راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

ژێرخانی وێران‌و شاری‌ بێ سیسته‌م
قه‌یرانی‌ شاره‌ تازه‌ ئازادكراوه‌كان تادێت قوڵتر ده‌بێت

موسته‌فا حه‌بیب
حكومه‌تی عێراق له‌ماوه‌ی دوو ساڵی رابردوودا چه‌ند شارو شارۆچكه‌یه‌كی گه‌وره‌ی له‌ده‌ستی داعش سه‌ندووه‌ته‌وه‌، به‌ڵام پلانێكی روونی نییه‌‌و كاروباری ئه‌و شارانه‌ به‌بڕیاری هه‌ڕه‌مه‌كی‌و نابه‌رده‌وام به‌ڕێوه‌ده‌برێن.
8.12.2016  |  به‌غدا
سه‌ربازێكی‌ سوپای‌ عێراق له‌سه‌ر سنوری‌ رومادی ( :وێنه حيدر محمد علي)
سه‌ربازێكی‌ سوپای‌ عێراق له‌سه‌ر سنوری‌ رومادی ( :وێنه حيدر محمد علي)

له‌سه‌ره‌تای ساڵی 2015دا هێزه‌ ئه‌منیه‌كانی عێراق توانیان شۆكی داعش كه‌مبكه‌نه‌وه‌و عێراقیه‌كان دژه‌هێرشیان كرده‌ سه‌ر ئه‌و توندڕه‌وانه‌ی ده‌سه‌ڵاتیان به‌سه‌ر سێیه‌كی خاكی وڵاتدا سه‌پاندبوو، ئه‌م هه‌وڵانه‌ش سه‌ره‌ڕای هه‌ندێك هه‌ڵه‌ی كوشنده‌،  كۆنترۆڵكردنه‌وه‌ی زۆربه‌ی ئه‌و شارانه‌یان لێ به‌ئه‌نجام گه‌یشت كه‌ توندڕه‌وه‌كان داگیریان كردبوون.

 

چه‌ند مانگێكه‌ شاره‌كانی تكریت، بێجی، شه‌رگات، دور، عه‌له‌م، سینیه‌و یه‌سریب له‌سه‌ڵاحه‌دین‌و رومای، فه‌لوجه‌، هیت، كوبه‌یسه‌و روتبه‌ له‌ئه‌نبار ئازادكراون، هه‌روه‌ها شارۆچكه‌كانی گه‌یاره‌و شۆره‌و حه‌مام عه‌لیل‌و ده‌شتی نه‌ینه‌واش له‌نه‌ینه‌وا، توندڕه‌وه‌كانیش ته‌نیا موسڵ‌و ته‌له‌عفه‌ر له‌نه‌ینه‌واو قائیم‌و عانه‌‌و راوه‌یان له‌ئه‌نبار به‌ده‌سته‌وه‌ ماوه‌.

 

كۆتایی هاتنی ئاسته‌نگی سه‌ربازی له‌و شارانه‌ له‌چه‌ند مانگی رابردوودا ئه‌وه‌ی ئاشكرا كرد كه‌ حكومه‌تی عێراق پلانێكی راسته‌قینه‌ی بۆ گێڕانه‌وه‌ی سیستم نییه‌، چونكه‌ ده‌سه‌ڵاتی ئه‌منی له‌ده‌ستی چه‌ند هێزێكی چه‌كداری پێكه‌وه‌ نه‌گونجاودایه‌ دوور له‌چاودێری حكومه‌ت له‌به‌غدا، هه‌رچی ده‌سه‌ڵاتی خۆجێییشه‌ له‌و شارانه‌دا به‌شێكی زۆری شه‌رعیه‌تیان له‌ده‌ست داوه‌، له‌كاتێكدا ده‌بووایه‌ ئه‌و ده‌سه‌ڵاتانه‌ چاره‌سه‌ری ئه‌و كێشه‌یه‌یان بكردایه‌و پشتیوانی دانیشتووانی ناوچه‌كه‌یان به‌ده‌ستبهێنایه‌، به‌ڵام كه‌وتنه‌ ململانێیه‌كی حیزبی قووڵه‌وه‌ له‌سه‌ر پۆست.

