راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

داهێنانێكی‌ نوێی‌ داعش
سه‌د گۆڕ بڕوخێنه‌ له‌زیندان ئازاد ده‌كرێیت

تایبه‌ت
ته‌نانه‌ت مردووه‌كانیش له‌ده‌ست داعش رزگاریان نه‌بووه‌، ئه‌وه‌تا هێشتا له‌شه‌ڕی‌ زیندووه‌كان نه‌بووه‌ته‌وه‌ كه‌وتووه‌ته‌ په‌لاماردانی‌ مردووه‌كان، كه‌ره‌سته‌ی‌ ئه‌مجاره‌ش زیندانیكراوه‌كانن.
17.12.2015  |  موسڵ

ئه‌وكاته‌ی‌ سه‌عدون له‌لایه‌نی‌ دیوانی‌ حسبه‌ (پۆلیسی‌ داعش)ه‌وه‌ ده‌ستگیركرا باش ده‌یزانی‌ چاره‌نووسی‌ یان كوشتن ده‌بێ‌ یاخود سزای‌ دارایی‌‌و جه‌ڵد لێدان، به‌ڵام قه‌د پێشبینی‌ ئه‌وه‌ی‌ نه‌ده‌كرد سزایه‌كی‌ نوێی‌ بۆ بدۆزنه‌وه‌ كه‌ له‌گۆڕستانه‌كاندا به‌سه‌ری‌ ببات.

 

سه‌عدون (27 ساڵ) سێ‌ هه‌فته‌ی‌ كۆتایی‌ مانگی‌ تشرینی‌ دووه‌می‌ رابردووی‌ له‌زینداندا به‌سه‌ربرد به‌هۆی‌ ئه‌وه‌ی‌ بازرگانی‌ به‌جگه‌ره‌وه‌ كردبوو، مه‌رجی‌ ئازادكردنیشی‌ ئه‌وه‌ بوو كه‌ سه‌د گۆڕ بڕوخێنێت، ئه‌مه‌ش له‌چوارچێوه‌ی‌ هه‌ڵمه‌تێكدا كه‌ داعش ده‌ستی‌ پێكردووه‌ بۆ تێكدانی‌ گۆڕستانه‌ گه‌وره‌كانی‌ موسڵ به‌ناوی‌ "هه‌ڵمه‌تی‌ سڕینه‌وه‌ی‌ شوێنه‌واری‌ هاوبه‌ش بۆ خودا په‌یداكردن".

 

محه‌مه‌د شه‌ماع ئیمام‌و خه‌تیبی‌ مزگه‌وتی‌ نه‌بی‌ یونس كه‌ داعش له‌مانگی‌ ته‌مموزی‌ ساڵی‌ رابردوو مزگه‌وته‌كه‌ی‌ خاپوركرد به‌بیانووی‌ ئه‌وه‌ی‌ گۆڕی‌ تێدایه‌، ده‌ڵێت "توندڕه‌وه‌كان گۆڕه‌كان تێكده‌نێن به‌و بیانووه‌ی‌ له‌لایه‌ن خه‌ڵكه‌وه‌ نه‌په‌رسترێن".

 

شه‌ماع كه‌ ئێستا له‌دهۆك نیشته‌جێیه‌ به‌"نیقاش"ی‌ وت "ئه‌وانه‌ ده‌روون نه‌خۆشن، كه‌سێكتان بینیوه‌ گۆڕ بپه‌رستێ‌، ئه‌وان ئاینی‌ ئیسلام به‌لاڕێدا ده‌به‌ن".

 

له‌گرتوخانه‌ زۆرو زه‌وه‌نده‌كانی‌ موسڵ داعش گیراوه‌كان ده‌بات سزای‌ جۆراو جۆریان به‌سه‌ردا ده‌سه‌پێنێت، كۆمه‌ڵێ داهێنانیش ده‌كه‌ن له‌دروستكردنی‌ سزا بۆ ئه‌و تاوانانه‌ی‌ له‌قورئان‌و فه‌رمووده‌كانی‌ پێغه‌مبه‌ردا ئاماژه‌یان پێنه‌كراوه‌، له‌بابه‌تی‌ جگه‌ره‌كێشان‌و پابه‌ندنه‌بوون به‌ ڕیش درێژكردنه‌وه‌.

