راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

فه‌لوجه‌.. مۆته‌كه‌ی‌ به‌غدا
هێزه‌ عێراقییه‌كان پایته‌ختی‌ یه‌كه‌می‌ داعشیان پێ كۆنترۆڵ ناكرێت

موسته‌فا حه‌بیب
فه‌لوجه‌ بووه‌ته‌ گرێكوێره‌ی‌ سوپاو حه‌شدی‌ شه‌عبی‌، هه‌رچه‌نده‌ چه‌ندین ناوچه‌یان له‌داعش سه‌ندووه‌ته‌وه‌، به‌ڵام ناتوانن له‌و شاره‌ پێشڕه‌وی‌ بكه‌ن.
10.03.2016  |  به‌غدا
چه‌كدارێكی‌ حه‌شدی‌ شه‌عبی‌ له‌فه‌لوجه‌ ( :وێنه الموقع الرسمي للحشد الشعبي)
چه‌كدارێكی‌ حه‌شدی‌ شه‌عبی‌ له‌فه‌لوجه‌ ( :وێنه الموقع الرسمي للحشد الشعبي)

گرنگی‌ فه‌لوجه‌ له‌وه‌دا خۆی‌ ده‌بینێته‌وه‌ كه‌ شانی‌ به‌شانی‌ به‌غداوه‌یه‌و ناوچه‌یه‌كی‌ ئێجگار ستراتیژییه‌ بۆ پایته‌خت، له‌ماوه‌ی‌ چه‌ند مانگی‌ رابردووشدا هه‌ڵمه‌ته‌كانی‌ سوپاو حه‌شدی‌ شه‌عبی‌ ئازادكردنی‌ چه‌ند شارێكی‌ گرنگی‌ وه‌ك تكریت‌و بێجی‌‌و رومادی‌ لێكه‌وته‌وه‌، به‌ڵام تائێستا فه‌لوجه‌ بۆ داعش قه‌ڵایه‌كی‌ قایمه‌.

 

له‌ناوچه‌ی‌ "سبێحات"ی‌ نزیك فه‌لوجه‌ سه‌ربازانی‌ فیرقه‌ی‌ یه‌كی‌ سوپای‌ عێراقی‌ كۆبوونه‌ته‌وه‌و هه‌وڵی‌ ئه‌وه‌ ده‌ده‌ن بچنه‌ ناو شاره‌كه‌وه‌ كه‌ ئێستا بووه‌ته‌ پایته‌ختی‌ یه‌كه‌می‌ داعش له‌عێراقدا، نه‌قیب قاسم ته‌میمی‌ یه‌كێك له‌ئه‌فسه‌رانی‌ فیرقه‌ی‌ یه‌ك له‌گه‌ڵ سه‌ربازه‌كانیدا چه‌ند مانگێكه‌ ناتوانن شه‌ڕه‌ قورسه‌كه‌ی‌ فه‌لوجه‌ ببه‌نه‌وه‌و پێشڕه‌وی‌ بكه‌ن.

 

نه‌قیب قاسم به‌"نیقاش"ی‌ وت "شه‌ڕی‌ فه‌لوجه‌ له‌شه‌ڕی‌ هه‌موو ناوچه‌كانی‌ تر قورسترا، ئه‌مه‌ش به‌هۆی‌ ئه‌وه‌ی‌ داعش سودی‌ له‌هۆكاری‌ جوگرافی‌‌و له‌دانیشتوانه‌كه‌ی‌ بینیوه‌".

 

فه‌لوجه‌ یه‌كه‌مین شاری‌ عێراقی‌ بوو كه‌ له‌مانگی‌ كانوونی‌ دووه‌می‌ 2014 كه‌وته‌ ده‌ست داعش، ته‌نانه‌ت شه‌ش مانگ به‌ر له‌وه‌ی‌ موسڵ داگیر بكات، به‌هۆی‌ ئه‌وه‌ش كه‌ فه‌لوجه‌ له‌به‌غداوه‌ نزیكه‌ (60كم) زۆر به‌ئاسانی‌ ده‌توانێت ببێته‌ هه‌ڕه‌شه‌ بۆ سه‌ر پایته‌خت‌و فرۆكه‌خانه‌كه‌ی‌.

