راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

هاوكێشه‌و قۆناغێكی‌ نوێ‌
داعش نه‌خشه‌ی‌ سیاسی‌ عێراقی‌ گۆڕی‌

موسته‌فا حه‌بیب
به‌هۆی‌ شه‌ڕی‌ داعشه‌وه‌ سه‌رله‌به‌ری‌ هاوكێشه‌ی‌ سیاسی‌ عێراق گۆڕانی‌ به‌سه‌ردا هات، كۆمه‌ڵێك هاوپه‌یمانی‌ نوێ‌ هاتنه‌ ئاراوه‌، ئه‌وانه‌ی‌ پێشووش له‌به‌ریه‌ك هه‌ڵوه‌شان.
21.07.2016  |  به‌غدا
Parliament baghdad ( :وێنه Parliamentary website)
Parliament baghdad ( :وێنه Parliamentary website)

دوو ساڵ دوای‌ هێرشه‌ سه‌رتاسه‌رییه‌كه‌ی‌ داعش، عێراق كه‌وتووه‌ته‌ به‌رده‌م گۆڕانی‌ كۆمه‌ڵایه‌تی‌‌و ئه‌منی‌ نوێ‌، به‌هه‌زاران ئاواره‌ هه‌ن‌و ده‌یان شار وێرانبوون، هه‌زاران كه‌سیش له‌شه‌ڕه‌كاندا كوژران، له‌گه‌ڵ ئه‌مانه‌شدا داعش بووه‌ هۆكاری‌ كێشانی‌ نه‌خشه‌یه‌كی‌ نوێی‌ سیاسی‌ له‌عێراقدا.

 

چه‌ند رۆژێك به‌ر له‌ئێستا په‌رله‌مانتاران كه‌وتنه‌ كۆكردنه‌وه‌ی‌ ئیمزا بۆ گۆڕانكاری‌ له‌كۆمسیۆنی‌ باڵای‌ هه‌ڵبژاردنه‌كان به‌ر له‌وه‌ی‌ هه‌ڵبژاردنی‌ ناوخۆیی‌ له‌نیسانی‌ ساڵی‌ داهاتوو به‌ڕێوه‌ بچێت، له‌ئێستاوه‌ هێزه‌ سیاسییه‌كان كه‌وتوونه‌ته‌ خۆ بۆ ئه‌نجامدانی‌ یه‌كه‌مین هه‌ڵبژاردن له‌سه‌رده‌می‌ داعشدا، به‌ڵام ئه‌مجاره‌ یارییه‌كه‌ جیاوازه‌، چونكه‌ هێزی‌ سیاسی‌ هه‌یه‌ هاڕه‌ی‌ كردووه‌و هێزی‌ تریش هه‌ن به‌سه‌ركه‌وتوون‌و كێبڕكێ‌ له‌سه‌ر پۆسته‌ حكومییه‌كان ده‌كه‌ن، له‌پاڵ ئه‌مانه‌شدا گرووپه‌ چه‌كداره‌كان خاوه‌نی‌ قسه‌و قورسایی‌ خۆیانن.

 

كاتێك داعش له‌حوزه‌یرانی‌ 2014 هێرشی‌ ده‌ستپێكرد، تازه‌ هێزه‌ سیاسییه‌كان له‌گفتوگۆیه‌كی‌ دوورو درێژی‌ چه‌ند مانگه‌ بووبوونه‌وه‌ بۆ پێكهێنانی‌ حكومه‌ته‌ لۆكاڵییه‌كان له‌دوای‌ ئه‌و هه‌ڵبژاردنه‌ی‌ له‌نیسانی‌ 2013 به‌ڕێوه‌چوو، بڕیاربوو ئه‌م حكومه‌تانه‌ هه‌تا نیسانی‌ 2017 له‌سه‌ر ده‌سه‌ڵات بمێننه‌وه‌.

 

به‌ڵام كۆنترۆڵكردنی‌ چوار شاری‌ عێراقی‌ له‌لایه‌ن داعشه‌وه‌ واقعێكی‌ سیاسی‌ نوێی‌ هێنایه‌ ئاراوه‌، هه‌ر ساڵێك دوای‌ هه‌ڵبژاردنه‌كان ئه‌و هاوپه‌یمانێتیانه‌ هه‌ڵوه‌شانه‌وه‌و چه‌ندین به‌رپرس له‌پۆسته‌كانیان ده‌ركران‌و ژماره‌یه‌كی‌ تر هاتنه‌ پێشه‌وه‌، به‌له‌به‌رچاوگرتنی‌ بارودۆخی‌ هاتنی‌ داعش، هاوپه‌یمانێتی‌ نوێ‌ پێكهێنرا.

