راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

چیرۆكه‌كانی پێكه‌وه‌ژیان له‌موسڵ
په‌یوه‌ندی نائاسایی دوو ژنی مسوڵمان‌و مه‌سیحی به‌به‌رچاوی داعشه‌وه‌

تایبه‌ت
چیرۆكی ئوم ساڵح‌و رافیده‌ین شایانی ئه‌وه‌یه‌ هیلاكی سه‌فه‌ری به‌غدا بۆ موسڵی بۆ بكێشیت تا ده‌گه‌یته‌ ناوچه‌یه‌ك كه‌ ناوبه‌ناو ده‌كه‌وێته‌وه‌ به‌ر ئاگری موشه‌كه‌كانی داعش.
13.07.2017  |  موسڵ

په‌یوه‌ندیم به‌ئوم ساڵحه‌وه‌ كرد‌و رێككه‌وتین له‌سه‌ر ئه‌وه‌ی له‌كامپی (500) له‌ناوچه‌ی حه‌مام عه‌لیل له‌باشووری موسڵ كه‌ له‌وێ ئاواره‌ن، یه‌كتر ببینین، به‌ڵام خراپی گوزه‌ران له‌وێ وایكرد ئوم ساڵح بگوازێته‌وه‌ بۆ خانوویه‌كی بچووك له‌ناوچه‌ی موسڵی نوێ، بۆ ئه‌وه‌ی بگه‌مه‌ خانووه‌كه‌ش ده‌بووایه‌ سواری چوار ئۆتۆمبێل ببم كه‌ یه‌كێكیان پاسێكی سه‌ربازی بوو بۆ گواستنه‌وه‌ی ئاواره‌كان ته‌رخان كرابوو.

 

كچێكی مه‌سیحی كلدانی سه‌رقاڵی دانوستانێكی دوورودرێژه‌ له‌گه‌ڵ خێزانێكی مسوڵماندا، جارێك به‌ته‌نیا له‌گه‌ڵ ئوم ساڵح قسه‌ ده‌كات تا باوه‌ڕی پێبهێنێت‌و جارێكی دیكه‌ش له‌گه‌ڵ باوك‌و كوڕه‌كاندا "پێویسته‌ بگوازنه‌وه‌ بۆ خانوویه‌كی ته‌نیشتی من، پێتان راهاتووم‌و ناتوانم لێتان جیاببمه‌وه‌".

 

من شایه‌تحاڵی ئه‌و گفتوگۆیه‌ بووم كه‌ له‌شوقه‌یه‌كی بچووك له‌به‌ری راستی شاری موسڵ به‌ڕێوه‌چو‌و زۆر له‌و شه‌ڕه‌ سه‌خته‌وه‌ دوور نه‌بوو كه‌ له‌نێوان هێزه‌ عێراقییه‌كان‌و رێكخراوی توندڕه‌وی داعشدا له‌ئارادا بوو.

 

ئه‌و كچه‌ مه‌سیحیه‌ كه‌ ناوی رافیده‌ینه‌‌و ته‌مه‌نی 43 ساڵه‌، چیرۆكێكی پڕ له‌سه‌ركێشی هه‌یه‌، ئه‌و كاته‌ ده‌ستیپێكرد كه‌ به‌یانی رۆژی 19ی ته‌مموزی 2014 له‌خانووه‌كه‌ی خۆی له‌به‌ری راست له‌خه‌و هه‌ستا‌و خۆی له‌به‌رده‌م دوو بژارده‌دا بینیه‌وه‌ كه‌ یه‌ك له‌یه‌كتر تاڵتر بوون، یان ئه‌وه‌تا واز له‌ئایینه‌كه‌ی ده‌هێنێت‌و ده‌بێته‌ موسڵمان یان ده‌كوژرێت، ئه‌ویش دوای ته‌واوبوونی ئه‌و مۆڵه‌ته‌ی رێكخراوه‌كه‌ له‌و كاته‌دا پێی دابوون، كه‌ (72) سه‌عات بوو.

