راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

ئێستا له‌حه‌ویجه‌ چی‌ ده‌گوزه‌رێت؟

شاڵاو محەمەد
په‌یامنێری‌ نیقاش له‌چه‌ند رۆژی‌ رابردوودا سه‌ردانی‌ قه‌زای‌ حه‌ویجه‌ی‌ خوارووی‌ كه‌ركوكی‌ كرد كه‌ ئێستا به‌ده‌ستی‌…
27.06.2014
View from the last Iraqi Kurdish checkpoint heading toward ISIS-controlled Hawija.
View from the last Iraqi Kurdish checkpoint heading toward ISIS-controlled Hawija.

Tweet
//

هه‌رچه‌نده‌ به‌هۆی‌ ئه‌وه‌ی‌ ئێستا خوارووی‌ كه‌ركوك بووه‌ته‌ ناوچه‌یه‌كی‌ گه‌رمی‌ رووبه‌رووبوونه‌وه‌ی‌ پێشمه‌رگه‌و داعش، به‌ڵام هێشتا هاتوچۆ له‌نێوان كه‌ركوك‌و قه‌زای‌ حه‌ویجه‌ به‌ته‌واوی‌ نه‌بڕاوه‌، رۆژانه‌ تاك‌و ته‌را چه‌ند ئۆتۆمبێلێك ئه‌مسه‌رو ئه‌وسه‌ری‌ رێگاكه‌ ده‌كه‌ن، رێبواره‌كانیش ئه‌و كه‌سانه‌ن كه‌ له‌كه‌ركوكه‌وه‌ ده‌چنه‌وه‌ بۆ حه‌ویجه‌ بۆلای‌ كه‌سوكاره‌كانیان یان ئه‌و خێزانانه‌ن كه‌ له‌خراپبوونی‌ بارودۆخه‌كه‌ ده‌ترسن‌و حه‌ویجه‌ به‌ره‌و كه‌ركوك جێده‌هێڵن.

بۆ گه‌یشتن به‌حه‌ویجه‌ ده‌بێت به‌ناوچه‌ی‌ (كه‌یوان)دا تێپه‌ڕ ببیت كه‌ ئێستا به‌"رێگای‌ مه‌رگ" ناوده‌برێت، هه‌ردوو لایه‌نی‌ شه‌ڕه‌كه‌ (پێشمه‌رگه‌و پۆلیس له‌گه‌ڵ‌ داعش) ده‌ستیان له‌سه‌ر په‌له‌پیتكه‌ی‌ تفه‌نگه‌كانیانه‌‌و ته‌نها ته‌قاندنی‌ فیشه‌كێك له‌لایه‌كیانه‌وه‌ به‌سه‌ بۆ ئه‌وه‌ی‌ شه‌ڕ سه‌ر هه‌ڵبداته‌وه‌.

كه‌ له‌دوا خاڵی‌ پشكنینی‌ پێشمه‌رگه‌و پۆلیس تێپه‌ڕ ده‌بیت، رێنمایت ده‌كه‌ن ئه‌گه‌ر كارێكی‌ گرنگت نییه‌ روو نه‌كه‌یته‌ ئه‌و ناوچه‌، چونكه‌ كه‌م نین ئه‌و كه‌سانه‌ی‌ له‌و رێگایه‌دا كوژراون یان له‌به‌ری‌ ئه‌وبه‌ر كه‌وتوونه‌ته‌ ده‌ست داعش‌و رووبه‌رووی‌ سزا یان كوشتن كراونه‌ته‌وه‌، پێش ئه‌وه‌ی‌ ماڵئاوایمان لێبكه‌ن له‌بازگه‌ی‌ خوارووی‌ كه‌یوان پێشمه‌رگه‌یه‌ك به‌منی‌ وت "ئاگاداربه‌ پرسیاری‌ وردت لێده‌كه‌ن كه‌ بۆچی‌ ده‌چیته‌ ئه‌وێ‌، ئه‌گه‌ر دڵنیا نه‌بن له‌وه‌ی‌ راست ده‌كه‌یت، به‌زمێكت به‌سه‌ر ده‌هێنن".

