راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

دوای ئازادی موسڵ
ئه‌نتیكه‌‌و كتێب‌و موزیك ده‌بنه‌ چیرۆكی پاش جه‌نگ

تایبه‌ت
مانگی هه‌نگوینی له‌بارودۆخی جه‌نگدا خێرا تێده‌په‌ڕێت، بۆیه‌ ئه‌و سه‌ركه‌وتنه‌ی حكومه‌تی عێراق به‌سه‌ر داعشدا رایگه‌یاند، كاولكارییه‌كی گه‌وره‌ی ئاشكرا كرد.
24.08.2017  |  موسڵ

گه‌نجانی موسڵ هه‌وڵ ده‌ده‌ن به‌رگی شڕی جه‌نگ له‌شاره‌كه‌یان دابكه‌نن‌و به‌رگێكی نوێی له‌به‌ر بكه‌ن، لێره‌شدا نموونه‌ی سێ چیرۆك هه‌ن كه‌ هه‌ندێكیان دڵته‌زێنه‌‌و هه‌ندێكیشیان گه‌شبینی ده‌به‌خشێت، ئه‌م چیرۆكانه‌ ده‌رئه‌نجامی جه‌نگ‌و كاردانه‌وه‌ی نه‌وه‌یه‌كن به‌رامبه‌ری كه‌ گورزێكی به‌ئازاری به‌ركه‌وتووه‌ كاتێك ده‌بینێت شاره‌كه‌ی به‌ناشرینترین شێوه‌ وێران ده‌كرێت.

 

تیمێكی گه‌نجانه‌‌و پرۆسه‌یه‌كی ده‌گمه‌نی رزگاركردن

هه‌موو شته‌كان به‌ بانگهێشتێك ده‌ستیپێكرد كه‌ رۆژنامه‌یه‌كی موسڵ له‌ فه‌یسبووك بڵاوی كرده‌وه‌‌و كۆمه‌ڵێك كوڕ‌و كچی گه‌نج به‌دوایدا چوون، هه‌ر خێرا كۆبوونه‌وه‌ بۆ ئه‌نجامدانی چالاكی رۆشنبیری به‌مه‌به‌ستی بانگه‌شه‌كردن بۆ ژیاندنه‌وه‌ی كتێبخانه‌ی زانكۆی موسڵ، پاشان گه‌یشتنه‌ ئه‌وه‌ی به‌ هه‌زاران كتێبی رزگاربوو له‌ژێر خۆڵه‌مێش ده‌ربهێنن.

 

ئه‌وس ئیبراهیم یه‌كێك له‌خۆبه‌خشانی هه‌ڵمه‌تی "رزگاركه‌رانی كتێب" ده‌ڵێت: "ئاگاداریه‌كه‌مان له‌ په‌یجی "چاوی موسڵ" بینی‌و بڕیارماندا به‌شداربین له‌ چاككردنی ئه‌وه‌ی له‌توانادایه‌ چاكبكرێت، یه‌كه‌م جار رۆژی 27ی نیسانی رابردوو له‌به‌رده‌م كتێبخانه‌ی ناوه‌ندی یه‌كمان بینی‌و ئه‌و وێرانكارییه‌ی تێیدا بینیمان تۆقاندینی، كتێبه‌كان ببوونه‌ خۆڵه‌مێش".

 

دوای ئازادكردنی به‌ری چه‌پی شاری موسڵ له‌ده‌ستی داعش، ده‌نگێكی زۆر داوای ئاوه‌دانكردنه‌وه‌ی زانكۆكه‌یان كرد كه‌ یه‌كێكه‌ له‌ گرنگترین زانكۆكانی عێراق ئه‌ویش دوای ئه‌وه‌ی به‌هۆی بۆردومانی ئاسمانیه‌وه‌ دووچاری وێرانكارییه‌كی گه‌وره‌ هات، چونكه‌ چه‌كدارانی داعش كردبوویانه‌ باره‌گای سه‌ره‌كیان، له‌دوا ساتی شكسته‌كه‌شیاندا هه‌ندێك له‌ بیناكانیان سووتاند كه‌ كتێبخانه‌ی ناوه‌ندیشیان تێدابوو.