 

ئه‌ركی‌ پاككردنه‌وه‌ی‌ فه‌لوجه‌ سپێردراوه‌ به‌فیرقه‌ی‌ یه‌كی‌ سوپا له‌گه‌ڵ چه‌ند فه‌وجێك له‌فیرقه‌كانی‌ (10و 8و 17)‌و لیوایه‌ك له‌فه‌رمانده‌ی‌ ئۆپه‌راسیۆنه‌كانی‌ به‌غدا، هه‌روه‌ها چه‌كدارانی‌ حه‌شدی‌ شه‌عبی‌ به‌تایبه‌تی‌ گروپه‌كانی‌ "به‌درو عه‌سائیب ئه‌هلل حه‌ق‌و بزوتنه‌وه‌ی‌ نوجه‌باو سه‌رایا جیهادو بینا"، به‌ڵام هه‌موو ئه‌مانه‌ نه‌یانتوانیوه‌ شاره‌كه‌ كۆنترۆڵ بكه‌نه‌وه‌.

 

له‌باره‌ی‌ ژماره‌ی‌ چه‌كدارانی‌ داعش له‌ناو فه‌لوجه‌، نه‌قیب قاسم ئاماژه‌ به‌وه‌ ده‌كات كه‌ به‌پێی‌ زانیارییه‌ هه‌واڵگرییه‌كانیان نزیكه‌ی‌ دوو هه‌زار چه‌كداری‌ داعش له‌ناو شاره‌كه‌دان كه‌ نیوه‌یان عێراقی‌ نین، هه‌روه‌ها (500) ئۆتۆمبێلی‌ سه‌ربازیان له‌به‌رده‌ستدایه‌ له‌وانه‌ی‌ له‌موسڵ له‌سوپایان سه‌ندووه‌، ئێستا ئه‌و ئۆتۆمبێلانه‌یان بۆمبڕێژكردووه‌ بۆ ئه‌وه‌ی‌ له‌كاتی‌ هێرشكردندا بیته‌قێننه‌وه‌.

 

له‌ماوه‌ی‌ چه‌ند مانگی‌ رابردوودا سوپای‌ عێراقی‌ به‌نیوه‌ی‌ ئه‌و هێزه‌ چه‌ند ناوچه‌یه‌كی‌ گرنگی‌ له‌داعش سه‌نده‌وه‌، له‌وانه‌ تكریت (170كم باكوری‌ به‌غدا)‌و بێجی‌ (230كم باكوری‌ به‌غدا)‌و رومادی‌ (110كم خۆرئاوای‌ به‌غدا)، به‌ڵام نه‌یانتوانیوه‌ فه‌لوجه‌ بگرنه‌وه‌ كه‌ ته‌نها شه‌ست كیلۆمه‌تر له‌به‌غداوه‌ دووره‌.

 

پێنج هه‌فته‌ له‌مه‌وبه‌ر كاتێك سوپا شاری‌ ره‌مادی‌ له‌داعش سه‌نده‌وه‌، فه‌رمانده‌ سه‌ربازییه‌كان رایانگه‌یاند كه‌ خۆیان ئاماده‌ ده‌كه‌ن بۆ ئازادكردنی‌ فه‌لوجه‌، به‌ڵام دواتر به‌چه‌ند هۆكارێك له‌وه‌ پاشگه‌ز بوونه‌وه‌.