ئه‌مه‌ ئه‌و پرسیاره‌ بوو كه‌ پێشتر خۆم بۆ ئاماده‌ كردبوو، به‌و پێیه‌ی‌ چه‌ند ساڵێك له‌په‌یمانگای‌ حه‌ویجه‌ خوێندومه‌، پێم وابوو زه‌حمه‌ت نییه‌ به‌پێناسی‌ ئه‌و په‌یمانگایه‌وه‌ بچمه‌ ناو قه‌زاكه‌.

پاش تێپه‌ڕبوونی‌ چل خوله‌ك بازگه‌یه‌كی‌ تر هاته‌ پێشمان، به‌ڵام بینینی‌ ئاڵا ره‌شه‌كه‌ی‌ داعش به‌س بوو بۆ ئه‌وه‌ی‌ تێبگه‌یت ئیتر گه‌یشتیته‌ یه‌كه‌م خاڵی‌ ئه‌و ناوچانه‌ی‌ له‌لایه‌ن داعشه‌وه‌ كۆنترۆڵ‌ كراوه‌، جێگه‌كه‌ چه‌ند كیلۆمه‌ترێكی‌ كه‌م له‌سه‌نته‌ری‌ قه‌زای‌ حه‌ویجه‌وه‌ دوور بوو.

له‌ته‌كسییه‌كه‌دا ژن‌و پیاوێكی‌ سوننه‌م له‌گه‌ڵدابوو، ئه‌وان له‌به‌ر ئه‌وه‌ی‌ خۆیان خه‌ڵكی‌ ناوچه‌كه‌ بوون، كه‌متر ترسی‌ ئه‌وه‌یان هه‌بوو رێی‌ چوونه‌ ژووره‌وه‌یان پێنه‌درێت، به‌هێمایه‌ك دوو چه‌كداری‌ ده‌مامكدار ئۆتۆمبێله‌كه‌ی‌ ئێمه‌یان راگرت‌و هاتنه‌ پێشه‌وه‌ بۆ ئه‌وه‌ی‌ پرسیار له‌سه‌رنشینه‌كان بكه‌ن.

یه‌كێك له‌و چه‌كدارانه‌ هه‌ر كه‌ له‌من نزیك بووه‌وه‌ پرسیاری‌ كرد كه‌ بۆچی‌ ده‌چمه‌ حه‌ویجه‌، منیش پێناسی‌ په‌یمانگام ده‌رهێناو وتم ده‌چم بڕوانامه‌كه‌م ده‌هێنمه‌وه‌، كه‌مێك راوه‌ستاو وتی‌ نه‌ له‌حه‌ویجه‌ ده‌وامی‌ په‌یمانگا هه‌یه‌ نه‌ له‌كه‌ركوكیش دامه‌زراندن، ئیتر بڕوانامه‌ چۆن ده‌به‌یته‌وه‌و له‌وێ‌ چی‌ لێده‌كه‌یت، پێم راگه‌یاند كه‌ هه‌ندێ‌ له‌فه‌رمانبه‌ره‌كان ده‌ناسم‌و به‌ڵكو كارئاسانیم بۆ بكه‌ن.

پاش كه‌مێك روانین له‌پێناسه‌كه‌ قورئانێكی‌ دایه‌ ده‌ستم‌و وتی‌: "بڕۆ خوات له‌گه‌ڵ‌، به‌ڵام قورئانه‌كه‌ خه‌تم بكه‌"، ئه‌مه‌ له‌گه‌ڵ‌ دوو سه‌رنشینه‌كه‌ی‌ تریش دووباره‌ كرده‌وه‌.

حه‌یده‌ر به‌گارا شۆفێری‌ تاكسییه‌كه‌مان كه‌ به‌شێوه‌یه‌كی‌ نیمچه‌ رۆژانه‌ له‌و رێگایه‌ هاتوچۆ ده‌كات، ئاماژه‌ی‌ به‌وه‌ كرد له‌و كاته‌وه‌ی‌ داعش حه‌ویجه‌ی‌ كۆنترۆڵكردووه‌ له‌هه‌موو بازگه‌كان چه‌ند قورئانێكیان داناوه‌و ده‌یده‌نه‌ ئه‌و موسافیرانه‌ی‌ له‌وێوه‌ ده‌ڕۆن.