 

كێشه‌كه‌ له‌شاره‌ ئازادكراوه‌كاندا قووڵتربۆته‌وه‌ به‌هۆی ئه‌و قه‌یرانه‌ داراییه‌ی له‌ساڵی 2015وه‌ عێراقی گرتۆته‌وه‌ له‌دوای هه‌ره‌سهێنانی نرخی نه‌وت له‌جیهاندا، چونكه‌ ئه‌و وێرانكارییه‌ی دووچاری شاره‌كان هاتووه‌، كاره‌ساتاویه‌و مه‌ترسی گه‌وره‌تریش ئه‌وه‌یه‌ حكومه‌ت توانای ده‌ستبه‌ركردنی دامه‌زراندنی بۆ دانیشتووانی ناوچه‌كه‌ نییه‌ تا دڵسۆزیان به‌ده‌ستبهێنێت، پێشده‌چێت ره‌وشه‌كه‌ له‌دوو ساڵی داهاتووشدا وه‌ك خۆی بمێنێته‌وه‌.

  

ده‌سه‌ڵاتێكی ئه‌منی پێكه‌وه‌نه‌گونجاو

هه‌ره‌سهێنانی ده‌زگای پۆلیسی خۆجێیی له‌شاره‌ ئازادكراوه‌كان ئه‌نجامێكی چاوه‌ڕوانكراو بوو دوای باڵاده‌ستبوونی توندڕه‌وه‌كان، چونكه‌ حكومه‌ت چیتر متمانه‌ی به‌و ده‌زگایه‌ نه‌مابوو له‌ترسی دزه‌كردنی توندڕه‌وه‌كان بۆ ریزه‌كانی، به‌ڵام گێڕانه‌وه‌ی سه‌قامگیری ئه‌منی بۆ هه‌ر شه‌قام‌و ناوچه‌یه‌ك‌و دووباره‌ گه‌ڕانه‌وه‌ی باوه‌ڕ به‌سیستمی دادوه‌ری، به‌نده‌ به‌هه‌بوونی هێزه‌كانی پۆلیسه‌وه‌. پاش چه‌ند مانگێكیش له‌ده‌ركردنی توندڕه‌وه‌كان تائێستا هیچ پلانێكی راسته‌قینه‌ نییه‌ بۆ كاراكردنی پۆلیسی خۆجێیی.

 

ئێستا له‌پارێزگای سه‌ڵاحه‌دین چوار هێزی ئه‌منی پێكه‌وه‌ نه‌گونجاو بڵاوبوونه‌ته‌وه‌، سوپا، پۆلیسی خۆجێیی، گروپه‌ شیعه‌كان‌و هێزی هۆزه‌كان، كاروباره‌كانیش به‌هه‌ڕه‌مه‌كی به‌ڕێوه‌ده‌برێن له‌ڕێی بڕیاری تاكه‌كه‌سی نارێكخراوو دوور له‌چاودێری حكومه‌تی عێراق.

 

بیست مانگ به‌سه‌ر ئازادكردنی تكریت ناوه‌ندی پارێزگای سه‌ڵاحه‌دیندا تێپه‌ڕیوه‌، به‌ڵام ئه‌نجومه‌نی خۆجێیی پارێزگا شكستی هێناوه‌ له‌یه‌كخستنی ئه‌و هێزه‌ شه‌ڕكه‌رانه‌و گێڕانه‌وه‌ی ده‌سه‌ڵاته‌ ئه‌منییه‌كانی به‌پێی یاساكانی ده‌سه‌ڵاته‌ خۆجێییه‌كان له‌وڵاتدا، هۆكاری ئه‌وه‌ش لاوازی پۆلیسی خۆجێییه‌ كه‌ به‌باسكی ئه‌منی سه‌ره‌كی هه‌ر ده‌سه‌ڵاتێكی خۆجێیی داده‌نرێت، ژماره‌ی ئێستایان سنوورداره‌و به‌شی سه‌رله‌نوێ كردنه‌وه‌ی هه‌موو بنكه‌كانی پۆلیس له‌پارێزگاكه‌دا ناكات.