 

فالح عیساوی‌ جێگری‌ سه‌رۆكی‌ ئه‌نجومه‌نی‌ پارێزگای‌ ئه‌نبار به‌"نیقاش"ی‌ وت "شه‌ڕی‌ فه‌لوجه‌ كات‌و ئاماده‌كاری‌ زۆری‌ ده‌وێت له‌به‌ر ئه‌وه‌ی‌ جیاوازه‌ له‌هه‌موو شاره‌كانی‌ تری‌ عێراق، بۆیه‌ ئێستا سوپا خۆی‌ بۆ ئازادكردنی‌ شاری‌ (هیت)ی‌ خۆرئاوای‌ رومادی‌ ئاماده‌ ده‌كات نه‌ك فه‌لوجه‌".

 

داعش نزیكه‌ی‌ له‌سه‌دا هه‌شتای‌ رووبه‌ری‌ ئه‌نباری‌ به‌ده‌سته‌وه‌یه‌ كه‌ پێكهاتوون له‌شاره‌ گه‌وره‌كانی‌ وه‌ك (قائیم، راوه‌، عانه‌، هیت، فه‌لوجه‌، ره‌تبه‌) له‌گه‌ڵ نۆ شاری‌ بچووك كه‌ ئه‌وانیش بریتین له‌(عبور، عوبێد، وه‌لید، په‌روانه‌، گه‌رمه‌، كبێسه‌، فورات، سه‌قڵاویه‌، وه‌جبه‌) هه‌رچی‌ حكومه‌تیشه‌ ته‌نها دوو گه‌وره‌ شاری‌ حه‌دیسه‌و رومادی‌ به‌ده‌سته‌وه‌یه‌ له‌گه‌ڵ هه‌ر پێنج شاری‌ بچووكی‌ (عامریه‌ی‌ فه‌لوجه‌، به‌غدادی‌، حه‌بانیه‌، نخێب، حه‌قلانیه‌).

 

عیساوی‌ ده‌شڵێت "هه‌مووان ده‌زانن كه‌ شه‌ڕی‌ فه‌لوجه‌ جیاواز ده‌بێت، له‌به‌رئه‌وه‌ی‌ داعش سه‌رسه‌ختانه‌ به‌رگری‌ لێده‌كات، ئه‌مه‌ جگه‌ له‌وه‌ی‌ هه‌زاران كه‌سی‌ مه‌ده‌نی‌ له‌شاره‌كه‌دا ماونه‌ته‌وه‌و گه‌مارۆ دراون".

 

وه‌ك عیساوی‌ ئاماژه‌ی‌ پێده‌كات به‌ر له‌وه‌ی‌ سوپا هێرش بكاته‌ سه‌ر فه‌لوجه‌، ده‌بێت بیر له‌پاككردنه‌وه‌ی‌ ناوچه‌كانی‌ خۆرهه‌ڵاتی‌ رومادی‌ بكه‌نه‌وه‌ وه‌ك (ئه‌لبو بالی‌‌و ئه‌لبوعوبێدو حامزیه‌و جه‌زیره‌ خالدیه‌).

 

حكومه‌تی‌ عێراقی‌ فه‌رمانده‌ سه‌ربازییه‌كان ده‌ڵێن كه‌ سوپاو حه‌شدی‌ شه‌عبی‌ فه‌لوجه‌یان گه‌مارۆداوه‌و ئێستا به‌غدا به‌ته‌واوی‌ ئارامه‌، به‌ڵام هێرشه‌كه‌ی‌ داعش بۆ سه‌ر ئه‌بوغرێبی‌ خۆرئاوا به‌غدا له‌رۆژی‌ (28)ی‌ مانگی‌ رابردوو، ئه‌و راستییه‌ی‌ دووپات كرده‌وه‌ كه‌ به‌غدا پارێزراو نییه‌.

