راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

نه‌شمیله‌ی‌ چاوجوان په‌چه‌كه‌ت لاده‌
په‌چه‌ بۆ ژنانی‌ ئه‌نبار بووه‌ته‌ مایه‌ی‌ ده‌رده‌سه‌ری‌

که‌مال عه‌یاش
جاران په‌چه‌ له‌ناو ژنانی‌ ئه‌نباردا به‌شێوه‌یه‌كی‌ به‌ربڵاو هه‌بوو، به‌ڵام له‌دوای‌ ئازادكردنی‌ شاره‌كان له‌ده‌ست داعش، ورده‌ ورده‌ خه‌ریكه‌ به‌ته‌واوی‌ باوی‌ نامێنێت.
25.08.2016  |  ئه‌نبار
بۆ ئه‌وه‌ی‌ گومانیان له‌سه‌ر نه‌بێت، ژنانی‌ ئه‌نبار په‌چه‌كانیان لاده‌به‌ن ( :وێنه بيتر ماكديارمد)
بۆ ئه‌وه‌ی‌ گومانیان له‌سه‌ر نه‌بێت، ژنانی‌ ئه‌نبار په‌چه‌كانیان لاده‌به‌ن ( :وێنه بيتر ماكديارمد)

كۆمه‌ڵگای‌ ئه‌نبار به‌هۆی‌ پێكهاته‌ی‌ كۆمه‌ڵایه‌تی‌‌و ئاینیه‌وه‌ كراوه‌ نییه‌، به‌ڵام ناچاركردنی‌ ژنانی‌ پارێزگاكه‌ له‌لایه‌ن داعشه‌وه‌ بۆ ئه‌وه‌ی‌ به‌زۆر په‌چه‌ (نیقاب) بپۆشن، ئه‌نجامێكی‌ پێچه‌وانه‌ی‌ لێكه‌وته‌وه‌و ئێستا ئه‌وانه‌شی‌ به‌ر له‌داعش ده‌موچاویان ده‌شارده‌وه‌، په‌چه‌كانیان فڕێداوه‌.

 

دایكی‌ ناسر یه‌كێكه‌ له‌ژنه‌ باڵاپۆشه‌كانی‌ ئه‌نبار، كاتێك داعش هات ناچاركرا په‌چه‌ ببه‌ستێت، هه‌رچه‌ند به‌هۆی‌ نه‌خۆشی‌ ره‌بۆوه‌ بۆ ئه‌و زیانی‌ زۆر بوو، ته‌نانه‌ت داعش ره‌نگ‌و جۆرو ئه‌ستوری‌ نیقابه‌كه‌ی‌ بۆ دیاری‌ كردبوون.

 

دایكی‌ ناسر به‌"نیقاش"ی‌ وت "كه‌ ده‌چوومه‌ ده‌ره‌وه‌ به‌هۆی‌ نه‌خۆشییه‌كه‌مه‌ گیرۆده‌ ده‌بووم‌و به‌زه‌حمه‌ت هه‌ناسه‌م بۆ ده‌درا، كاتێكیش په‌مپی‌ هه‌ناسه‌دانم به‌كارده‌هێنا، یه‌كسه‌ر كه‌سێكی‌ سه‌ر به‌داعش هاواری‌ ده‌كرد حاجی‌ خۆت داپۆشه‌".

 

ده‌شڵێت "له‌وه‌ته‌ی‌ له‌داعش رزگارمان بووه‌ هه‌ست ده‌كه‌م له‌زیندان به‌ربوین، داعش وای‌ لێكردبووین هیچ ژنێك ئه‌وی‌ تری‌ نه‌ده‌ناسیه‌وه‌".

 

لابردنی‌ په‌چه‌ ته‌نها به‌هۆی‌ ده‌ربازبوون نییه‌ له‌ده‌ستی‌ داعش، به‌ڵكو زۆر ژن بۆ ئه‌وه‌ی‌ گومانیان نه‌چێته‌ سه‌رو له‌خاڵه‌كانی‌ پشكنین تووشی‌ سه‌رئێشه‌ نه‌بن، په‌چه‌كه‌یان لابردووه‌.