 

به‌ر له‌كۆتاییهاتنی مۆڵه‌ته‌كه‌ هه‌زاران مه‌سیحی شاره‌كه‌یان به‌ره‌و ده‌شتی نه‌ینه‌وا‌و هه‌رێمی كوردستان به‌جێهێشت، ته‌نیا ده‌یانیان له‌موسڵ مانه‌وه‌‌و هه‌ر یه‌كه‌‌و پاساوی خۆی هه‌بوو، سه‌باره‌ت به‌رافیده‌ین (43 ساڵ) ئاگاداری بڕیاره‌كانی داعش نه‌بوو له‌دژی مه‌سیحیه‌كان، چونكه‌ به‌ته‌نیا ده‌ژیا‌و مۆبایله‌كه‌یشی داخرابوو، ئیتر له‌و رۆژه‌وه‌ رووبه‌ڕووی بارودۆخێكی ناهه‌موار بووه‌وه‌ به‌هۆی هه‌راسانكردنه‌كانی ئه‌ندامی رێكخراوه‌كه‌‌و هه‌ستكردنی به‌ته‌نیایی، تا ئه‌و كاته‌ی ئوم ساڵحی بینی ئیتر ژیانی به‌ته‌واوی گۆڕا.

 

ئوم ساڵحیش (45 ساڵ) ژنێكی موسڵمانه‌‌و له‌بارودۆخێكی كاره‌ساتاویدا ژیاوه‌ پاش ئه‌وه‌ی رێكخراوه‌كه‌ له‌و خانووه‌ ده‌ریكرد كه‌ خۆی‌و خێزانه‌كه‌ی بۆ ماوه‌ی زیاتر له‌ 13 ساڵ تێیدا نیشته‌جێ بوون، پاشان كردیانه‌ وه‌رشه‌یه‌ك بۆ بۆمبڕێژكردن‌و عه‌مبارێك بۆ چه‌ك‌و جبه‌خانه‌، بۆیه‌ ئوم ساڵح رووی كرده‌ گه‌ڕه‌كی مه‌نسور له‌باشووری شاره‌كه‌‌و له‌خانوویه‌كی ته‌نیشت خانووه‌كه‌ی رافیده‌یندا نیشته‌جێبوو.

 

چاوه‌كان چاودێری ده‌كه‌ن‌و ده‌ستیش بۆ یارمه‌تی درێژكراوه‌

رافیده‌ین له‌خانوویه‌كی بچووكدا له‌ناوچه‌ی موسڵی نوێ كه‌ ئێستا له‌گه‌ڵ ئوم ساڵح‌و خێزانه‌كه‌یدا له‌دوای گه‌ڕانه‌وه‌یان له‌كامپه‌كانی ئاواره‌یی تێیدا ده‌ژین، قسه‌ی بۆ كردین‌و وتی "زانیم كه‌ دراوسێی نوێمان بۆ هاتووه‌، سه‌ره‌تا لێیان سڵه‌میمه‌وه‌، چونكه‌ له‌وه‌ ده‌ترسام كوڕه‌كانیان سه‌ر به‌داعش بن، له‌به‌رئه‌وه‌ی شێوه‌یان ئاماژه‌ی ئه‌وه‌ی تێدا بوو، ویستم دڵنیاببمه‌وه‌، بۆیه‌ زیاتر له‌جارێك سه‌ردانم كردن تا بۆم ده‌ركه‌وت كه‌سانی بێوه‌ی‌و زۆر باشن".

 

پێناچێت رافیده‌ین ئه‌و رۆژه‌ سه‌ختانه‌ له‌یاد بكات كه‌ له‌سایه‌ی حوكمی داعشدا تێیدا ژیا، چونكه‌ به‌ته‌نیا مابووه‌وه‌‌و هیچ شتێكی له‌ده‌ست نه‌ده‌هات جگه‌ له‌فێڵكردن بۆ مانه‌وه‌ له‌ژیاندا، بۆیه‌ خێزانێكی مه‌سیحی له‌وانه‌ی له‌موسڵدا مابوونه‌وه‌ هاندا بۆئه‌وه‌ی یاوه‌ری بكه‌ن بۆ یه‌كێك له‌دادگاكانی رێكخراوه‌كه‌ تا ژیانی خۆیان بپارێزن، ئه‌ویش دوای ئه‌وه‌ی مه‌سه‌له‌ی چوونه‌ده‌ره‌وه‌یان له‌شاره‌كه‌ ببووه‌ كارێكی مه‌حاڵ.