 

سه‌ره‌تا ئامانجی هه‌ڵمه‌ته‌كه‌ رێكخستنی چالاكی رۆشنبیری ساده‌ بوو له‌ زانكۆكه‌دا له‌ كاتێكدا شه‌ڕ له‌ به‌ره‌كه‌ی دیكه‌ی شاره‌كه‌ به‌رده‌وام بوو، ئه‌وس هه‌روه‌ها وتی: "پلانه‌كه‌ به‌ته‌واوی گۆڕا، چونكه‌ بیستمان كه‌ كتێب هه‌یه‌ نه‌سووتاون، دوای ئه‌وه‌ی دڵنیابووینه‌وه‌ له‌وه‌ی ته‌قه‌مه‌نی له‌ بیناكه‌دا نییه‌، چووینه‌ ناو كتێبخانه‌كه‌، سه‌ره‌تا هه‌موو شتێك سووتابوو، دوای گه‌ڕانیشمان بۆمان ده‌ركه‌وت كه‌ ژماره‌یه‌كی زۆر كتێب رزگاریان بووه‌".

 

 ژووری عه‌مه‌لیاتی "رزگاركه‌رانی كتێب" ژوورێكی گفوگۆیه‌ له‌ فه‌یسبووك كه‌ 23 ئه‌ندامی هه‌یه‌‌و له‌وێوه‌ كاتی كاركردن دیاری ده‌كرێت، به‌ڵام به‌رله‌وه‌ی پرۆسه‌ی رزگاركردنه‌كه‌ ده‌ست پێبكات تیمه‌كه‌ سه‌رقاڵی دۆزینه‌وه‌ی شوێنگره‌وه‌یه‌ك بوون بۆئه‌وه‌ی كتێبه‌ رزگاربووه‌كانی بۆ بگوازرێته‌وه‌، بۆیه‌ یاریگایه‌كی پێنج كه‌سی داخراوی تۆپی پێ ده‌ستنیشان كرا كه‌ پێشتر رێكخراوی داعش بۆ عه‌مباركردنی ئه‌و كه‌لوپه‌لانه‌ به‌كاری ده‌هێنا كه‌ له‌ هاووڵاتیانی مه‌ده‌نی زه‌وت ده‌كرد یان ئه‌وه‌ی له‌ دامه‌زراوه‌ گشتی‌و تایبه‌ته‌كانی ده‌دزی.

 

ئه‌وس هه‌ستی خۆی به‌م شێوه‌یه‌ وه‌سف ده‌كات‌و ده‌ڵێت: "یاریگاكه‌مان به‌باشی پاك كرده‌وه‌‌و ده‌ستمانكرد به‌ گواستنه‌وه‌ی كتێبه‌كان، ئێمه‌ وه‌كو ئه‌و رزگاركه‌رانه‌ وابووین كه‌ ده‌رفه‌تێكی نوێ بۆ ژیان ده‌ده‌نه‌وه‌ به‌ مرۆڤێكی به‌ مه‌رگ گه‌مارۆدراو له‌ژێر داروپه‌ردوودا".

 

كتێبه‌كانی نێو كتێبخانه‌ی ناوه‌ندی پێش كۆنترۆڵكردنی موسڵ له‌لایه‌ن داعشه‌وه‌ ده‌گه‌یشتنه‌ یه‌ك ملیۆن‌و هه‌موویان له‌ شه‌و‌و رۆژێكدا بوونه‌ خۆڵه‌مێش، هه‌مووان پێیان وابوو هیچ شتێك ده‌ربازی نه‌بووه‌، تا ئه‌و كاته‌ی تیمی "رزگاركه‌رانی كتێب" ئه‌نجامی هه‌ڵمه‌ته‌كه‌یان راگه‌یاند كه‌ بووه‌ته‌ مایه‌ی رزگاركردنی زیاتر له‌ 34 هه‌زار كتێب.