 

مونز كوبه‌یسی‌ كه‌ دانیشتوی‌ ناوچه‌ی‌ خه‌زرای‌ خۆرئاوای‌ به‌غدایه‌، پێنج ساڵ له‌مه‌وبه‌ر كه‌ ژنی‌ هێنا مه‌رجی‌ ئه‌وه‌ی‌ بوو ژنه‌كه‌ی‌ په‌چه‌ بپۆشێت، به‌ڵام ئێستا ده‌ستبه‌رداری‌ ئه‌و داوایه‌ بوو، به‌"نیقاش"ی‌ وت "په‌چه‌ هیچ سوودێكی‌ نه‌ماوه‌، ده‌بێت رووخساری‌ نیشانی‌ هه‌موو پۆلیس‌و سه‌ربازێكی‌ خاڵه‌كانی‌ پشكنین بدات".

 

ده‌ڵێت "كاتێك له‌رومادی‌ هاتینه‌ ده‌ره‌وه‌ له‌سه‌رده‌می‌ داعش، هیچ پیاوێكی‌ هێزه‌ ئه‌منییه‌كان نه‌ما روخساری‌ ژنه‌كه‌م نه‌بینێت، له‌كاتێكدا له‌وه‌ته‌ی‌ هێناومه‌ براكانیشم روخساریان نه‌بینیوه‌، هه‌ر پیاوێكی‌ ئه‌منی‌ به‌ ژنه‌كه‌می‌ ده‌وت په‌چه‌كه‌ت هه‌ڵبده‌ره‌وه‌ رووگیر ده‌بووم، به‌تایبه‌تی‌ له‌به‌رچاوی‌ منداڵه‌كانم، كه‌ گه‌یشتینه‌ نزیك به‌غدا وتم ته‌واو په‌چه‌كه‌ت لاببه‌، ئه‌وا ساڵێكه‌ بێ په‌چه‌ ده‌سوڕێته‌وه‌".

 

هه‌ندێك له‌كچان‌و ژنانی‌ تری‌ به‌هۆی‌ جیاكاریان له‌ناو كۆمه‌ڵگا ده‌ستبه‌رداری‌ نیقابه‌كه‌یان بوون، شه‌هد عه‌بدوڵا یه‌كێكه‌ له‌وانه‌ كه‌ ئێستا خوێندكاری‌ كۆلێژی‌ زانستی‌ زانكۆی‌ به‌غدایه‌.

 

شه‌هد به‌"نیقاش"ی‌ وت "كاتێك له‌ئاماده‌یی‌ بووم له‌ناوچه‌ی‌ سه‌قڵاوییه‌ په‌چه‌م پۆشی‌، به‌ڵام كه‌ هاتمه‌ به‌غدا ئه‌وه‌نده‌ خه‌ڵك وتیان ئه‌م داماوه‌ ئه‌نبارییه‌، ناچار په‌چه‌كه‌م لابرد".

 

كێشه‌ی‌ په‌چه‌ له‌م رۆژگاره‌دا ئه‌وه‌یه‌ ته‌نها ئه‌وانه‌ نایپۆشن كه‌ بڕوایان پێیه‌تی‌، به‌ڵكو زۆرێك له‌تاوانبارو داواكراوه‌كان له‌ژێر په‌چه‌دا خۆیان ئه‌شارنه‌وه‌.

 

ئه‌حمه‌د به‌درانی‌ كه‌ شۆفێرێكی‌ تاكسییه‌ به‌"نیقاش"ی‌ وت "هه‌شت ساڵ بوو ژنه‌كه‌م په‌چه‌ی‌ ده‌پۆشی‌، به‌ڵام له‌دوو ساڵی‌ رابردوودا سه‌رئێشه‌ی‌ زۆرمان بۆ دروست بوو، به‌تایبه‌تی‌ له‌كاتی‌ گه‌شت كردن‌و سه‌ردانی‌ فه‌رمانگه‌ حكومییه‌كان، هه‌موو جارێك له‌خاڵه‌كانی‌ پشكنینیش ده‌بوو به‌ده‌نگه‌ ده‌نگمان، تا ساڵێك له‌مه‌وبه‌ر به‌یه‌كجاری‌ ژنه‌كه‌م بڕیاریدا په‌چه‌كه‌ی‌ لاببات".

 

ده‌شڵێت "من دڵخۆشم به‌م بڕیاره‌، به‌تایبه‌تی‌ كه‌ زۆر ژن به‌هۆی‌ ناوبانگی‌ خراپیانه‌وه‌ خۆیان له‌ژێر په‌چه‌دا شاردووه‌ته‌وه‌، كاتێكیش كه‌ به‌ته‌نها ده‌چوینه‌ ده‌ره‌وه‌، خه‌ڵك به‌شێوه‌یه‌كی‌ نامۆ سه‌یریان ده‌كردین".