قه‌زای حه‌ویجه‌ سه‌ر به‌ پارێزگای‌ كه‌ركوكه‌و ده‌كه‌وێته‌ باشووری رۆژئاوای شاره‌كه‌وه‌ به‌دووری (55)كم، نزیكه‌ی 400 هه‌زار كه‌س تێیدا نیشته‌جێیه‌ كه‌ سه‌رجه‌میان عه‌ره‌بی‌ سوننه‌ن له‌گه‌ڵ كه‌مینه‌یه‌كی كوردو توركمان.

رۆژی‌ 6ی‌ حوزه‌یران به‌ته‌واوی‌ قه‌زای‌ حه‌ویجه‌ كه‌وته‌ ده‌ستی‌ چه‌كدارانی‌ عه‌شایه‌ری‌ ناوچه‌كه‌، پاش ئه‌وه‌ی‌ سوپا كشایه‌وه‌، داعش به‌ڕێكه‌وتن له‌گه‌ڵ‌ عه‌شیره‌ته‌كانی‌ ناوچه‌كه‌ به‌بێ‌ شه‌ڕ حه‌ویجه‌شی‌ كرده‌ ناوچه‌ نفوزی‌ خۆی‌.

هه‌ر كه‌ چووینه‌ ناو قه‌زاكه‌ یه‌كه‌م باره‌گای‌ فه‌رمی‌ كه‌ هاته‌ پێش چاومان ئه‌و بینایانه‌ بوو كه‌ پێشتر سه‌ربازگه‌ی‌ فیرقه‌ی‌ 12ی‌ سوپای‌ عێراق بوو، ئێستا له‌سه‌ر ده‌روازه‌ سه‌ره‌كییه‌كه‌ی‌ لافیته‌یه‌كی‌ گه‌وره‌ی‌ ره‌شی‌ لێهه‌ڵواسراوه‌و به‌سپی‌ لێی‌ نوسراوه‌ (ده‌وڵه‌تی‌ ئیسلامی‌ له‌عێراق‌و شام – ژووری‌ ئۆپه‌راسیۆنه‌ نهێنییه‌كان)، به‌پێی‌ قسه‌ی‌ به‌رپرسه‌ ئه‌منییه‌كان، داعش به‌شێكی‌ تایبه‌تی‌ هه‌واڵگری‌ كردووه‌ته‌وه‌و چاودێری‌ جموجۆڵی‌ به‌رامبه‌ره‌كه‌ی‌ ده‌كات.

بێ‌ ئه‌وه‌ی‌ ئۆتۆمبێله‌كه‌مان بوه‌ستێت به‌به‌رده‌می‌ چه‌ند بینایه‌كی‌ تردا تێپه‌ڕین، یه‌كێك له‌وانه‌ بینای‌ په‌یمانگای‌ ته‌كنیكی‌ حه‌ویجه‌ بوو، كه‌ خۆم تیایدا خوێندوومه‌، ئه‌وێ‌ هیچ لافیته‌یه‌كی‌ پێوه‌ نه‌بوو، به‌ڵام ژماره‌یه‌كی‌ به‌رچاوی‌ چه‌كداری‌ ده‌مامكدارو بێ‌ ده‌مامك له‌ده‌وری‌ بیناكه‌ وه‌ستابوون، كه‌ دواتر پرسیارم كرد ده‌ركه‌وت داعش ئه‌و شوێنه‌ی‌ كردووه‌ته‌ گرتوخانه‌و پۆلیس‌و ئه‌فسه‌ره‌ ده‌ستگیركراوه‌كان‌و چه‌ند هاوڵاتییه‌كی‌ تر له‌وێ‌ ده‌ستبه‌سه‌رن.

دیارترین بینای‌ ناو شاره‌كه‌ ئه‌و بینایه‌یه‌ كه‌ جاران شوێنی‌ ئه‌نجومه‌نی‌ قه‌زای‌ حه‌ویجه‌ بوو، ئێستا كراوه‌ته‌ شوێنی‌ په‌یوه‌ندییه‌ عه‌شایرییه‌كان‌و به‌گه‌وره‌یی‌ له‌سه‌ری‌ نوسراوه‌ (ده‌وڵه‌تی‌ ئیسلامی‌ له‌عێراق‌و شام - په‌یوه‌ندییه‌ گشتییه‌كان - به‌شی‌ عه‌شایه‌ر).

