه‌بوو كه‌ دوای هه‌ر ته‌قینه‌وه‌یه‌ك ده‌یكردن:"ته‌واو بوو؟. ده‌توانم چاوه‌كانم بكه‌مه‌وه‌؟. نامرین؟".

 

له‌ "بازاڕی شه‌عارین" (گوریسفرۆشان) كه‌ ناوجه‌رگه‌ی موسڵی كۆنه‌ یاخود ئه‌وه‌ی لێی ماوه‌ته‌وه‌، به‌دووری ته‌نیا پێنج كۆڵان، دار‌وپه‌ردووی ماڵه‌كه‌ی ئه‌ریجی لێیه‌. له‌كاتێكدا ئه‌ندامانی  به‌رگری شارستانی‌و خۆبه‌خشان سه‌رقاڵی ده‌رهێنانی پاشماوه‌ی ئێسك‌و پروسكی دوا ئه‌ندامی خێزانێكی 10 كه‌سی بوون كه‌ له‌ژێر داروپه‌ردووی ماڵه‌كه‌یاندا گیانیان له‌ده‌ستدابوو، ملازمی یه‌ك سه‌عد ده‌فته‌رێكی بچووكی یاده‌وه‌ری به‌قه‌باره‌ی ده‌ستێك دۆزیه‌وه‌ كه‌ له‌شێوه‌ی دڵێكی ره‌نگ په‌مه‌ییدا بوو یاخود به‌لانی كه‌مه‌وه‌ پێش ئه‌وه‌ی ته‌پوتۆز بیشێوێنت له‌و شێوه‌یه‌دا بوو.

 

دوودڵ بوو له‌وه‌ی فڕێی بداته‌ سه‌ر كۆمه‌ڵێك كه‌لوپه‌لی دیكه‌ی ناوماڵ، بۆیه‌ گێڕایه‌وه‌‌و هه‌ردوو به‌رگه‌ ئاوساوه‌ كون كون بووه‌كه‌ی پشكنی‌و بیری له‌ شێوه‌ی پێشتری وێنه‌ی سه‌ر هه‌ر دوو به‌رگه‌كه‌ ده‌كرده‌وه‌ كه‌ له‌لایه‌كی ته‌نیا تاڵێك‌و له‌لایه‌كه‌ی دیكه‌شی په‌پوله‌یه‌كی نیوه‌ باڵی ره‌نگ ماتی، لێ مابووه‌وه‌.

 

ده‌فته‌ره‌كه‌ی خسته‌ گیرفانیه‌وه‌‌و له‌گه‌ڵ هاوكاره‌كانی رۆیشت بۆ ته‌سلیمكردنی ئیسك‌و پروسكه‌كان به‌ فه‌رمانگه‌ی پزیشكی داد بۆ پاراستنیان. به‌وه‌ش كۆتایی به‌ رۆژێكی دوور‌ودرێژی دیكه‌ی تشرینی یه‌كه‌می 2017 هێنا كه‌ ده‌رئه‌نجامه‌كه‌ی ده‌رهێنانی 168 ته‌رمی شێواو بوو پاش سێ مانگی ته‌واو له‌ كۆتاییهاتنی شه‌ڕ له‌و به‌شه‌ خاپووربووه‌ی شاره‌كه‌.

 

"مانه‌وه‌ بۆ ماوه‌یه‌كی زۆر له‌نێو مردوواندا ترسی مردن ناهێڵێت" ئه‌مه‌ ئه‌و فه‌لسه‌فه‌یه‌یه‌ كه‌ سه‌عد پێیگه‌یشتووه‌ دوای چوار ساڵ له‌ به‌ستنی ئه‌ستێره‌ی یه‌كه‌م پله‌ی له‌سه‌ر شانی‌و بینینی كه‌وتنی هاوكارانی له‌ شه‌قامه‌كانی شاره‌كه‌دا به‌ گولله‌ی تیرۆر یاخود له‌ شه‌ڕه‌كاندا یان دواتر به‌ بۆمبی چێندراوی شاردراوه‌ی نێو داروپه‌ردووی ماڵ‌و خانووبه‌ره‌كانی دیكه‌.

 

سه‌عد ده‌یگێڕێته‌وه‌ كه‌ چۆن چه‌ند ساتێك پێش مردنی زۆر كه‌س گه‌یشتووه‌ته‌ سه‌ریان، له‌ مه‌ده‌نی‌و سه‌رباز. گوێی له‌ دوا وشه‌كان، وه‌سێته‌كان بووه‌‌و بێده‌نگبوونی له‌ناكاویان یاخود له‌رزینیان یان هه‌ڵكێشانی دوا هه‌ناسه‌یانی بینیوه‌، به‌ڵام ئه‌و كاریگه‌رییه‌ی ئه‌و ده‌فته‌ره‌ بچووكه‌ له‌سه‌ر ده‌روونی دروستیكرد شتێكی زۆر جیاوازه‌.