 

رافیده‌ به‌ده‌م راكێشانی حیجابه‌كه‌یه‌وه‌ كه‌ كه‌مێك به‌سه‌ریدا هاتبووه‌ خواره‌وه‌، وتی "له‌وێ مسوڵمانبوونی خۆمان راگه‌یاند به‌شێوه‌یه‌كی رووكه‌ش تا له‌ده‌ستی ئه‌و توندڕه‌وانه‌ رزگارمان بێت، من نه‌ترسام، به‌ڵام هاوڕێكانم له‌ترساندا له‌به‌رده‌م دادوه‌ره‌ ریشنه‌ قسه‌ڕه‌قه‌كه‌دا ده‌له‌رزین. له‌راستیدا ئێمه‌ یاریمان به‌ئاگر ده‌كرد‌و هه‌ر هه‌ڵه‌یه‌ك بۆی هه‌بوو ببێته‌ هۆی ئه‌وه‌ی له‌سه‌رمان بده‌ن".

 

به‌دوور‌ودرێژی باسی هه‌راسانكردنه‌كانی رێكخراوه‌كه‌ی كرد كه‌ چۆن جارێكیان حه‌سبه‌ ده‌ستگیریان كردووه‌ له‌به‌ر ئه‌وه‌ی نیقابی نه‌پۆشیوه‌، هه‌روه‌ها به‌گاڵته‌پێكردنه‌وه‌ی ئه‌و رۆژه‌شی به‌بیر هێنایه‌وه‌ كه‌ یه‌كێك له‌ئه‌میره‌كانی داعش داوای لێكردووه‌ شووی پێ بكات: "ماره‌ی كردم، به‌ڵام من ره‌تمكرده‌وه‌، نه‌ئه‌میرم ده‌وێت نه‌سه‌میر" هه‌مووان به‌و قسه‌یه‌ی پێكه‌نین ته‌نانه‌ت ئه‌بو ساڵحیش كه‌ پیاوێكی هێمن بوو، وادیاره‌ له‌سه‌ر ئه‌و شێوازه‌ گاڵته‌ئامێزه‌ی راهاتبوون.

 

ئوم ساڵح ده‌ستپێشخه‌ری كرد بۆ ته‌واوكردنی چێرۆكه‌كه‌‌و وتی "رافیده‌ینم له‌بیره‌ له‌یه‌كه‌م دیدارماندا، لاواز‌و روخسار زه‌ردهه‌ڵگه‌ڕا‌و بوو به‌هۆی ئه‌و باره‌ ده‌روونییه‌ خراپه‌ی تێیكه‌وتبوو، ترسابوو، به‌هه‌ر هۆكارێك راده‌چڵه‌كی، زۆر به‌زه‌ییم پێیدا هاته‌وه‌ له‌به‌رئه‌وه‌ی مه‌سیحی‌و ته‌نیاش بوو، بۆیه‌ پێم وت ئێمه‌ كه‌سوكاری تۆین كه‌ی ویستت وه‌ره‌ بۆ لامان، وه‌ك دایكی خۆتم دابنێ ئه‌گه‌رچی ته‌مه‌نیشمان نزیكه‌ له‌یه‌كه‌وه‌، هه‌ر واش بووم بۆی".

 

له‌و كاته‌دا چاوه‌كانی داعش چاودێری ئه‌و مه‌سیحیانه‌یان ده‌كرد كه‌ له‌موسڵ مابوونه‌وه‌ له‌دوای راگه‌یاندنی موسڵمان بوونیان، له‌كاتێكدا ئه‌م ژنه‌ زۆربه‌ی كاتی له‌ماڵی دراوسێ نوێیه‌كه‌یدا به‌سه‌ر ده‌برد، له‌گه‌ڵ ئه‌وان نان‌و ئاوی ده‌خوارد‌و ته‌نیا بۆ نوستن ده‌گه‌ڕایه‌وه‌ ماڵه‌وه‌.