به‌قسه‌ی‌ خه‌ڵكی‌ ناوچه‌كه‌ داعش له‌حه‌ویجه‌ ستراتیژێكی‌ زۆر جیاواز په‌یڕه‌و ده‌كات له‌وه‌ی‌ له‌ناوچه‌كانی‌ تر گرتونێتییه‌ به‌ر، لێره‌ په‌یوه‌ندییه‌كی‌ زۆر باشی‌ له‌گه‌ڵ‌ عه‌شیره‌ته‌كان دروست كردووه‌و پێی‌ راگه‌یاندون كه‌ له‌ناوچه‌كه‌دا خۆیان بڕیار به‌ده‌ستن، چه‌ند كه‌سێكیشی‌ راسپاردووه‌ بۆ ئه‌وه‌ی‌ گفتوگۆ له‌گه‌ڵ‌ عه‌شیره‌ته‌كانی‌ تری‌ ئه‌و ده‌وروبه‌ره‌دا بكه‌ن‌و له‌گه‌ڵ‌ داعش هاوپه‌یمانێتی‌ ببه‌ستن.

ئه‌و بینایه‌ی‌ كه‌ جاران بنكه‌ی‌ سه‌ره‌كی‌ پۆلیسی‌ حه‌ویجه‌ بوو، ئێستا بووه‌ته‌ شوێنی‌ یه‌كه‌ سه‌ربازییه‌كانی‌ داعش‌و به‌لافیته‌ له‌سه‌ری‌ نوسراوه‌ (یه‌كه‌ی‌ سه‌ره‌كی‌- سوپای‌ ده‌وڵه‌تی‌ ئیسلامی‌ له‌عێراق‌و شام).

حه‌یده‌ر به‌گارا، شۆفێری‌ تاكسییه‌كه‌ ئاماژه‌ی‌ بۆ ئه‌وه‌ كرد هه‌رچه‌نده‌ داعش به‌عه‌شیره‌ته‌كانیان راگه‌یاندووه‌ كه‌ خۆیان خاوه‌نی‌ شاره‌كه‌ن، به‌ڵام هه‌موو ئه‌مانه‌ ده‌بێت له‌ژێر سایه‌ی‌ یاساو بڕیاره‌كانی‌ داعشدا بێت، هه‌ركه‌سێكیش له‌و بڕیارانه‌ ده‌ربچێت رووبه‌رووی‌ سزا ده‌كرێته‌وه‌و 80 جه‌ڵدی‌ لێده‌درێت.

ئه‌مه‌ یه‌كه‌مینجار نییه‌ حه‌ویجه‌ له‌كۆنترۆڵی‌ سوپاو پۆلیس ده‌رده‌چێت، به‌ڵكو له‌ماوه‌ی‌ دوو ساڵی‌ رابردوودا كه‌م رۆژ هه‌بووه‌ ئه‌و هێزه‌ ئه‌منیانه‌ له‌حه‌ویجه‌ بحه‌وێنه‌وه‌، ساڵی‌ 2012 چه‌كدارانی‌ ته‌ریقه‌تی‌ نه‌قشبه‌ندی‌ (باڵی‌ سه‌ربازی‌ حیزبی‌ به‌عس) بڕیاریاندا یادی‌ دامه‌زراندنی‌ به‌عس له‌حه‌ویجه‌ بكه‌نه‌وه‌و هاوكات له‌گه‌ڵ‌ ئه‌وه‌دا په‌لاماری‌ دامه‌زراوه‌ سه‌ره‌كییه‌كانیانداو سه‌رجه‌میان كۆنترۆڵكرد، دواتر له‌هێرشێكی‌ هاوبه‌شی‌ ئۆپه‌راسیۆنی‌ دیجله‌و پۆلیسی‌ قه‌زاو ناحیه‌كانی‌ كه‌ركوك شاره‌كه‌ كه‌وته‌وه‌ ده‌ست حكومه‌تی‌ عێراقی‌.

له‌ئێستاشدا جگه‌ له‌قه‌زای‌ حه‌ویجه‌، ناحیه‌كانی‌ ڕه‌شادو زاب‌و ریازو عه‌باسی‌ كه‌ ده‌كه‌وێته‌ باشوری‌ ڕۆژئاوای‌ كه‌ركوكه‌وه‌ له‌ژێر كۆنتڕۆڵی‌ چه‌كدارانی‌ داعشدایه‌.