 

هه‌مان شت له‌ئه‌نبار گه‌وره‌ترین پارێزگای عێراق‌و مۆڵگه‌ی رێكخراوه‌ی توندڕه‌وه‌كان له‌چه‌ند ساڵی رابردوودا، له‌ئارادایه‌، ده‌زگای پۆلیس له‌پایزی 2014دا هه‌ره‌سی هێنا پاش ئه‌وه‌ی داعش زۆربه‌ی شارۆچكه‌ گه‌وره‌كانی ئه‌نباری كۆنترۆڵ كرد جگه‌ له‌حه‌دیسه‌و عامریه‌، له‌و كاته‌وه‌ ئه‌ندامانی هێزه‌كانی پۆلیسی خۆجێیی مانه‌وه‌یان له‌ماڵه‌كانیاندا هه‌ڵبژاردو ناچاركران بێبه‌ریبوونی خۆیان له‌به‌رده‌م توندڕه‌واندا رابگه‌یه‌نن تا ژیانی خۆیان بپارێزن.

 

كاتێكیش سوپا له‌هاوینی 2016دا ئه‌نباری كۆنترۆڵ كرده‌وه‌، حكومه‌ت وه‌ك به‌كرێگیراوی توندڕه‌وه‌كان مامه‌ڵه‌ی له‌گه‌ڵ ئه‌ندامانی پۆلیسدا كرد، له‌خزمه‌ت ده‌ركران‌و مووچه‌یان بڕرا، هێزه‌ عه‌شایریه‌كانی ناوچه‌كه‌ش كه‌ بوونه‌ ده‌زگای ئه‌منی نوێ، هه‌ڕه‌شه‌ی كوشتنیان لێكردن.

 

فالح عیساوی جێگری سه‌رۆكی ئه‌نجومه‌نی پارێزگای ئه‌نبار به‌"نیقاش"ی وت "به‌ر له‌ هێرشی داعش 25 هه‌زار ئه‌ندامی پۆلیسی خۆجێییمان هه‌بوو، به‌ڵام ئێستا ته‌نیا سێیه‌كی ئه‌و ژماره‌یه‌ هه‌یه‌، پێویسته‌ سه‌رله‌نوێ پشتیوانی پۆلیس بكرێت بۆ سه‌پاندنی ئاسایش له‌شاره‌كانی ئه‌نباردا".

 

به‌ڵام ئاماده‌كردنه‌وه‌ی كه‌رتی پۆلیس‌و به‌ده‌ستهێنانه‌وه‌ی ده‌سه‌ڵاته‌ یاساییه‌كه‌ی بووه‌ته‌ كارێكی ئاڵۆز، چونكه‌ هه‌زاران ئه‌ندامی پێشووی پۆلیس له‌وانه‌ی شاره‌زاییان له‌كاره‌كه‌دا هه‌یه‌، بێزراون، هه‌رچی ئه‌ندامانی هێزه‌ عه‌شایریه‌ چه‌كداره‌ نوێیه‌كانیشه‌ ئه‌وا له‌ئێستادا گونجاو نین بۆئه‌وه‌ی تێكه‌ڵ به‌ده‌زگای پۆلیس بكرێن، چونكه‌ دڵسۆزیان بۆ سه‌ركرده‌ عه‌شایره‌ به‌شه‌ڕهاتووه‌كانه‌، هه‌روه‌ك ملكه‌چی ئه‌و مه‌رجه‌ یاساییانه‌ نابن كه‌ وه‌زاره‌تی ناوخۆ داوای ده‌كات.