 

سه‌عدون پاش ئه‌وه‌ی‌ ئازادكرا به‌"نیقاش"ی‌ وت "فه‌رمانیان پێكردین بچینه‌ گۆڕستانه‌كان، به‌یانییه‌كه‌ی‌ چاویان به‌ستمه‌وه‌ خستیانینه‌ ناو ئۆتۆمبێلێكه‌وه‌، كاتێك چاویان كردینه‌وه‌ بینیمان له‌گۆڕستانین، گیراوه‌كان ته‌ماشای‌ یه‌كیان كردو به‌به‌ر خۆیانه‌وه‌ وتیان ئه‌وه‌ گۆڕستانی‌ (موسڵی‌ نوێیه‌) له‌خۆرئاوای‌ موسڵ".

 

ده‌شڵێ‌ "هه‌ر دوانزه‌ گیراوه‌كه‌ له‌ئۆتۆمبێل هاتینه‌ خواره‌وه‌و به‌وردی‌ چاودێری‌ ده‌كراین، چه‌كوش‌و كه‌ره‌سته‌ی‌ تریان داینێ‌‌و وتیان به‌ردی‌ ئه‌و گۆڕستانانه‌ بشكێنن‌و هیچ شوێنه‌وارێكیان نه‌مێنێ‌".

 

له‌موسڵدا چه‌ند گۆڕستانێكی‌ گه‌وره‌و بچووك هه‌ن، سه‌ره‌ڕای‌ سێ‌ گۆڕستانی‌ تایبه‌ت به‌مه‌سیحییه‌كان هه‌ر یه‌كێكیشیان دابه‌شكراون بۆ رووبه‌ری‌ (250) مه‌تر چوارگۆشه‌‌و په‌رژینیان بۆ كراوه‌، پێشتر له‌لایه‌ن شاره‌وانییه‌وه‌ به‌سه‌ر خێزانه‌كاندا دابه‌شكراوه‌.

 

هه‌ڵمه‌تی‌ وێرانكردنی‌ گۆڕه‌كان ئه‌و زانیارییه‌یه‌ كه‌ له‌لایه‌ن هانی‌ خه‌له‌ف پشتڕاست ده‌كرێته‌وه‌، هانی‌ له‌منداڵییه‌وه‌ له‌په‌نجه‌ره‌ی‌ ژووره‌كه‌ی‌ خۆیه‌وه‌ به‌رده‌وام گۆڕستانی‌ ئیسلاح زه‌راعی‌ ده‌بینی‌ كه‌ چه‌ند مه‌ترێك له‌ماڵیانه‌وه‌ دووره‌، وه‌ك ئه‌وه‌ی‌ خۆی‌ بۆ "نیقاش"ی‌ گێڕایه‌وه‌ به‌ر له‌ ده‌ رۆژ كه‌ له‌خه‌و هه‌ستاوه‌ بینیویه‌تی‌ چه‌كدارانی‌ داعش گۆڕه‌كان تێك ده‌شكێنن، له‌مڕووه‌وه‌ ده‌ڵێت "به‌شێك له‌و گۆڕستانه‌ هیچ شوێنه‌وارێكی‌ پێوه‌ نه‌ماوه‌".

 

ئه‌م هه‌ڵمه‌ته‌ ته‌نانه‌ت په‌ڕیوه‌ته‌وه‌ بۆ دیارترین دوو گۆڕستانی‌ موسڵ كه‌ بریتین له‌(وادی‌ عه‌كاب) له‌خۆرئاوای‌ موسڵ‌و (كه‌رامه‌) له‌خۆرهه‌ڵاتی‌ شاره‌كه‌، به‌قسه‌ی‌ رۆژنامه‌نووس عامر ئه‌لجومه‌یلی‌ داعش وێنه‌گره‌كانی‌ ناچار كردووه‌ كه‌ ئه‌و گۆڕستانانه‌ تێك بشكێنن.

 

عامر له‌فه‌یسبوك نوسیوێتی‌ "له‌و سزا سه‌یرانه‌ی‌ داعش سه‌پاندوویه‌تی‌ به‌سه‌ر وێنه‌گره‌كاندا بریتییه‌ له‌وه‌ی‌ هه‌ر یه‌كێكیان چل گۆڕ تێك بشكێنن".

 

ئه‌بو ئه‌حمه‌د به‌درانی‌ یه‌كێكی‌ تره‌ له‌دانیشتوانی‌ موسڵ به‌"نیقاش"ی‌ راگه‌یاند چه‌ند گیراوێك براونه‌ته‌ گوندی‌ (جرن) له‌باشووری‌ موسڵ‌و هه‌موو ئه‌و گۆڕانه‌یان پێ شكاندوون كه‌ له‌سه‌ر گردۆڵكه‌یه‌كی‌ بچووك بوون.