 

ئوم ساڵح كه‌ روخساری پڕبووه‌ له‌چرچ‌و لۆچی‌و هێشتا گه‌نجیشه‌، ده‌ڵێت "ئه‌و له‌ماڵی ئێمه‌ هه‌ستی به‌دڵنیایی ده‌كرد، چونكه‌ خزمه‌كانی سه‌ردانیان نه‌ده‌كرد‌و به‌وه‌ تۆمه‌تباریان ده‌كرد كه‌ بووه‌ته‌ موسوڵمان تا شوو به‌پیاوێكی موسڵمان بكات، به‌ڵام ئێمه‌ راستیه‌كه‌مان ده‌زانی، چونكه‌ ئه‌و وازی له‌ئایینه‌كه‌ی نه‌هێنابو‌و موسڵمانبوونی راگه‌یاندبوو ته‌نیا بۆئه‌وه‌ی پارێزگاری له‌ژیانی خۆی بكات، ئێمه‌ش سوێندمان بۆ ده‌خوارد كه‌ موسڵمانه‌، ئه‌گه‌ر داعش به‌وه‌ی بزانیایه‌ ده‌یانكوشت‌و ئێمه‌شیان له‌گه‌ڵدا ده‌كوشت".

 

كاتێكیش ژیان له‌موسڵ سه‌خت بوو، ئه‌م دوو ژنه‌ زیاتر هۆگری یه‌ك بوون‌و له‌شوباتی رابردووشدا ئۆپراسیۆنه‌كانی ئازادكردنی به‌ری راست ده‌ستانپێكرد‌و برسێتی له‌شاره‌كه‌دا گه‌یشتبووه‌ ئه‌وپه‌ڕی، بۆیه‌ رافیده‌ین ناچار بوو خانووه‌كه‌ی به‌جێبهێڵێت‌و له‌گه‌ڵ دراوسێكانیدا بژی.

 

ئوم ساڵح به‌كاریگه‌ریه‌وه‌ وه‌سفی ئه‌و شه‌وه‌ ترسناكانه‌ ده‌كات‌و ده‌ڵێت "موشه‌ك وه‌ك باران به‌سه‌ر گه‌ڕه‌كه‌كه‌دا ده‌باری، من‌و رافیده‌ین‌و كچه‌كه‌م له‌ژوورێك ده‌نووستین‌و مێرده‌كه‌م‌و منداڵه‌كانی دیكه‌شم له‌ژوورێكی دیكه‌، هه‌ر كه‌ ده‌نگی ته‌قینه‌وه‌یه‌ك ده‌هات رافیده‌ین به‌توندی ده‌ستێكی ده‌گرتم، هه‌روه‌ها كچه‌كه‌شم ده‌سته‌كه‌ی دیكه‌ی ده‌گرتم. بارودۆخ خراپتر بوو، بۆیه‌ وای لێهات هه‌موومان له‌یه‌ك ژووردا ده‌نوستین، شه‌ومان به‌سه‌ر ده‌برد‌و ده‌ستی یه‌كترمان گرتبوو، چه‌ند دۆعایه‌كمان له‌قورئان ده‌خوێند‌و ئه‌ویش له‌به‌ر خۆیه‌وه‌ چه‌ند وشه‌یه‌كی له‌ئینجیل ده‌وته‌وه‌".

 

خێزانه‌كه‌ دابه‌شبوو، باوكه‌كه‌‌و دوو له‌كوڕه‌كانی به‌رگه‌ی ئه‌و بارودۆخه‌یان نه‌گرت‌و گواستیانه‌وه‌ بۆ ناوچه‌یه‌كی دوورتر له‌پێكدادانه‌كان، ئه‌وانی دیكه‌ش بڕیاریاندا چاوه‌ڕوان بن به‌ئومێدی ئازادبوون، كاتێكیش ده‌رفه‌تی هه‌ڵاتنیان بۆ ره‌خسا‌و ئوم ساڵح ده‌ستیكرد به‌كۆكردنه‌وه‌ی جانتایه‌كی بچووكی ئاخنراو به‌جلوبه‌رگ‌و به‌ڵگه‌نامه‌ی گرنگ، رافیده‌ین لێی نزیك بووه‌وه‌‌و لێی پرسی: لێره‌ به‌جێمده‌هێڵیت؟.