 

ئه‌مڕۆش سێ هێزی چه‌كدار كاروباری ئه‌منی ئه‌نبار به‌ڕێوه‌ ده‌به‌ن، چه‌ند هێزێكی سه‌ربازی وشكانی سوپا كه‌ شاره‌زاییان له‌به‌ڕێوه‌بردنی شاره‌كاندا نیه‌ له‌گه‌ڵ هێزێكی نوێی پۆلیس كه‌ كاریگه‌ری سنوورداره‌و زیاتر ئه‌ركی جه‌نگی وشكانی هه‌یه‌ له‌وه‌ی ئه‌ركی پۆلیسی خۆجێیی هه‌بێت، هه‌روه‌ها چه‌كدارانی هۆزه‌كان كه‌ ئاسایشی ناو شاره‌كانیان كۆنترۆڵ كردووه‌، به‌زۆریش یه‌ك هۆز كۆنترۆڵی هۆزه‌كانی دیكه‌ له‌هه‌ر شارێكدا ده‌كات.

 

سه‌ره‌نجام ئاسایش له‌شاره‌ ئازادكراوه‌كاندا پشت به‌شكۆی ده‌وڵه‌ت‌و هێزه‌ ره‌سمییه‌كانی نابه‌ستێت، به‌ڵكو پشت به‌شكۆی هه‌ژموونی هۆزه‌كان یاخود گروپه‌ شیعه‌كان ده‌به‌ستێت، ده‌بێت دانیشتووانی ناوچه‌كه‌ش مامه‌ڵه‌ له‌گه‌ڵ سه‌رۆك هۆزو فه‌رمانده‌ی گرووپه‌ چه‌كداره‌كان بكه‌ن بۆ دابینكردنی ئاسایش‌و سه‌قامگیری نه‌ك له‌گه‌ڵ بنكه‌كانی پۆلیس‌و دادگاكان.

 

له‌گرنگترین نیشانه‌كانیش سه‌باره‌ت به‌وه‌ی ئه‌و ئاسایشه‌ی له‌شاره‌ ئازادكراوه‌كاندا به‌دیهاتووه‌ فشه‌ڵه‌و ئه‌گه‌ری هه‌ره‌سهێنانی هه‌یه‌، ئه‌وه‌یه‌ "داعش" توانای سه‌رله‌نوێ هێرشكردنی بۆسه‌ر ئه‌و شارانه‌ هه‌یه‌، له‌دوو هه‌فته‌ی رابردووشدا توندڕه‌وه‌كان توانیان هێرش بكه‌نه‌ سه‌ر شارۆچكه‌ی شه‌رگات له‌باكووری سه‌ڵاحه‌دین، هه‌روه‌ها له‌ڕێی ئۆتۆمبێلی بۆمبڕێژكراوه‌وه‌ هێرشیان كرده‌ سه‌ر شاره‌كانی رومادی‌و فه‌لوجه‌و عامریه‌ش له‌ئه‌نبار.  

 

قه‌یرانی شه‌رعیه‌تی سیاسی

دیارترین ئه‌نجامه‌كانی شه‌ڕی دژ به‌داعش ئه‌وه‌یه‌ ده‌سه‌ڵاتدارانی خۆجێیی شه‌رعیه‌تی فه‌رمانڕه‌واییان له‌ده‌ست داوه‌، چونكه‌ دانیشتووانی ناوچه‌كه‌ كه‌ به‌سه‌دان هه‌زاریان ناچاربوون له‌ترسی زۆڵم‌و زۆری توندڕه‌وان ماڵ‌وحاڵی خۆیان جێبهێڵن‌و ئه‌وانه‌ش كه‌ مانه‌ویان له‌ماڵه‌كانیاندا هه‌ڵبژارد، رۆژانێكی سه‌ختیان له‌سایه‌ی حوكمێكی توندڕه‌ودا به‌سه‌ر برد، ئه‌مڕۆش به‌رپرسیارێتی ئه‌وه‌ ده‌خه‌نه‌ ئه‌ستۆی به‌رپرسانی ناوچه‌كه‌.