 

داعش توانی‌ له‌فه‌لوجه‌وه‌ به‌ئاسانی‌ بچێته‌ ئه‌بوغرێب‌و كۆگای‌ گه‌نم‌و كه‌ره‌سته‌ خۆراكییه‌كان كۆنترۆڵ بكات‌و سه‌رجه‌می‌ بگوازێته‌وه‌ بۆ فه‌لوجه‌، بێ‌ ئه‌وه‌ی‌ هێزه‌ ئه‌منییه‌كان بتوانن رێگری‌ لێبكه‌ن، پرسیاره‌كه‌ ئه‌وه‌یه‌: چۆن توانیان ئه‌و كاره‌ بكه‌ن‌و هێزه‌ ئه‌منییه‌كان له‌كوێ‌ بوون؟

 

هۆكاری‌ جوگرافی‌‌و دیمۆگرافی‌

فه‌لوجه‌ پێگه‌یه‌كی‌ جێۆسیاسی‌‌و سه‌ربازی‌ گرنگی‌ هه‌یه‌، له‌به‌ر ئه‌وه‌ی‌ له‌پایته‌خته‌وه‌ نزیكه‌و زنجیره‌ی‌ پێكه‌وه‌ گرێدانی‌ موسڵ‌و به‌غداو شاره‌كانی‌ تری‌ ئه‌نباره‌، ده‌كه‌وێته‌ سه‌ر سنوری‌ هه‌رسێ‌ پارێزگای‌ به‌غداو بابل‌و كه‌ربه‌لا‌و رێگایه‌كی‌ نێوده‌وڵه‌تی‌ هه‌یه‌ كه‌ ده‌یبه‌ستێته‌وه‌ به‌ئه‌رده‌نه‌وه‌، هه‌موو ئه‌مانه‌شه‌ وایكردووه‌ كه‌ داعش به‌ئاسانی‌ ده‌ستبه‌رداری‌ نه‌بێت.

 

پێگه‌ی‌ جوگرافی‌ فه‌لوجه‌ جیاوازه‌ له‌سه‌رجه‌م ئه‌و ناوچانه‌ی‌ هێزه‌ ئه‌منییه‌كان ئازادیان كردوونه‌ته‌وه‌، له‌به‌رئه‌وه‌ی‌ ناوچه‌یه‌كی‌ پڕ له‌شیوو دۆڵه‌و شوێنی‌ خۆ حه‌شاردان‌و هاتوچۆی‌ زۆره‌، رێگایه‌كی‌ كشتوكاڵی‌ چڕوپڕ ده‌یبه‌ستێته‌وه‌ به‌غداوه‌‌و هێزه‌ ئه‌منییه‌كان ناتوانن به‌ته‌واوی‌ كۆنترۆڵی‌ بكه‌ن.

 

عه‌بدوڵا حه‌لبوسی‌ یه‌كێك له‌سه‌رۆك عه‌شیره‌ته‌كانی‌ فه‌لوجه‌ كه‌ ئێستا له‌به‌غدا نیشته‌جێیه‌ به‌"نیقاش"ی‌ وت "داعش شاره‌ بچوكه‌كانی‌ ده‌وری‌ فه‌لوجه‌ی‌ كردووه‌ته‌ گۆڕه‌پانی‌ شه‌ڕ دژی‌ سوپاو حه‌شدی‌ شه‌عبی‌، ئه‌و شارانه‌ش ده‌یان گوندی‌ كشتوكاڵیان به‌ده‌وره‌وه‌یه‌‌و راسته‌وخۆ به‌ستراون به‌به‌غداوه‌‌و داعش هه‌ركات بیه‌وێت له‌وێوه‌ ده‌گاته‌ به‌غدا".

 

گه‌رمه‌ كه‌ به‌گرنگترین شاری‌ ده‌وری‌ فه‌لوجه‌ هه‌ژمار ده‌كرێت، مانگی‌ نیسانی‌ ساڵی‌ رابردوو (2015) سوپای‌ عێراقی‌ هه‌ڵمه‌تی‌ "به‌ره‌به‌یانی‌ گه‌رمه‌"ی‌ بۆ ئه‌و شاره‌ راگه‌یاند تا ئازادی‌ بكاته‌وه‌، به‌ڵام هێرشه‌كه‌ شكستی‌ هێناو به‌ده‌یان سه‌رباز له‌سه‌ر ده‌ستی‌ داعش كوژران.