 

له‌به‌رامبه‌ر ئه‌مانه‌دا چه‌ندین ژنیش هه‌ن كه‌ هێشتا ده‌ستیان به‌هێشتنه‌وه‌ی‌ په‌چه‌كه‌یانه‌وه‌ گرتووه‌و پێیان وایه‌ ئه‌ركێكی‌ ئاینییه‌ نابێت ده‌ستبه‌رداری‌ ببن.

 

دایكی‌ عه‌بدوڵا ژنێكی‌ چل ساڵه‌و ده‌ ساڵ ده‌بێت په‌چه‌ی‌ پۆشیوه‌، به‌"نیقاش"ی‌ وت "بنه‌مایه‌كی‌ فیقهی‌ هه‌یه‌ كه‌ ده‌ڵێت پێویستی‌ وا ده‌كات ده‌ستبه‌رداری‌ هه‌ندێ‌ قه‌ده‌غه‌كراو ببیت، له‌سه‌ر ئه‌و بنه‌مایه‌ش ده‌بێت هاوكاری‌ هێزه‌ ئه‌منییه‌كان بین، به‌ڵام من ده‌ستبه‌رداری‌ په‌چه‌كه‌م نابم".

 

ده‌شڵێت "من له‌بواری‌ بازرگانی‌ جل‌و به‌رگی‌ ژنانه‌ كارده‌كه‌م‌و هه‌فتانه‌ ده‌چمه‌ به‌غداو كه‌ركوك، له‌رێگا چه‌ندین خاڵی‌ پشكنین هه‌ن، زۆربه‌یان داوا ده‌كه‌ن له‌به‌شی‌ ژنان بپشكنرێم، منیش به‌لامه‌وه‌ ئاساییه‌و نایكه‌مه‌ كێشه‌".

 

جاران ئاسان نه‌بوو كه‌سێك له‌ئه‌نبار باس له‌لابردنی‌ په‌چه‌ بكات، به‌ڵام ئه‌مڕۆ هه‌موو كه‌سێك ده‌توانێت داوا له‌ژنێكی‌ په‌چه‌دار بكات په‌چه‌كه‌ی‌ لاببات، له‌نێوان ئه‌وانه‌شدا شۆفێری‌ تاكسییه‌كان.

 

موسته‌فا دلێمی‌ شۆفێری‌ تاكسییه‌ به‌"نیقاش"ی‌ وت "كاتێك ژنێكی‌ په‌چه‌دار له‌گه‌ڵمدا سه‌رده‌كه‌وێت ئه‌زانم به‌هۆی‌ رێوشوێنه‌ ئه‌منییه‌كانه‌وه‌ ماوه‌ی‌ گه‌یشتنم ده‌بێته‌ دوو ئه‌وه‌نده‌، بۆیه‌ داوایان لێده‌كه‌م په‌چه‌كه‌یان لاببه‌ن، هه‌رچه‌نده‌ زۆرجار هه‌وڵه‌كه‌م شكست ده‌هێنێ‌".

 

ده‌شڵێت "هه‌ندێ‌ په‌چه‌ پۆش هه‌ن ده‌زانن چۆن مامه‌ڵه‌ له‌گه‌ڵ رێوشوێنه‌ ئه‌منییه‌كاندا بكه‌ن‌و له‌لای‌ جامی‌ ئۆتۆمبێله‌كه‌وه‌ داده‌نیشن، به‌ر له‌گه‌یشتن به‌خاڵێكی‌ پشكنین په‌چه‌كه‌یان لاده‌به‌ن، بێ‌ ئه‌وه‌ی‌ كه‌سی‌ تر روخساریان ببینێ‌".

 

ئه‌وه‌ی‌ ژنانی‌ ئه‌نبار ده‌یكه‌ن جا ئه‌گه‌ر له‌كاردانه‌وه‌دا بێت یان بۆ ئه‌وه‌ی‌ تووشی‌ سه‌رئێشه‌ی‌ ئه‌منیان نه‌كات، وایكردووه‌ به‌ته‌واوه‌تی‌ په‌چه‌پۆش له‌و پارێزگایه‌ كه‌م ببێته‌وه‌و ورده‌ ورده‌ به‌ره‌و ئه‌وه‌ ئه‌چێت ببێت به‌به‌شێك له‌رابردوو.

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