 

ده‌فته‌ره‌كه‌ شانزه‌ په‌ڕه‌ی ئه‌ستوری له‌شێوه‌ی دڵ له‌خۆگرتبوو كه‌ هیچیان لێ نه‌هاتبوو، هه‌ریه‌كه‌یان به‌ ره‌نگێكی جیاواز له‌وی دیكه‌. له‌ په‌ڕه‌ی یه‌كه‌مدا به‌سێ ره‌نگی جیاواز نووسرابوو (سه‌ما) له‌گه‌ڵ به‌رواری سێشه‌ممه‌ 4/3/2014‌و وێنه‌ی ده‌موچاوێكی بازنه‌یی دڵخۆش، له‌ نزیكیشیه‌وه‌ به‌وشه‌ی گه‌وره‌ نووسرابوو (جه‌ژنی له‌دایكبوونم).

 

ئه‌و روونی كرده‌وه‌ كه‌ پێنج په‌ڕه‌ی داهاتووی بێ مێژوو بوون، چه‌ند رسته‌یه‌كی كورتیان به‌ شێوه‌زاری خه‌ڵكی موسڵ له‌خۆگرتبوو، چه‌ند وشه‌یه‌كیان به‌ ره‌نگی تۆخ سڕابوونه‌وه‌‌و هه‌مووشیان له‌ ته‌نیشته‌وه‌ به‌ وێنه‌ی بچووكی گوڵ یان لقی دار یان دڵ نه‌خشێندرابوون، به‌ په‌نجه‌كانی ده‌ستی به‌ ژماردن كرد‌و له‌ په‌نجه‌ توته‌وه‌ خوێندنه‌وه‌ی ناوه‌رۆكی هه‌ر په‌ڕه‌یه‌كی ده‌ستپێكرد كه‌ له‌یاده‌وه‌ریدا مابووه‌وه‌:

 

"جوانترین دیاریم له‌ دایكی خۆشه‌ویستمه‌وه‌ پێگه‌یشت، ئه‌مڕۆ بووم به‌ دوانزه‌ ساڵ" به‌دوایدا رسته‌یه‌كی دیكه‌ هاتبوو "ئه‌مڕۆ من و دایكم كوبه‌مان دروستكرد" له‌ په‌ڕه‌یه‌كی تریشدا "نه‌نكم رقی له‌و پشیله‌یه‌ كه‌ له‌گه‌ڵماندا ده‌ژی باوكیشم ده‌ڵێت هاوین ده‌زێ‌و به‌چكه‌ی ده‌بێت" پاشان منداڵه‌كه‌ ترسی خۆی به‌ یه‌ك رسته‌ له‌ ده‌فته‌ره‌كه‌دا وه‌سف كردووه‌ "من ده‌ترسم‌و گوێم له‌ ده‌نگی ته‌قینه‌وه‌‌و فڕۆكه‌یه‌‌و ناتوانین له‌ ژێرزه‌مینه‌كه‌ بێینه‌ ده‌ره‌وه‌".

 

له‌ كه‌ناری روباری دیجله‌ كه‌ به‌رامبه‌ر وێرانكارییه‌كه‌ی شاری كۆنه‌، پاشنیوه‌ڕۆی 10ی كانونی دووه‌می 2017 چوار قه‌ناسبه‌ده‌ستی سه‌ر به‌ رێكخراوی داعش هه‌ڵیانكوتایه‌ سه‌ر ماڵی پرۆفیسۆر محه‌مه‌د ته‌یب له‌یله‌‌و له‌ سه‌ربانه‌ به‌رزه‌كه‌یدا بۆسه‌یان بۆ ئه‌و هێزه‌ عێراقییانه‌ دانا كه‌ پێشڕه‌ویان ده‌كرد بۆ كۆنترۆڵكردنی دوا به‌شی به‌ری چه‌پی موسڵ‌و له‌ ئاسمانیشه‌وه‌ فڕ‌وكه‌كانی هاوپه‌یمانی نێوده‌وڵه‌تی به‌ رۆكێته‌كانیان ناوچه‌كه‌یان كێوماڵ ده‌كرد.

 

به‌رله‌وه‌ی هیچ یه‌كێكیان په‌نجه‌ بخاته‌ سه‌ر په‌له‌پیتكه‌ی گولله‌ ته‌قاندن، دوو موشه‌ك له‌ ئاسمانه‌وه‌ كه‌وتنه‌ خواره‌‌وه‌‌و خانووه‌ دوو نهۆمی‌و رووبه‌ر (600 مه‌تر دوجا) كه‌یان به‌ به‌رد‌و مرۆڤه‌ پارچه‌ پارچه‌ی كرده‌، سه‌ره‌ڕای برینه‌ قوڵه‌كانی جه‌گ، هه‌موو موسڵیشیان خسته‌ خه‌مێكی قوڵه‌وه‌ بۆ كوژرانی یه‌كێك له‌ گه‌وره‌ زانایانی میكانیكی خاك‌و راگری پێشووی كۆلیجی ئه‌ندازیاری له‌ زانكۆی موسڵ‌و فاتمه‌ حه‌بال هاوسه‌ره‌ پزیشكه‌كه‌ی‌و ئیمانی كچیان.