 

كێشه‌كه‌ ئه‌وه‌یه‌ ئۆتۆمبێله‌ سه‌ربازییه‌كان ناتوانن بچنه‌ ناوچه‌كه‌ له‌به‌ر ئه‌وه‌ی‌ زه‌وییه‌كان كشتوكاڵییه‌و هه‌مووی‌ قوڕه‌، سه‌ربازیش ناتوانێت به‌پیاده‌ هێرش بكات نه‌وه‌ك بكه‌وێته‌ بۆسه‌ی‌ قه‌ناس‌و بۆمبه‌ چێنراوه‌كانی‌ داعشه‌وه‌.

 

حه‌لبوسی‌ ده‌ڵێت "زه‌وییه‌ كشتوكاڵییه‌كان له‌گوندی‌ ئیبراهیم بن عه‌لییه‌وه‌ ده‌ست پێده‌كات تا ده‌گاته‌ سه‌یع نورو سبێحات له‌باكوری‌ فه‌لوجه‌ بۆ ناوچه‌ی‌ تاجی‌ به‌غدا، له‌خۆرهه‌ڵاتی‌ شاره‌كه‌ش گونده‌كانی‌ زوبێع‌و زێدان هه‌یه‌ كه‌ ده‌یبه‌ستێته‌وه‌ به‌ئه‌بوغرێب له‌خۆرئاوای‌ به‌غدا، ئه‌مه‌ جگه‌ له‌وه‌ی‌ چه‌ند ناوچه‌یه‌كی‌ تری‌ كشتوكاڵی‌ رفوش‌و هه‌یاكلی‌ فه‌لوجه‌ گرێ ده‌ده‌نه‌وه‌ به‌ناوچه‌ی‌ یوسفییه‌ی‌ باشووری‌ به‌غدا".

 

سه‌ره‌ڕای‌ ئه‌وه‌ی‌ به‌هه‌زاران سه‌ربازو چه‌كداری‌ میلیشیاكانی‌ حه‌شدی‌ شه‌عبی‌ له‌م گوندانه‌ بڵاوبوونه‌ته‌وه‌، به‌ڵام ناتوانن رێگه‌ له‌داعش بگرن بۆ ئه‌وه‌ی‌ دزه‌ نه‌كاته‌ ناو به‌غدا، له‌به‌ر ئه‌وه‌ی‌ چه‌كدارانی‌ ئه‌و گروپه‌ شاره‌زاییان هه‌یه‌ له‌سروشتی‌ زه‌وییه‌ كشتوكاڵییه‌كان‌و هاوكاریی‌ خه‌ڵكی‌ ناوچه‌كه‌ش به‌ده‌ست ده‌هێنن، هه‌رچی‌ سوپاو حه‌شدی‌ شه‌عبییه‌ له‌خوارووی‌ عێراقه‌وه‌ هاتوون نه‌ شاره‌زای‌ ناوچه‌كه‌ن‌و نه‌ خه‌ڵكی‌ هاوكارییان ده‌كه‌ن.

 

یه‌كێكی‌ تر له‌و ئاسته‌نگانه‌ی‌ له‌به‌رده‌م ئازادكردنی‌ فه‌لوجه‌دا ئه‌وه‌یه‌ كه‌ حكومه‌ت له‌ناو شاره‌كه‌وه‌ هاوپه‌یمانی‌ نییه‌ بۆ ئه‌وه‌ی‌ سودیان لێ وه‌ربگرێت له‌به‌ده‌ستهێنانی‌ زانیاری‌ هه‌واڵگری‌، به‌پێچه‌وانه‌ی‌ رومادییه‌وه‌ كه‌ عه‌شیره‌ته‌كان له‌وێ‌ زانیارییان ده‌دا به‌حكومه‌ت‌و ئه‌وه‌ش كارئاسانی‌ كرد بۆ ئازادكردنی‌ شاره‌كه‌ له‌كۆتایی‌ مانگی‌ كانوونی‌ دووه‌می‌ ئه‌مساڵ.