 

به‌درانی‌ خۆی‌ له‌چه‌كدارانی‌ داعشی‌ بیستووه‌ كه‌ له‌مه‌ودوا رێگه‌ ناده‌ن هیچ گۆڕێك كێلی‌ هه‌بێت‌و هه‌رچییه‌كیش كێلی‌ هه‌بێت تێكی‌ ده‌شكێنن.

 

هه‌ر چه‌ند رۆژێك پاش ئه‌وه‌ی‌ داعش ده‌ستیگرت به‌سه‌ر موسڵدا كه‌وته‌ تێكشكاندنی‌ گۆڕی‌ (بنت) كه‌ یه‌كێكه‌ له‌شوێنه‌واره‌ دێرینه‌كانی‌ موسڵ، دوای‌ ئه‌وه‌ش ئه‌و هه‌ڵمه‌ته‌ دیارترین مزگه‌وت‌و شوێنه‌واره‌ گرنگه‌كانی‌ گرته‌وه‌ كه‌ ته‌مه‌نیان هه‌زاران ساڵ ده‌بوو، هه‌رچی‌ گۆڕی‌ مه‌سیحییه‌كانیشه‌ له‌كه‌نیسه‌ی‌ دێر ماركۆكریس تێكیان شكاند.

 

گیراوو زیندانییه‌كان پاڵه‌وانی‌ ئه‌م هه‌ڵمه‌ته‌ نوێیه‌ی‌ داعشن، ئه‌مه‌ش ده‌رفه‌تێكه‌ بۆ ئه‌وه‌ی‌ له‌گرتوخانه‌ نهێنییه‌كان ده‌ربازیان ببێت، وا نه‌بێت به‌شداریكردنیان له‌م هه‌ڵمه‌ته‌ مانای‌ ئازادكردنیان بێت، به‌ڵكو زۆربه‌یان پاش كاره‌كه‌ ده‌گێڕدرێنه‌وه‌ بۆ ئه‌و گۆڕستانه‌ی‌ لێوه‌ی‌ هاتبوون.

 

سه‌عدون وه‌ك خۆی‌ ده‌ڵێت ناچاركراوه‌ سه‌د گۆڕ بڕوخێنێت، ژماره‌ی‌ گۆڕه‌كانیش به‌پێی‌ جۆری‌ سزاكه‌ ده‌گۆڕێت، ئه‌وه‌ی‌ بازرگانی‌ جگه‌ره‌ بكات زۆر زیاتره‌ له‌وه‌ی‌ ده‌یكێشێت.

 

ئاماژه‌ به‌وه‌ش ده‌كات كه‌ گیراوه‌كه‌ بۆی‌ هه‌بووه‌ داوای‌ هاوكاری‌ له‌كه‌سوكاره‌كه‌ی‌ بكات بۆ ئه‌وه‌ی‌ یارمه‌تی‌ بده‌ن له‌تێكشكاندنی‌ گۆڕه‌كان، ده‌شڵێت "بۆ به‌دبه‌ختیم كاتێك كه‌سوكاره‌كه‌م گه‌یشتن هه‌ر سه‌د گۆڕه‌كه‌م ته‌واو كردبوو".

 

دوای‌ دوو هه‌فته‌ كاتێك خزر عه‌كیدی‌ چوو سه‌ردانی‌ گۆڕی‌ كه‌سوكاره‌كه‌ی‌ بكات، ته‌نها پارچه‌ زه‌وییه‌كی‌ بینی‌ كه‌ هیچ كێلێكی‌ له‌سه‌ر نه‌بوو، به‌"نیقاش"ی‌ وت "جاران گۆڕه‌كانم به‌كێله‌كاندا ده‌ناسییه‌وه‌، به‌ڵام ئێستا زۆر قورسه‌ بیاندۆزمه‌وه‌، باشییه‌كه‌ی‌ ئه‌وه‌یه‌ په‌رژینی‌ ده‌ره‌وه‌ی‌ گۆڕستانی‌ خێزانه‌كه‌مان ماوه‌".

 

ئه‌گه‌ر پرسیاری‌ رای‌ خه‌ڵكی‌ موسڵ بكه‌ین له‌سه‌ر ئه‌م هه‌ڵمه‌ته‌، ره‌نگه‌ بۆچوونه‌كه‌ی‌ سه‌عدون گوزارشت له‌زۆربه‌یان بكات كاتێك وتی‌ "ئێستا گوێ‌ به‌مردووه‌كان ناده‌ین، گرنگ ئه‌وه‌یه‌ ئێمه‌ش نه‌چینه‌ پاڵ ئه‌وان".

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