 

كارێكی به‌سوود ده‌بێت پاش ئه‌و رووداوه‌ گه‌ورانه‌ هه‌ڵبژاردن ئه‌نجام بدرێت بۆ كۆتاییهێنان به‌قه‌یرانی شه‌رعیه‌ت به‌تایبه‌تی كه‌ هه‌ندێك هێزی سیاسی نوێ ده‌ركه‌وتوون له‌به‌رامبه‌ر هه‌ره‌سهێنانی چه‌ند هێزێكی سیاسی دیكه‌دا پاش ئه‌وه‌ی ئاستی جه‌ماوه‌رییان پاشه‌كشه‌ی زۆری كرد، به‌ڵام حكومه‌تی فیدراڵی‌و كۆمسیۆنی هه‌ڵبژاردن توانای ئه‌وه‌یان نیه‌ هه‌ڵبژاردن له‌واده‌ی بریارلێدراویدا له‌سه‌ره‌تای ساڵی 2017 ئه‌نجام بده‌ن.

 

به‌هۆی ئه‌وه‌شه‌وه‌ به‌رپرسانی ئێستا به‌رده‌وام ده‌بن له‌حوكمكردن له‌ شاره‌كاندا به‌بێ هاوكاری دانیشتووان، له‌به‌رامبه‌ریشدا ئه‌و بریارانه‌ی له‌و به‌رپرسانه‌وه‌ ده‌رده‌چن حه‌كیمانه‌ نابن، به‌ڵكو رێچكه‌یه‌كی كه‌سیی ده‌گرنه‌به‌ر بۆ به‌ده‌ستهێنانی سوودی دارایی، به‌و پێیه‌ی‌ له‌دوا رۆژه‌كانی حوكمكردنیاندان.

 

له‌بری ئه‌وه‌ش كه‌ به‌رپرسانی خۆجێیی له‌ئه‌نبارو سه‌ڵاحه‌دین‌و نه‌ینه‌واو دیاله‌ هه‌وڵی به‌ده‌ستهێنانه‌وه‌ی متمانه‌ی دانیشتووانی ناوچه‌كه‌ بده‌ن‌و له‌په‌یوه‌ندیدابن له‌گه‌ڵیان له‌م ته‌نگانه‌یه‌ی ئێستایانداو پێكه‌وه‌ یه‌كبگرن بۆ گوشارخستنه‌ سه‌ر حكومه‌تی فیدراڵی له‌به‌غداو كۆمه‌ڵی نێوده‌وڵه‌تی بۆ به‌ده‌ستهێنانی پاره‌و كۆمه‌ك، به‌ڵام كه‌وتوونه‌ته‌ ململانێی سیاسی توندتر له‌وه‌ی چه‌ند ساڵێك له‌مه‌وبه‌ر له‌ئارادا بوو.

 

هه‌فته‌ی رابردوو سوهه‌یب راوی پارێزگاری ئه‌نبار كه‌ له‌ "حزبی ئیسلامی"یه‌ توانی له‌پۆسته‌كه‌یدا بمێنێته‌وه‌ هه‌رچه‌نده‌ ئه‌ندامانی ئه‌نجومه‌نی پارێزگا به‌سه‌ركردایه‌تی سه‌باح گه‌رحوت سه‌رۆكی ئه‌نجومه‌ن دووجار ده‌نگیان بۆ ده‌ركردنی له‌ده‌سه‌ڵاتدا، له‌كاتێكدا گه‌رحوت له‌پۆسته‌كه‌ی لابرا، ئه‌مه‌ش نموونه‌ی قووڵی قه‌یرانی سیاسیه‌ له‌شاره‌ سوننه‌نشینه‌كاندا.