 

كاتێك سوپا هێرشی‌ كرده‌ سه‌ر رومادی‌، عه‌شیره‌ته‌كانی‌ (ئه‌لبوفه‌هد‌و ئه‌لبوزیاب‌و ئه‌لبو عیسا) هاوكاری‌ سوپایان ده‌كرد، به‌ڵام عه‌شیره‌ته‌كانی‌ فه‌لوجه‌ متمانه‌یان به‌حكومه‌ت نییه‌ به‌هۆی‌ سیاسه‌ته‌كانی‌ پێشوویه‌وه‌.

 

له‌فه‌لوجه‌ چه‌ند گروپێكی‌ چه‌كداری‌ سونی‌ هه‌یه‌ كه‌ له‌بواری‌ سه‌ربازیدا شاره‌زان‌و له‌رووی‌ هێزه‌ ئه‌منییه‌كان وه‌ستاون، سه‌ره‌ڕای‌ ئه‌وه‌ی‌ ئه‌م گروپانه‌ ئاماده‌ نه‌بوون هاوپه‌یمانی‌ له‌گه‌ڵ داعش ببه‌ستن، به‌ڵام زیاتر رقیان له‌حكومه‌ته‌ وه‌ك له‌داعش، دیارترین ئه‌و گروپانه‌ش بریتین له‌"سوپای‌ ئیسلامی‌‌و كه‌تیبه‌كانی‌ شۆڕشی‌ عه‌شرین‌و سوپای‌ موجاهدین".

 

به‌رپرسێكی‌ لۆكاڵی‌ ده‌ستڕۆیشتوو به‌مه‌رجی‌ بڵاونه‌كردنه‌وه‌ی‌ ناوه‌كه‌ی‌ به‌"نیقاش"ی‌ وت "ئێستا دانوستان له‌نێوان حكومه‌ت‌و ئه‌و گروپه‌ چه‌كداریانه‌ به‌ڕێوه‌ ده‌چێت بۆ ئه‌وه‌ی‌ هاوپه‌یمانی‌ له‌دژی‌ داعش ببه‌ستن".

 

وتیشی‌ "گفتوگۆكه‌ له‌سه‌ر ئه‌و بنه‌مایه‌ هاوكاری‌ حكومه‌ت بكه‌ن بۆ ئه‌وه‌ی‌ بچێته‌ ناوچه‌ی‌ گه‌رمه‌، به‌و مه‌رجه‌ی‌ چه‌كداره‌كان‌و كه‌سوكاریان ده‌ستگیرنه‌كرێن، به‌ڵام ئه‌م دانوستانه‌ قورسه‌ له‌به‌ر ئه‌وه‌ی‌ ئه‌و گروپانه‌ متمانه‌یان به‌حكومه‌ت نییه‌".

 

هۆكاری‌ سیاسی‌

یه‌كێك له‌و هۆكاره‌ سیاسانه‌ی‌ رێگری‌ له‌ئازادكردنی‌ فه‌لوجه‌ ده‌كات، ناكۆكی‌ نێوان ئه‌مه‌ریكاو گروپه‌كانی‌ حه‌شدی‌ شه‌عبییه‌، له‌به‌ر ئه‌وه‌ی‌ ئه‌مه‌ریكا رێگه‌ نادات ئه‌و گروپانه‌ به‌شداریی‌ بكه‌ن له‌ئازادكردنی‌ شاره‌ سونییه‌كانی‌ ئه‌نبار، حه‌شدی‌ شه‌عبیش ئاماده‌ نین هیچ هاوكارییه‌كی‌ ئه‌مه‌ریكا بكه‌ن.