 

ئه‌ركی ئه‌م خۆبه‌خشانه‌ ته‌واو بووه‌، به‌ڵام هه‌ڵمه‌ته‌ گه‌وره‌كه‌ ئه‌ركێكی سه‌خت ده‌بێت كه‌ ئه‌ویش ئاوه‌دانكردنه‌وه‌ی كتێبخانه‌ی ناوه‌ندی‌و به‌شه‌كانی تری زانكۆكه‌یه‌، ئه‌مه‌ش پێویستی به‌ هه‌وڵێكی حكومی‌و پشتیوانی نێوده‌وڵه‌تی هه‌یه‌.

 

یه‌كه‌م تیپی موزیك له‌نێو جه‌نگدا

كتێك رزگاركه‌رانی كتێب هه‌ڵمه‌ته‌كه‌یان ده‌ستپێكرد چوار موزیسیان یاوه‌ریان كردن كه‌ به‌ ئازادییه‌كی زۆره‌وه‌ موزیكیان ده‌ژه‌نی، ئه‌مانه‌ پێش چه‌ند مانگێك به‌ نهێنی له‌ ماڵێكدا كۆده‌بوونه‌ بۆئه‌وه‌ی ئامێره‌ موزیكییه‌كانیان له‌ كیسه‌ ره‌شه‌كان ده‌ربهێنن‌و به‌ده‌نگێكی نزم ورته‌ورتێك بكه‌ن، ئه‌ویش بۆئه‌وه‌ی سه‌رنجی چه‌كدارانی رێكخراوه‌كه‌ رانه‌كێشن كه‌ پێشبینی ده‌كرا له‌هه‌ر ساتێكدا به‌ به‌رده‌م ماڵه‌كه‌دا تێبپه‌ڕن‌و ئیتر بكه‌ونه‌ به‌رده‌ستی قه‌سابی رێكخراوه‌كه‌.

 

سه‌ره‌تای تیپی "ژێیه‌كانی نركال" كه‌ له‌ مانگی ئازاری رابردوودا دامه‌زراندنی راگه‌یه‌ندرا، بۆ دیمه‌نه‌كانی خۆشاردنه‌وه‌‌و راهێنانی نهێنی ده‌گه‌ڕێته‌وه‌.

 

چوار گه‌نجی بیست ساڵان كه‌ ئه‌وانیش بریتین له‌ حه‌كه‌م‌و موسته‌فا كه‌ هه‌ردووكیان گیتارژه‌نن‌و خالید كه‌ عود ده‌ژه‌نێت‌و محه‌مه‌دی كه‌مانژه‌ن, ئه‌مانه‌ ئه‌ندامانی ئه‌و تیپه‌ن كه‌ به‌ یه‌كه‌م تیپی موزیك داده‌نرێت له‌دوای ئازادكردنی موسڵ له‌ ده‌ستی "داعش" پێكبهێنرێت.

 

محه‌مه‌د له‌باره‌ی هه‌لومه‌رجی كاركردنیان له‌سایه‌ی داعشدا به‌ "نیقاش"ی وت: "له‌ماوه‌ی حوكمڕانی رێكخراوه‌كه‌دا، من‌و خالیدی هاوڕێم یه‌كترمان ده‌بینی، به‌ده‌نگێكی نزم موزیكمان ده‌ژه‌نی هاوكات یه‌كێك له‌ هاوڕێیانمان له‌ ده‌ره‌وه‌ی ماڵه‌كه‌ چاودێری ره‌وشه‌كه‌ی ده‌كرد نه‌بادا ئه‌ندامانی حوسبه‌ بێن كه‌ به‌دوای سه‌رپێچكارانی رێنماییه‌كانیاندا ده‌گه‌ڕان. له‌نێو ئه‌و جه‌نگ‌و حاڵه‌تی كپكردنه‌ ته‌واوه‌دا به‌ كه‌مێك شادی رازی بووین، به‌ هیوای یه‌كتربینینمان له‌دوای دوو هه‌فته‌ی تر یان زیاتر، جیاده‌بووینه‌وه‌".