 

له‌پارێزگای سه‌ڵاحه‌دینیش به‌هه‌مان شێوه‌، حكومه‌تی خۆجێیی ئێستا هه‌مان ئه‌وه‌ی دوو ساڵی رابردوو نیه‌، چونكه‌ به‌شداری گرووپه‌ شیعه‌كانی ژێر سایه‌ی حه‌شدی شه‌عبی له‌شه‌ڕی دژ به‌ داعش‌و دابه‌شبوونی هۆزه‌كان‌و كێبڕكێ له‌سه‌ر هه‌ژموون‌و گرێبه‌سته‌ داراییه‌كان، هێزی سیاسی نوێیان به‌رهه‌مهێنا كه‌ توانیان رائید جبوری پارێزگار له‌پۆسته‌كه‌ی ده‌ربكه‌ن‌و ئه‌حمه‌د جبوری هاوكاری پێشوو دوژمنی ئێستای بووه‌ پارێزگاری نوێ.

 

به‌رزبوونه‌وه‌ی رێژه‌ی بێكاری

كێشه‌كه‌ له‌شاره‌ ئازادكراوه‌كاندا قووڵتربووه‌ته‌وه‌ به‌هۆی ئه‌و قه‌یرانه‌ داراییه‌ی له‌ 2015وه‌ عێراقی گرتۆته‌وه‌ له‌پاش هه‌ره‌سهێنانی نرخی نه‌وت له‌جیهاندا، مه‌ترسیه‌ گه‌وره‌كه‌ش بێتوانایی حكومه‌ته‌ له‌ده‌سته‌به‌ركردنی دامه‌زراندن بۆ دانیشتووانی ناوچه‌كه‌ تا دڵسۆزیان به‌ده‌ستبهێنێت، پێشده‌چێت ره‌وشه‌كه‌ بۆ دوو ساڵی داهاتوو وه‌ك خۆی بمێنێته‌وه‌.

 

ئازادكردنی ئه‌نبارو سه‌ڵاحه‌دین‌و هه‌ندێك شارۆچكه‌ی نه‌ینه‌وا ده‌ستكه‌وتێكی سه‌ربازی باشه‌، به‌ڵام باجێكی گرانی هه‌یه‌، چونكه‌ دوای نیشتنه‌وه‌ی ته‌پوتۆزی شه‌ڕه‌ سه‌خته‌كان، دیمه‌نی هه‌زاران خانوو پرۆژه‌ی ژێرخانی ئابووری له‌بواری وزه‌و ئاوو پرددا به‌ده‌ركه‌وت كه‌ به‌ته‌واوی خاپوركرابوون، رێكه‌وتێكی مایه‌ی نیگه‌رانیشه‌ كه‌ قه‌یرانی داعش هاوكات بوو له‌گه‌ڵ قه‌یرانێكی دارایی توند كه‌ حكومه‌تی عێراقی به‌ده‌ستیه‌وه‌ ده‌ناڵێنێت.

 

به‌پێی داتاكانی وه‌زاره‌تی پلاندانانی عێراق رێژه‌ی هه‌ژاری له‌ئه‌نبارو سه‌ڵاحه‌دین‌و نه‌ینه‌وا له‌ساڵی 2014دا به‌رزبۆته‌وه‌ بۆ 41% دوای ئه‌وه‌ی له‌لایه‌ن داعشه‌وه‌ داگیركران، له‌كاتێكدا به‌ر له‌ساڵی 2014 رێژه‌كه‌ 22% بووه‌، ئه‌مه‌ش ئاماژه‌یه‌كی مه‌ترسیداره‌ بۆ زیادبوونی بێكاری له‌نێو گه‌نجاندا كه‌ ره‌نگه‌ سه‌رله‌نوێ له‌لایه‌ن گروپه‌ توندڕه‌وه‌كانه‌وه‌ به‌كاربهێنرێنه‌وه‌.