 

سه‌رچاوه‌یه‌ك له‌باڵیۆزخانه‌ی‌ ئه‌مه‌ریكا له‌عێراق به‌مه‌رجی‌ بڵاونه‌كردنه‌وه‌ی‌ ناوه‌كه‌ی‌ له‌به‌ر ئه‌وه‌ی‌ مافی‌ لێدوانی‌ نییه‌ به‌"نیقاش"ی‌ وت "ئه‌مه‌ریكا دژی‌ حه‌شدی‌ شه‌عبی‌ نییه‌، به‌ڵام مه‌ترسی‌ له‌هه‌ڵسوكه‌وتی‌ هه‌ندێ‌ له‌و گروپانه‌ هه‌یه‌ كه‌ له‌ئێرانه‌وه‌ پاڵپشتی‌ ده‌كرێن‌و ناچنه‌ ژێر باری‌ بڕیاره‌كانی‌ حكومه‌ته‌وه‌".

 

ده‌شڵێ‌ "هاوپه‌یمانێتی‌ نێوده‌وڵه‌تی‌ به‌ڕێبه‌رایه‌تی‌ ئه‌مه‌ریكا ستراتیژی‌ خۆی‌ هه‌یه‌ بۆ رووبه‌رووبوونه‌وه‌ی‌ داعش، ئه‌ویش له‌وه‌دا خۆی‌ ده‌بینێته‌وه‌ كه‌ خه‌ڵكی‌ ناوچه‌كه‌ به‌شداری‌ بكه‌ن له‌ئازادكردنی‌ شاره‌كانیان، بۆ ئه‌وه‌ی‌ روداوه‌كانی‌ ساڵی‌ رابردووی‌ تكریت دووباره‌ نه‌بنه‌وه‌، له‌رومادیش ئه‌وه‌ روویدا كاتێك هێزه‌ لۆكاڵییه‌كانی‌ سه‌ر به‌عه‌شیره‌ته‌كان له‌گه‌ڵ سوپاو هاوپه‌یمانێتی‌ نێوده‌وڵه‌تی‌ شاره‌كه‌یان ئازادكرد".

 

له‌ده‌وروبه‌ری‌ رومادی‌ هیچ هێزێكی‌ حه‌شدی‌ شه‌عبی‌ لێنه‌بوو، بۆیه‌ ئه‌مه‌ریكا هیچ ئاسته‌نگێكی‌ نه‌بینی‌ له‌ئازادكردنی‌ شاره‌كه‌و رێگری‌ له‌چونه‌ ناوه‌وه‌ی‌ حه‌شدی‌ شه‌عبی‌، به‌ڵام له‌فه‌لوجه‌ بارودۆخ جیاوازه‌ له‌به‌ر ئه‌وه‌ی‌ به‌هه‌زاران چه‌كداری‌ حه‌شدی‌ شه‌عبی‌ له‌ده‌وروبه‌ری‌ ئه‌و شاره‌ شه‌ڕده‌كه‌ن.

 

ئه‌بوجه‌عفه‌ر لامی‌ یه‌كێك له‌چه‌كدارانی‌ حه‌شدی‌ شه‌عبی‌ له‌ده‌وروبه‌ری‌ فه‌لوجه‌ به‌"نیقاش"ی‌ وت "حه‌شدی‌ شه‌عبی‌ ده‌توانێت فه‌لوجه‌ ئازاد بكات، به‌ڵام له‌وه‌ ده‌ترسین ئه‌مه‌ریكا به‌موشه‌ك بۆردومانمان بكات، چونكه‌ ئه‌وان نایانه‌وێ‌ شاره‌كه‌ ئازاد بكرێت".