 

ئوم ساڵحیش له‌ ئامێزی گرت‌و پێی وت به‌بێ تۆ یه‌ك هه‌نگاو لێره‌ ناجووڵێین، رافیده‌ینیش به‌رله‌وه‌ی ماڵه‌كه‌ به‌جێبهێڵێت خاچه‌ له‌زێڕ دروستكراوه‌كه‌ی‌و هه‌ندێك پاره‌ی دایه‌ ئوم ساڵح‌و وتی "به‌ده‌م گریانه‌وه‌ پێم وت ئه‌مه‌ ئه‌مانه‌ت بێت له‌ئه‌ستۆی تۆدا تا ده‌گه‌ینه‌ هێزه‌ عێراقییه‌كان".

 

هاتنه‌ده‌ره‌وه‌‌و به‌پێ كه‌وتنه‌ڕێ، سه‌ریان دانه‌واندبوو له‌ترسی قه‌ناس به‌ده‌سته‌كانی داعش یاخود گولله‌ی وێڵ‌و پارچه‌ی ته‌قینه‌وه‌، رافیده‌ین به‌توندی ده‌ستی ئوم ساڵحی گرتبو‌و هه‌ردووكیشیان له‌ترساندا هه‌ڵده‌له‌رزین.

 

ئه‌و كچه‌ مه‌سیحیه‌ كه‌ هێشتا شێوه‌ی جوانی تێداماوه‌ سه‌ره‌ڕای ئه‌و هیلاكی‌و ماندووییه‌ی به‌ڕوونی پێوه‌ی دیاره‌، ده‌ڵێت "دواجار گه‌یشتینه‌ لای هێزه‌ عێراقییه‌كان‌و هه‌ناسه‌یه‌كی دڵنیاییمان هه‌ڵمژی، له‌سه‌ر زه‌وی دانیشتم‌و نیقابه‌ ره‌شه‌كه‌م له‌سه‌ر روخسارم لابرد‌و به‌كوڵ ده‌ستم به‌گریان كرد، ئه‌وه‌ تاسه‌یه‌كی په‌نگخواردووبوو له‌ناو سنگمدا به‌هۆی ئه‌و ترس‌و سته‌مه‌ی بۆماوه‌ی سێ ساڵ تێیدا ژیام، ئه‌گه‌ر ئه‌م خێزانه‌ نه‌بوونایه‌ ته‌نیا ده‌بووم".

 

چاكه‌دانه‌وه‌

دوای گه‌شتێكی زۆر سه‌خت‌و پڕ مه‌ترسی، هه‌مووان گه‌یشتنه‌ كامپی (500)ی ئاواره‌كان له‌ناحیه‌ی حه‌مام عه‌لیل له‌باشووری موسڵ، هه‌ر یه‌كه‌یان خێمه‌یه‌كیان وه‌رگرت، به‌ڵام ئه‌وان بڕیاریاندا هه‌ر پێكه‌وه‌ بژین، بۆیه‌ به‌هاوبه‌شی له‌یه‌ك خێمه‌دا نیشته‌جێبوون‌و خێمه‌كه‌ی دیكه‌ش بۆ ئه‌بو ساڵح‌و كوڕه‌كانی بوو.

 

له‌وێش هه‌ر زوو هه‌واڵی جێگیربوونی ژنێكی مه‌سیحی له‌لای خێزانێكی موسڵمان بڵاوبووه‌وه‌، بۆیه‌ سه‌ردانیكه‌رانیان زۆربو‌و خێمه‌كه‌یان بووه‌ رووگه‌ی سیاسییه‌كان‌و ئه‌وانه‌ی به‌دوای چیرۆكی سه‌رنجڕاكێش‌و پێكه‌وه‌ژیانی ئاشتیانه‌دا ده‌گه‌ڕێن.

 

رافیده‌ین زۆر په‌یوه‌ندی ته‌له‌فۆنی له‌لایه‌ن خزمه‌كانیه‌وه‌ له‌ناو عێراق‌و ده‌ره‌وه‌ی بۆ كرا‌و پرسیاری ئه‌وه‌یان لێده‌كرد چۆن له‌گه‌ڵ خێزانێكی مسوڵماندا ژیاوه‌ كه‌ نه‌یناسیون؟ ئه‌ویش به‌زمانه‌ كلدانییه‌كه‌ی وه‌ڵامی ده‌دانه‌وه‌: ئه‌وانه‌ كه‌سوكارمن‌و نه‌ناسراو نین‌و پاشان ناوه‌رۆكی گفتوگۆكه‌ی بۆ ئه‌م ساڵح وه‌رده‌گێڕا.