 

داعش موزیك‌و هونه‌ری به‌گشتی حه‌رام كردووه‌‌و ئه‌ندامه‌كانی له‌ سه‌ره‌تای كۆنترۆڵكردنی موسڵدا هه‌ڵمه‌تێكیان بۆ شكاندنی هه‌موو ئامێره‌ موزیكییه‌كان له‌ شاره‌كه‌ ئه‌نجام دا‌و ئه‌گه‌ر كه‌سێكیان ده‌ستگیربكردایه‌ موزیك بژه‌نێت ره‌نگه‌ سزاكه‌ی بگه‌یشتایه‌ته‌ كوشتن.

 

كاتێكیش ئۆپراسیۆنه‌كانی ئازادكردنی موسڵ له‌ تشرینی یه‌كه‌می 2016دا ده‌ستیانپێكرد، نه‌ده‌توانرا به‌ چرپه‌ش موزیك بژه‌نین، خه‌ڵك سه‌رقاڵی جه‌نگ بوون‌و هه‌موو هه‌وڵێكیان بۆ رزگاربوون بوو لێی، زۆر كه‌س گیانیان له‌ده‌ستدا‌و كه‌سانێكی دیكه‌ش موڵك‌و ماڵیان له‌ده‌ستچوو هاوكات هه‌ندێك ژه‌نیار ئامێره‌ موزیكییه‌كانیان له‌ده‌ست چوو.

 

ئه‌و گه‌نجانه‌ی تیپه‌كه‌یان دامه‌زراند هه‌ر زوو ئامێری نوێیان ده‌ستكه‌وت‌و دوای نزیكه‌ی مانگێك له‌ ئازادكردنی به‌ری چه‌پ تیپه‌كه‌ بۆ یه‌كه‌مجار كۆبووه‌وه‌، له‌وباره‌یه‌وه‌ حه‌كه‌می گیتارژه‌ن ده‌ڵێت: "ئێمه‌ یه‌كه‌م كه‌س بووین له‌ شه‌قامه‌كانی موسڵدا موزیك بژه‌نین، دوای ئه‌وه‌ له‌به‌رده‌م كتێبخانه‌ی ناوه‌ندیدا موزیكمان ژه‌ند كه‌ توندڕه‌وان سووتانیان، هه‌روه‌ها له‌ به‌رده‌م جه‌ماوه‌رێكی گه‌وره‌ی موسڵدا موزیكمان ژه‌ند له‌میانی پێشوازیكردن له‌ كاروانێك كه‌ 150 چالاكوانی له‌ به‌غدا‌و پارێزگاكانی دیكه‌وه‌ له‌خۆگرتبوو".

 

 دیاره‌ ژه‌نیاره‌ گه‌نجه‌كان هه‌رزوو سه‌رنجی خه‌ڵكیان بۆ خۆیان راكێشا، ئه‌وان به‌نزیكه‌یی ته‌نیا كه‌سن له‌ شاره‌كه‌‌و له‌ هه‌رشوێنێكدا موزیك بژه‌نن خه‌ڵك راده‌كێشن، بۆیه‌ ئه‌كادیمیای (Yes Academy) ئه‌مریكی بانگهێشتی كردن بۆ به‌شداریكردن له‌ به‌رنامه‌یه‌كی راهێنان له‌شاری هه‌ولێر، به‌هۆی لێهاتووییشیانه‌وه‌ "راسپارده‌"یان پێدرا كه‌ باشترین بڕوانامه‌یه‌ پرۆژه‌كه‌ بیداته‌ به‌شداربووان.