 

ئه‌حمه‌دی كوڕی نۆبه‌ره‌ی خێزانه‌كه‌ له‌گه‌ڵ خانه‌واده‌كه‌ی له‌ شاری هه‌ولێر له‌ هه‌رێمی كوردستان نیشته‌جێیه‌، ئه‌و هێشتا هه‌ست به‌و خۆشیه‌ مناڵانه‌یه‌ ده‌كات ئه‌و كاته‌ی یه‌كه‌م زه‌نگی مۆبایله‌كه‌ی لێی دا‌و وه‌ڵامی دایه‌وه‌ به‌ خه‌یاڵی ئه‌وه‌ی گوێی له‌ ده‌نگی یه‌كێك له‌ باوك‌و دایكی بێت.

 

ئه‌و وتی چه‌ندین جار له‌ باوكی پاڕاوه‌ته‌وه‌ شاره‌كه‌ به‌جێبهێڵێت‌و بچێته‌ شوێنێكی ئارام، به‌ڵام ئه‌و به‌ توندی ره‌تیده‌كرده‌وه‌‌و ده‌یوت: "من ناچار نیم ماڵه‌كه‌م‌و كتێبخانه‌كه‌م كه‌ نووسین‌و كتێبه‌ زانستییه‌كانمی تێدایه‌‌و به‌ ماندووبوون له‌ منداڵییه‌وه‌ كۆمكردونه‌ته‌وه‌ راده‌ستی كه‌سانێكی دڕنده‌‌و ره‌شۆكی بكه‌م كه‌ هاتوون هه‌موو شتێك بسووتێنن".

                        

"پوازی ته‌مه‌نی به‌ قووڵی له‌ خاكی موسڵدا چه‌قیبوو، نه‌ داعش‌و نه‌ شه‌ڕی ئازادكردنیش له‌ داعش نه‌یانتوانی ده‌ربهێنن" ئه‌حمه‌د به‌م شێوه‌یه‌ وه‌سفی په‌یوه‌ستبوونی باوكی به‌ شاره‌كه‌یه‌وه‌ ده‌كات.

 

ئاماژه‌ی بۆ ئه‌وه‌ش كرد كه‌ بۆ زیاتر له‌ دوو ساڵ‌و نیو، به‌ وریاییه‌كی زۆره‌وه‌ له‌ڕێی مۆبایله‌وه‌ په‌یوه‌ندی به‌ كه‌سوكاره‌ ئابڵوقه‌دراوه‌كه‌یه‌وه‌ هه‌بووه‌، هه‌رچه‌نده‌ مه‌ترسییه‌كی گه‌وره‌ش بووه‌، له‌به‌رئه‌وه‌ی رێكخراوه‌كه‌ چه‌ند یاسایه‌كی دانابوو سزایای كوشنده‌یان تێدابوو له‌دژی هه‌ر كه‌سێك موبایلی پێوه‌ بگیرێت، هه‌روه‌ها وتیشی: "باوكم مۆبایله‌كه‌ی له‌ نهۆمی دووه‌م داده‌نا، چونكه‌ له‌ بنچینه‌دا سیگناڵ لاواز بوو له‌وێ نه‌بووایه‌ وه‌رنه‌ده‌گیرا، هه‌روه‌ها به‌رده‌وام له‌وه‌ش ده‌ترسام مه‌سه‌له‌ی یاخیبوونی باوكم له‌ یاساكانیان ئاشكرا ببێت‌و ئازاری بده‌ن".

 

ئه‌حمه‌د به‌ دڵته‌نگییه‌وه‌ ده‌ڵێت: "دادگاكانی موسڵ رازی نین به‌ڵگه‌نامه‌ی مردنی باوك‌و دایكم پێبده‌ن، چونكه‌ یاساكانی عێراق پێویستیان به‌ پشكنینی ته‌رمه‌كان هه‌یه‌ بۆ دڵنیابوون له‌ هۆكاری مردنه‌كه‌ وه‌ك مه‌رجێك بۆ ده‌رهێنانی، منیش نازانم ته‌رمه‌كانیان له‌كوێ بۆ بهێنم، چونكه‌ ئه‌و ژێرزه‌مینه‌ی باوكم به‌ پشتبه‌ستن به‌ شاره‌زایی ساڵانی دوور‌ودرێژی ئه‌ندازیاری خۆی بنیاتی نابوو، نه‌ك نه‌یتوانی گیانیان بپارێزێت، به‌ڵكو نه‌شیتوانی ته‌رمه‌كانیان بپارێزێت یان به‌لانی كه‌مه‌وه‌ گۆڕێكیان هه‌بێت".

    

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