 

لامی‌ ده‌شڵێت "فرۆكه‌كانی‌ ئه‌مه‌ریكا به‌ر له‌چه‌ند هه‌فته‌یه‌ك ژماره‌یه‌ك سه‌ربازی‌ عێراقی‌ كوشت كاتێك ویستیان به‌ره‌و فه‌لوجه‌ پێشڕه‌وی‌ بكه‌ن"، به‌ڵام سوپای‌ ئه‌مه‌ریكی‌ رایگه‌یاند كه‌ كوژرانی‌ ئه‌و سه‌ربازانه‌ هه‌ڵه‌یه‌كی‌ بێ‌ مه‌به‌ست بووه‌.

 

گرنگی‌ ئازادكردنی‌ فه‌لوجه‌

چاودێران جه‌خت له‌وه‌ ده‌كه‌نه‌وه‌ كه‌ ده‌بێت په‌له‌ بكرێت له‌ئازادكردنی‌ فه‌لوجه‌ به‌ر له‌هه‌ر شارێكی‌ تر، له‌به‌ر ئه‌وه‌ی‌ مه‌ترسی‌ هه‌ره‌ گه‌وره‌یه‌ بۆ سه‌ر به‌غدای‌ پایته‌خت، ئه‌مه‌ جگه‌ له‌وه‌ی‌ مه‌ترسییه‌ به‌سه‌ر شاری‌ كه‌ربه‌لاوه‌ كه‌ مه‌زارگه‌ پیرۆزه‌كانی‌ شیعه‌ی‌ لێیه‌، به‌ڵام هه‌وڵی‌ ئازادكردنی‌ شاره‌كه‌ ده‌بێت به‌پلان‌و به‌رنامه‌ی‌ ورد بێت.

 

ئه‌حمه‌د ئالوسی‌ چاودێری‌ سیاسی‌ به‌"نیقاش"ی‌ وت "ئه‌و پرۆسه‌ سه‌ربازیانه‌ی‌ سوپا له‌شاره‌ دووره‌كانی‌ ئه‌نبار ئه‌نجامی‌ ده‌ده‌ن هیچ سوودی‌ نییه‌ ئه‌گه‌ر یه‌كه‌مجار فه‌لوجه‌ ئازاد نه‌كرێت، له‌به‌ر ئه‌وه‌ی‌ پشتی‌ سوپا هه‌میشه‌ مه‌ترسی‌ هێرشی‌ داعشی‌ له‌سه‌ره‌".

 

ده‌شڵێت "ئازادكردنی‌ فه‌لوجه‌ به‌یه‌كجاری‌ مه‌ترسی‌ سه‌ر به‌غدا ده‌ڕه‌وێنێته‌وه‌ له‌و ئۆتۆمبێله‌ بۆمب رێژكراوو پرۆسه‌ خۆكوژیانه‌ی‌ له‌وێوه‌ دێن، ئه‌مه‌ جگه‌ له‌وه‌ی‌ داعش دوا پێگه‌ی‌ خۆی‌ له‌خۆرهه‌ڵاتی‌ ئه‌نبار له‌ده‌ست ده‌دات‌و ناچاره‌ بكشێته‌وه‌ بۆ سنوری‌ عێراق‌و سوریا".

 

له‌هه‌موو بارێكدا شه‌ڕی‌ ئازادكردنی‌ فه‌لوجه‌ ئاسان نابێت، ئه‌مه‌ش یه‌كه‌مین شه‌ڕ نییه‌ له‌و شاره‌، چونكه‌ بۆ دووجار له‌ساڵی‌ 2004 سوپای‌ ئه‌مه‌ریكا هێرشێكی‌ كرده‌ سه‌ر شاره‌كه‌و نیوه‌ی‌ وێرانكرد، له‌و كاته‌شه‌وه‌ خه‌ڵكی‌ شاره‌كه‌ سه‌رسه‌ختانه‌ رقیان له‌سوپای‌ ئه‌مه‌ریكاو حكومه‌تی‌ عێراقییه‌.

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