 

به‌ڵام له‌ڕووی وێرانكاریه‌وه‌، وه‌زاره‌تی پلاندانان ده‌ڵێت قه‌باره‌ی زیانه‌كانی كرده‌وه‌ تیرۆریستیه‌كان له‌ماوه‌ی 2004 تا 2016 گه‌یشتۆته‌ 36 تۆلیۆن دیناری عێراقی كه‌ 61%ی له‌ماوه‌ی ساڵانی 2014 و 2015 و 2016دا رووی داوه‌، هه‌روه‌ها وه‌زاره‌ته‌كه‌ دووپاتی ده‌كاته‌وه‌ كه‌ عێراق به‌ته‌نیا ناتوانێت قه‌ره‌بووی زیانه‌كان بكاته‌وه‌ به‌بێ به‌ستنی كۆنگره‌یه‌كی نێوده‌وڵه‌تی بۆ ئاوه‌دانكردنه‌وه‌ی شاره‌ وێرانكراوه‌كان.

 

دانیشتووانی ناوچه‌كه‌ دوای به‌سه‌ربردنی چه‌ند مانگێك له‌كامپه‌كاندا گه‌ڕانه‌وه‌ بۆ شارو خانووه‌ وێرانكراوه‌كانیان‌و خۆیان به‌بێ كارو پاره‌ بینیه‌وه‌ تا سه‌رله‌نوێ خانووه‌كانیان دروست بكه‌نه‌وه‌ پاش ئه‌وه‌ی له‌كاتی قه‌یرانی ئاواره‌بووندا پاره‌ی پاشه‌كه‌وت‌و پرۆژه‌ بچووكه‌كانیان له‌ده‌ستدا. حكومه‌تیش ئێستا ناتوانێت ده‌رفه‌تی نوێی كار بڕه‌خسێنێت.

 

له‌سه‌ڵاحه‌دین ده‌سه‌ڵاتدارانی خۆجێیی چه‌ند مانگێك له‌مه‌وبه‌ر ناچاربوون بڕیاری دامه‌زراندنی ده‌یان فه‌رمانبه‌ر له‌پارێزگاكه‌دا هه‌ڵبوه‌شێننه‌وه‌ به‌هۆی قه‌یرانی داراییه‌وه‌، هه‌روه‌ك ده‌سه‌ڵاتی خۆجێیی گرفتی ئه‌وه‌ی هه‌یه‌ كه‌ حكومه‌تی عێراق پشكی ره‌سمی خۆی له‌بودجه‌ی ساڵانه‌ بۆ خه‌رج ناكات.

 

ئه‌حمه‌د عه‌زاوی جێگری سه‌رۆكی ئه‌نجومه‌نی پارێزگای سه‌ڵاحه‌دین له‌وباره‌یه‌وه‌ به‌"نیقاش"ی وت "حكومه‌تی فیدراڵی له‌نیوه‌ی یه‌كه‌می ئه‌مساڵدا 1%ی پشكی سه‌ڵاحه‌دینی له‌بودجه‌ خه‌رجكردووه‌ له‌كاتێكدا ئێمه‌ پێویسته‌یه‌كی زۆرترمان به‌پاره‌یه‌ له‌پارێزگا سه‌قامگیره‌كان ئه‌ویش به‌هۆی ئه‌و وێرانكاریه‌ی ژێرخانی پارێزگاكه‌ له‌ئه‌نجامی ئۆپراسیۆنه‌ سه‌ربازیه‌كاندا دووچاری هاتووه‌".

 

واقیعی سیاسی‌و ئه‌منی‌و ئابووری له‌شاره‌ ئازادكراوه‌كاندا مه‌ترسیداره‌، چونكه‌ هه‌وڵه‌كانی حكومه‌ته‌كه‌ی حه‌یده‌ر عه‌بادی سه‌رۆك وه‌زیران بۆ سه‌پاندنی سه‌قامگیری، سنوورداره‌و پێویسته‌ كۆمه‌ڵی نێوده‌وڵه‌تی به‌شداری بكات له‌پشتیوانیكردنی عێراق له‌چه‌ند مانگی داهاتوودا له‌ڕووی سیاسی‌و ئابووریه‌وه‌و پشتیوانی گه‌نجانیش بكات بۆ رێگرتن له‌به‌كارهێنانان له‌لایه‌ن رێكخراوه‌ توندڕه‌وه‌كانه‌وه‌.

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