 

كاتێكیش كه‌نیسه‌ به‌هه‌واڵی ئه‌م ژنه‌ ئاشووریه‌ كلدانیه‌ی زانی كه‌ 30 ساڵ پێش ئێستا له‌گه‌ڵ دایك‌و باوكی له‌ترسی شه‌ڕی عێراق ئێران هه‌ڵاتوون‌و هاتوونه‌ته‌ موسڵ، له‌شاری هه‌ولێره‌وه‌ كه‌ ژماره‌یه‌كی زۆر له‌مه‌سیحیه‌ راگوێزراوه‌كانی موسڵی تێدا نیشته‌جێیه‌، ناردی به‌شوێنیدا، به‌ڵام رافیده‌ین وه‌ڵامی بانگهێشته‌كه‌ی دایه‌وه‌ "لێره‌ ناجووڵێم ئه‌گه‌ر ئوم ساڵح‌و خێزانه‌كه‌ی له‌گه‌ڵ خۆم نه‌به‌م".

 

كه‌نیسه‌ مه‌رجه‌كه‌ی بۆ به‌دینه‌هێنا ره‌نگه‌ هۆكاری ئه‌وه‌ش ئه‌و رێوشوێنه‌ ئاڵۆزانه‌ بێت كه‌ ده‌سه‌ڵاتدارانی هه‌رێمی كوردستان به‌سه‌ر ئاواره‌كانی موسڵدا ده‌یسه‌پێنن، بۆیه‌ ماوه‌ی نزیكه‌ی سێ مانگ له‌كامپه‌كه‌ مایه‌وه‌‌و پاشان له‌گه‌ڵ كه‌سوكاره‌ نوێیه‌كه‌یدا گه‌ڕایه‌وه‌ بۆ شاره‌كه‌.

 

كاتێك پرسیارم لێكرد بۆچی نه‌چوویت بۆ هه‌ولێر یان دهۆك كه‌ ژیانێكی سه‌ربه‌رزانه‌ت بۆ دابین ده‌كرێت؟ ئاماژه‌ی بۆ ئوم ساڵح‌و خێزانه‌كه‌ی كرد‌و وتی "كه‌سوكاره‌كه‌م پشتیان شكاندووم، ناتوانم هه‌رگیز چاكه‌یان له‌یاد بكه‌م".

 

رافیده‌ین گه‌ڕایه‌وه‌ بۆ خانووه‌كه‌ی له‌گه‌ڕه‌كی مه‌نسور، ئوم ساڵحیش به‌شێوه‌یه‌كی كاتی له‌شوقه‌یه‌كی بچووك له‌ناوچه‌ی موسڵی نوێ نیشته‌جێیه‌ تا شوێنێكی نزیك له‌كاری كوڕه‌كانی ده‌دۆزێته‌وه‌، چونكه‌ خانووه‌ كۆنه‌كه‌یان به‌هۆی بۆردومانه‌وه‌ به‌ته‌واوی خاپوور بووه‌.

 

به‌ڵام په‌یوه‌ندی نێوانیان لێره‌دا كۆتایی نایه‌ت، چونكه‌ هێشتا كچه‌ مه‌سیحییه‌كه‌‌و ئوم ساڵح پلان بۆ ئه‌وه‌ داده‌نێن خانوویه‌كی دراوسێی یه‌كتر بۆخۆیان بدۆزنه‌وه‌، گوێم لێیان بوو باسی ئه‌وه‌یان ده‌كرد.

 

له‌دوا په‌یوه‌ندیشمدا له‌گه‌ڵ خێزانی ئوم ساڵح، ده‌ركه‌وت له‌ترسی گولله‌ هاوه‌ن خانووه‌كه‌ی به‌جێهێشتووه‌‌و به‌ناچاری گواستوویه‌تیه‌وه‌ بۆ ناوچه‌ی مه‌نسور له‌نزیك رافیده‌ین، ئه‌وه‌تا دواجار جه‌نگ خواستی هه‌ردوو ژنه‌كه‌ی به‌دیهێنا.

 

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