 

ئه‌م گه‌نجانه‌ له‌ هه‌وڵدان بۆ به‌دیهێنانی خه‌ونه‌ موزیكییه‌ گه‌وره‌كه‌یان‌و فراوانكردنی تیپه‌كه‌یان بۆ گه‌یاندنی په‌یامی هونه‌ر‌و ئاشتی له‌ شارێكه‌وه‌ كه‌ جه‌نگ‌و توندڕه‌وی وێرانیان كردووه‌. له‌وباره‌یه‌شه‌وه‌ حه‌كه‌م ده‌ڵێت: "ئێمه‌ ئه‌مڕۆ ئازادین، ئه‌وه‌ی له‌ تواناماندا بێت له‌پێناو په‌یامه‌كه‌ماندا ده‌یكه‌ین".

 

بازرگانی ئه‌نتیكه‌ دوای موسڵ به‌دوای شوێنگره‌وه‌دا وێڵه‌

دوور له‌ هه‌ڵمه‌ته‌ خۆبه‌خشانه‌كانی موسڵ، كه‌سێك له‌ چایخانه‌یه‌كی رۆشنبیر‌و هه‌نه‌رمه‌ندان له‌ ناوه‌ڕاستی به‌غدا دانیشتووه‌‌و جگه‌ره‌ ده‌كێشێت‌و هه‌موو كاته‌كانی به‌بێده‌نگی به‌سه‌رده‌بات، پێش ئه‌وه‌ی به‌ره‌و ماڵی جێگره‌وه‌ی بكه‌وێته‌ڕێ به‌ وێنه‌ی ئه‌و كه‌لوپه‌لانه‌ی له‌ موسڵ له‌دوای كۆنترۆڵكردنی له‌لایه‌ن داعشه‌وه‌ له‌ده‌ستی دابوون.

 

ئه‌و كه‌سه‌ مه‌حمود پاچه‌چی كه‌سایه‌تی سه‌رنجڕاكێشی موسڵه‌، ئه‌م پیاوه‌ ته‌مه‌ن چل ساڵانه‌یه‌ یه‌كێكه‌ له‌ گرنگترین فرۆشیارانی كه‌لوپه‌لی ئه‌نتیكه‌، له‌ شه‌و‌و رۆژێكدا خۆی به‌ ده‌ستبه‌تاڵی بینیه‌وه‌ ئه‌ویش دوای له‌ده‌ستدانی هه‌موو ئه‌و پارچانه‌ی له‌ماوه‌ی 13 ساڵدا كۆیكردبوونه‌وه‌.

 

پاچه‌چی به‌ "نیقاش"ی وت: "له‌ ساڵی 2003وه‌ ده‌ستمكرد به‌ كڕینی كه‌لوپه‌لی ئه‌نتیكه‌‌و كۆكردنه‌وه‌یان له‌ ماڵه‌كه‌مدا له‌ موسڵ كاتێك دامه‌زراوه‌كانی ده‌وڵه‌ت هه‌ره‌سیان هێنا‌و تاڵانی گه‌وره‌ هه‌موو شتێكی گرته‌وه‌، ئه‌وه‌ش له‌خۆڕا نه‌بوو، چونكه‌ ماڵی باوكم ژماره‌یه‌كی زۆر تابلۆ‌و كه‌لوپه‌لی فۆلكلۆری گرنگی تێدابوو".

 

روونیشیكرده‌وه‌ "ئه‌و كاره‌ له‌ ئاره‌زوویه‌كه‌وه‌ بووه‌ پیشه‌‌و ماڵه‌كه‌م قه‌ره‌باڵغ ببوو به‌ زیاتر له‌ 800 پارچه‌ كه‌لوپه‌لی هونه‌ری، ئیتر كێشه‌ له‌نێوان من هاوسه‌ركه‌مدا دروست بوو كه‌ ئه‌و ژماره‌ زۆره‌ی كه‌لوپه‌له‌كان بێزاری كردبوو تا ئه‌و راده‌یه‌ی له‌سه‌ر نووكی په‌نجه‌ ده‌ڕۆیشت له‌ترسی ئه‌وه‌ی نه‌بادا پێ به‌ په‌یكه‌رێك یان به‌ردێكی به‌نرخدا بنێت، بۆیه‌ دوكانێكم له‌ ناوه‌ڕاستی شاره‌كه‌ به‌كرێ گرت‌و كه‌لوپه‌له‌كانم بۆ گواسته‌وه‌".