هه‌رچه‌نده‌ سه‌رجه‌م دام‌و ده‌زگا فه‌رمییه‌كان له‌كار كه‌وتوون، به‌ڵام جموجۆڵی‌ هاوڵاتیان له‌ناو شاره‌كه‌دا ئاساییه‌و ناوه‌ ناوه‌ش چه‌ند ئۆتۆمبێلێكی‌ پڕ له‌چه‌كدار به‌ئاڵای‌ داعشه‌وه‌ له‌سه‌ر شه‌قامه‌ سه‌ره‌كییه‌كان خۆیان نمایش ده‌كه‌ن.

به‌قسه‌ی‌ خه‌ڵكی‌ ناوچه‌كه‌ به‌شێك له‌م ئۆتۆمبێلانه‌ چه‌كدارانی‌ عه‌شیره‌ته‌كانیان تێدایه‌، به‌ڵام داعش كردوێتی‌ به‌مه‌رج به‌سه‌ریانه‌وه‌ كه‌ ته‌نها بۆیان هه‌یه‌ ئاڵای‌ داعش به‌رز بكه‌نه‌وه‌.

هه‌ردوو مزگه‌وتی‌ عه‌بدلواحیدو شه‌هیدان كراونه‌ته‌ دادگای‌ داعش كه‌ وه‌كو باڵاترین ده‌سه‌ڵاتی‌ دادوه‌ری‌ مامه‌ڵه‌ی‌ له‌گه‌ڵ ده‌كرێت.

به‌وته‌ی‌ پزیشكێكی‌ نه‌خۆشخانه‌ی‌ حه‌ویجه‌ هه‌ر كه‌سێك له‌بڕیاره‌كانی‌ داعش لابدات ئه‌وه‌ له‌و دوو مزگه‌وته‌ دادگای‌ ده‌كرێت‌و سزاكه‌ی‌ بۆ دیاری‌ ده‌كرێت.

به‌گوێره‌ی‌ ئه‌و زانیاریانه‌ی‌ له‌سه‌رچاوه‌یه‌كی‌ باڵای‌ ده‌زگای‌ هه‌واڵگری‌ عێراق له‌كه‌ركوك ده‌ستی‌ "نیقاش" كه‌وتووه‌، داعش به‌نیازه‌ له‌ماوه‌ی‌ چه‌ند رۆژی‌ داهاتوودا ئیماره‌ته‌كه‌ی‌ له‌حه‌ویجه‌ رابگه‌یه‌نێت‌و والییه‌ك ده‌ستنیان بكات به‌ناوی‌ "والی‌ كه‌ركوك - حه‌ویجه‌"، له‌و رێیه‌وه‌ والییه‌كه‌ كه‌ رۆڵی‌ قایمقام ده‌بینێت كار بۆ ئه‌وه‌ ده‌كات سه‌رجه‌م دام‌و ده‌زگاكان بخاته‌وه‌ كار.

به‌وته‌ی‌ یه‌كێك له‌به‌ڕێوه‌به‌ره‌ ئیدارییه‌كانی‌ قه‌زاكه‌ زۆرینه‌ی‌ فه‌رمانبه‌رانی‌ قه‌زاكه‌ ئاواره‌ بوون‌و ئه‌و به‌شه‌ش كه‌ ماونه‌ته‌وه‌ ده‌وام ناكه‌ن، چونكه‌ ده‌ترسن هاوشێوه‌ی‌ موسڵ‌ حكومه‌تی‌ ناوه‌ند ئه‌و ماوه‌یه‌ وه‌ك مۆڵه‌تی‌ كراوه‌ی‌ بێ‌ موچه‌ ئه‌ژمار بكات‌و ئه‌شزانن داعش موچه‌یان ناداتێ‌.

به‌هۆی‌ وه‌ستانی‌ كاری‌ فه‌رمانگه‌ سه‌ره‌كییه‌كانه‌وه‌، گوزه‌رانی‌ هاوڵاتیان ته‌واو سه‌خت بووه‌، كاره‌باو ئاو رۆژانه‌ چه‌ند سه‌عاتێكی‌ كه‌م ده‌درێت‌و زۆربه‌ی‌ شمه‌كه‌كان له‌بازاڕدا گران بوون‌و سوته‌مه‌نیش به‌زه‌حمه‌ت ده‌ست ده‌كه‌وێت.

به‌هۆی‌ كه‌ڵه‌كه‌بوونی‌ خۆڵ‌‌و خاشاك له‌سه‌ر رێوبانه‌ سه‌ره‌كییه‌كانی‌ چه‌ند رۆژێك له‌مه‌وبه‌ر گه‌نجانی‌ قه‌زاكه‌ هه‌ڵمه‌تێكی‌ پاككردنه‌وه‌ی‌ شه‌قامه‌كانیان ئه‌نجامداوه‌، چونكه‌ دڵنیابوون له‌وه‌ی‌ ئه‌گه‌ر چاوه‌ڕێی‌ شاره‌وانی‌ بكه‌ن به‌م زووانه‌ شه‌قامه‌كان پاك نابێته‌وه‌.

ئه‌و به‌ڕێوه‌به‌ره‌ ئیداریه‌ كه‌ ئێستا له‌ قه‌زای‌ حه‌ویجه‌ ماوه‌ته‌وه‌، له‌به‌ر هه‌ستیاری‌ دۆخی‌ قه‌زاكه‌ ئاماده‌ نه‌بوو ناوی‌ بهێنرێت به‌"نیقاش" ڕاگه‌یاند "به‌رده‌وام به‌كۆڵان‌و بازاره‌كاندا بانگه‌واز ده‌كرێت كه‌ سه‌رجه‌م فه‌رمانبه‌ران بگه‌ڕێنه‌وه‌ سه‌ر ده‌وامی‌ فه‌رمیان، به‌ڵام زۆر كه‌من ئه‌و فه‌رمانبه‌رانه‌ی‌ به‌ده‌نگی‌ ئه‌و بانگه‌وازه‌وه‌ ده‌چن".

قه‌زای‌ حه‌ویجه‌ به‌یه‌كێك له‌گه‌وره‌ترین ناوچه‌ی‌ به‌رهه‌می‌ كشتوكاڵی‌ دانه‌ویڵه‌ له‌عێراق داده‌نرێت‌و چوار هه‌زارو 500 جوتیار له‌سه‌ر ئه‌و زه‌وییانه‌ كار ده‌كه‌ن (به‌پێی‌ ئاماری‌ فه‌رمانگه‌ی‌ كشتوكاڵی‌ كه‌ركوك) به‌ڵام ئێستا ده‌رگای‌ سایلۆی‌ حه‌ویجه‌ داخراوه‌و ناتوانێت به‌رهه‌می‌ دانه‌وێله‌ی‌ جوتیاران وه‌ربگرێت.

به‌وته‌ی‌ جوتیارێكی‌ قه‌زاكه‌ 125 هه‌زار دۆنم دانه‌وێڵه‌ له‌چاوه‌ڕوانی‌ كردنه‌وه‌ی‌ سایلۆی‌ قه‌زاكه‌دان‌و وتی‌ "ئه‌گه‌ر زوو فریا نه‌كه‌ون به‌رهه‌می‌ دانه‌وێڵه‌ی‌ ئه‌مساڵمان فت".

له‌به‌رانبه‌ریشدا مه‌هدی‌ موباره‌ك به‌ڕێوه‌به‌ری‌ كشتوكاڵی‌ كه‌ركوك به‌"نیقاش"ی‌ وت "تاكو دۆخی‌ قه‌زاكه‌ ئاسایی‌ نه‌بێته‌وه‌ ناتوانین ده‌ست بكه‌ینه‌وه‌ به‌وه‌رگرتنی‌ دانه‌وێڵه‌ی‌ جوتیاران، چونكه‌ هاتوچۆی‌ نێوان كه‌ركوك حه‌ویجه‌ ئه‌سته‌م بووه‌".

زۆربه‌ی‌ ئه‌و كه‌سانه‌ی‌ قسه‌مان له‌گه‌ڵ‌ ده‌كردن له‌گه‌ڵ‌ ئه‌وه‌ی‌ رایانده‌گه‌یاند كه‌ به‌هیچ شێوه‌یه‌ك رازی‌ نین سوپاكه‌ی‌ مالیكی‌ جارێكی‌ تر حوكمیان بكات، به‌ڵام به‌گومانیشه‌وه‌ قسه‌یان له‌سه‌ر داعش ده‌كردو نه‌یانده‌زانی‌ له‌ژێر سایه‌ی‌ حوكمی‌ ئه‌و گروپه‌دا چ ئاینده‌یه‌ك چاوه‌ڕێیان ده‌كات.