پاچه‌چی خوێندنی دواناوه‌ندی ته‌واو نه‌كردووه‌، به‌ڵام وه‌ك هه‌ر رۆشنبیرێكی ئاگادار قسه‌ ده‌كات كه‌ بایه‌خ به‌ پسپۆرییه‌كه‌ی ده‌دات، شتێكی سه‌یری دیكه‌ش ئه‌وه‌یه‌ كه‌ ئه‌و دوو كار‌و پیشه‌ی ته‌واو جیاوازی كردووه‌، چونكه‌ كارمه‌ندی پۆلیسی عێراق بوو له‌ بازه‌گه‌كانی پشكنین له‌ به‌غدا جێگربوو، ماوه‌ی مۆڵه‌ته‌كانیشی له‌ دوكانی ئه‌نتیكه‌كانی له‌ موسڵ به‌سه‌ر ده‌برد كه‌ تێیدا چاوی به‌ زۆرێك له‌ هونه‌رمه‌ند‌و ده‌سته‌بژێری رۆشنبیر ده‌كه‌وت.

 

ئه‌و وه‌ك خۆی وه‌سفی ده‌كات، كه‌لوپه‌لی ناوازه‌ی گرنگی هه‌بووه‌، ئاسان ده‌یكڕین‌و زۆر به‌قورسیش ده‌یفرۆشتن، چونكه‌ قه‌ره‌بووكردنه‌وه‌ی هه‌ر پارچه‌یه‌ك به‌لای ئه‌وه‌وه‌ زۆر سه‌خت بووه‌. له‌ كۆتاییشدا موسڵ كه‌وته‌ ده‌ستی رێكخراوی داعش‌و ئه‌ویش 2000 پارچه‌ كه‌لوپه‌لی هونه‌ری‌و سه‌دان تابلۆ‌و وێنه‌‌و فه‌رشی هه‌بوو.

 

پاچه‌چی ده‌ڵیت: "ئه‌و رۆژه‌ له‌ به‌غدا بووم، هاوسه‌ره‌كه‌م ته‌له‌فۆنی بۆكردم‌و تۆقیبوو، چونكه‌ چه‌كدارانی رێكخراوه‌كه‌ له‌ ناوچه‌كه‌مان نزیك ببوونه‌وه‌، داوام لێكرد منداڵه‌كان له‌گه‌ڵ خۆی ببات‌و ده‌ستبه‌جێ هه‌ڵبێن، هه‌موو شتێكمان له‌دوای خۆمان به‌جێهێشت‌و ته‌نیا گرنگ ئه‌وه‌بوو خۆمان رزگار بكه‌ین، دواتریش بیر له‌ كه‌لوپه‌له‌ به‌نرخه‌كانم بكه‌مه‌وه‌، بۆیه‌ دواتر په‌یوه‌ندیم به‌ هاوڕێكانمه‌وه‌ كرد تا بزانم چیان به‌سه‌ر هاتووه‌".

 

هه‌روه‌ها وتی: "ئه‌ندامانی رێكخراوه‌كه‌ ماڵه‌كه‌میان به‌هه‌موو پارچه‌ هونه‌رییه‌ گرنگه‌كانیه‌وه‌ دزی‌و دواتر هه‌ڵیانكوتایه‌ سه‌ر دوكانه‌كه‌م‌و ئه‌ویشیان دزی، به‌ڵام زۆر پارچه‌ هه‌بوون به‌هاكه‌یان نه‌ده‌زانی‌و چاوه‌ڕوانی ئازادكردنم ده‌كرد تا بگه‌ڕێمه‌وه‌ بۆلایان‌و جارێكی تر ئه‌و جیهانه‌ بچووكه‌ به‌ده‌ستبهێنمه‌وه‌ كه‌ پڕبوو له‌ تابلۆ‌و په‌یكه‌ر‌و كه‌لوپه‌لی ناوازه‌‌و شتی دیكه‌".

 

پاچه‌چی بێ دوودڵی دان به‌ نائومێدبوونه‌ گه‌وره‌كه‌یدا ده‌نێت سه‌باره‌ت رووداوه‌كانی موسڵ‌و ده‌ڵێت: "دووربینێكی ده‌ریاییم هه‌بوو بڕیارم دابوو بیكه‌مه‌ دیاری تا له‌سه‌ر گردی یونس پێغه‌مبه‌ر دابنرێت بۆ ته‌ماشاكردنی جوانی موسڵ، به‌ڵام ئه‌وه‌ی روویدا خه‌ونه‌كه‌ی له‌ناوبردم".

 

هه‌روه‌ها ده‌ڵێت: "هه‌وڵمدا كارێكی ناوازه‌ بكه‌م، به‌ڵام ته‌نیا ئه‌مه‌ له‌ پرۆژه‌كه‌م ماوه‌ته‌وه‌" ئاماژه‌ به‌ فایلێكی وێنه‌یی ده‌كات به‌ده‌ستیه‌وه‌ تێیدا ئه‌و وێرانكاریه‌ی دۆكیۆمێنت كردووه‌ كه‌ به‌ر دوكانه‌كه‌ی كه‌وتووه‌‌و به‌هۆكاری ئۆپراسیۆنه‌ سه‌ربازییه‌كان رووخاوه‌‌و به‌ته‌واوی دزراوه‌ به‌رله‌وه‌ له‌ 10ی ته‌مموزی رابردوودا ئازادكردنی شاره‌كه‌ رابگه‌یه‌ندرێت.

 

ئه‌و بۆ ته‌ئكیدكردنه‌وه‌ سه‌ری ده‌له‌قێنێت‌و ده‌ڵێت: "تائێستاش نامه‌وێت ئامرازی برینداركه‌ر هه‌ڵبگرم چه‌نده‌ به‌های هونه‌ریشی هه‌بێت، من پۆلیسم، به‌ڵام رقم له‌ چه‌قۆیه‌، حه‌زم به‌ هونه‌ر‌و ئاشتیه‌".

 

ئه‌م پیاوه‌ هه‌ست ناسكه‌ هه‌وڵده‌دات جیهانێكی دیكه‌ له‌ به‌غدا بۆخۆی بدۆزێته‌وه‌، له‌به‌رئه‌وه‌ی ئاره‌زووه‌كه‌شی له‌ناو خوێنیدایه‌ بۆیه‌ هه‌رزوو دیواره‌كانی ماڵه‌ جێگره‌وه‌كه‌ی پڕبوون له‌ تابلۆ‌و كه‌لوپه‌ی ناوازه‌، له‌وباره‌یه‌شه‌وه‌ ده‌ڵێت: "حه‌زم له‌ دیواری به‌تاڵ نییه‌".

 

پێده‌چێت پاچه‌چی پشتی له‌شاره‌كه‌ی كردبێت، ئه‌و دووكه‌ڵی به‌ره‌و سه‌ره‌وه‌ ده‌رده‌كێشا‌و چاوی داخستبو‌و وتی: "سه‌ره‌تا پێویسته‌ موزیك بگه‌ڕێته‌وه‌ بۆ موسڵ‌و هونه‌رمه‌ند‌و سه‌ماكار‌و راگوێزراوانیش به‌تایبه‌تی كه‌مایه‌تییه‌ ئایینی‌و نه‌ته‌وه‌ییه‌كان بگه‌ڕێنه‌وه‌، ئه‌وكاته‌ منیش ده‌گه‌ڕێمه‌وه‌".

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