 

له‌پارێزگای‌ دیاله‌ نه‌ریتی‌ سیاسی‌ له‌پاش ساڵی‌ 2003وه‌ به‌جۆرێك بوو كه‌ پۆستی‌ پارێزگار (باڵاترین پۆست) له‌پشكی‌ عه‌ره‌بی‌ سوننه‌ بێت، سه‌رۆكی‌ ئه‌نجومه‌نی‌ پارێزگاش بۆ شیعه‌، دوای‌ هه‌ڵبژاردنی‌ 2013 عامر مه‌جمه‌عی‌ له‌حیزبی‌ ئیسلامی‌ بووه‌ پارێزگار.

 

كه‌ داعش هێرشی‌ كرده‌ سه‌ر دیاله‌و چه‌ند شارێكی‌ گرنگی‌ وه‌ك میقدادییه‌ی‌ گرته‌ ده‌ست، سوپاو پۆلیس هه‌ڵهاتن‌و گروپه‌كانی‌ حه‌شدی‌ شه‌عبی‌ وه‌ك "به‌در"و "عه‌سائیب ئه‌هلل حه‌ق" دوای‌ چه‌ند شه‌ڕێكی‌ كورت توانیان داعش وه‌ده‌ربنێن، ئه‌م سه‌ركه‌وتنانه‌ وایكرد شیعه‌ ببنه‌ به‌هێزترین لایه‌ن له‌پارێزگاكه‌دا له‌كاتێكدا زۆرینه‌ی‌ دانیشتوانی‌ عه‌ره‌بی‌ سوننه‌ن ئینجا دوای‌ ئه‌وان شیعه‌و كورد دێن.

 

به‌هێزی‌ لایه‌نه‌ شیعه‌كان داواكاری‌ نوێی‌ له‌گه‌ڵ خۆیدا هێنایه‌ ئاراوه‌، پێش هه‌موویان گۆڕینی‌ پارێزگار بوو، ئه‌وه‌ بوو موسه‌ننا ته‌میمی‌ سه‌ر به‌ڕێكخراوی‌ به‌در به‌ڕێبه‌رایه‌تی‌ هادی‌ عامری‌ بۆ پۆستی‌ پارێزگار هه‌ڵبژێردرا دوای‌ ئه‌وه‌ی‌ توانی‌ بڕوا به‌ئه‌ندامانی‌ ئه‌نجومه‌ن بهێنێت كه‌ ده‌نگی‌ پێبده‌ن.

 

له‌پارێزگای‌ ئه‌نباریش له‌خۆرئاوای‌ عێراق، داعش توانی‌ حه‌وت شاری‌ گه‌وره‌ی‌ پارێزگاكه‌ بگرێته‌ ده‌ست‌و تاكه‌ شارێك به‌ده‌ست حكومه‌ته‌وه‌ مایه‌وه‌، دوای‌ شه‌ڕێكی‌ سه‌خت‌و هێرشی‌ سوپاو چه‌كدارانی‌ عه‌شیره‌ته‌كان له‌سه‌ره‌تای‌ ئه‌مساڵه‌وه‌، حكومه‌ت چوار شاری‌ گرته‌وه‌ ده‌ست، به‌ڵام ئه‌مڕۆ ئه‌نبار له‌به‌رده‌م ململانێیه‌كی‌ قوڵی‌ سیاسیدایه‌ كه‌ داعش دوای‌ خۆی‌ جێی‌ هێشتووه‌.

 

مانگی‌ رابردوو ئه‌ندامانی‌ ئه‌نجومه‌نی‌ پارێزگای‌ ئه‌نبار بڕیاریاندا سوهه‌یب راوی‌ پارێزگار له‌پۆسته‌كه‌ی‌ لاببه‌ن كه‌ سه‌ر به‌حیزبی‌ ئیسلامییه‌، ئه‌میش له‌دوای‌ برینداربوونی‌ ئه‌حمه‌د دلێمی‌ پارێزگاری‌ پێشوو له‌شه‌ڕی‌ داعشدا پۆسته‌كه‌ی‌ گرته‌ ده‌ست.

 

ئێستا سێ‌ هێزی‌ سیاسی‌ سه‌ره‌كی‌ هه‌ن كه‌ له‌سه‌ر ئاینده‌ی‌ ئه‌نبار ململانێیانه‌، ئه‌وانیش بریتین له‌"حیزبی‌ ئیسلامی‌" كه‌ سیانزه‌ ساڵ بوو پۆسته‌ دیاره‌كانی‌ ئه‌نباری‌ به‌ده‌سته‌وه‌ بوو، به‌ڵام به‌م دواییه‌ پێگه‌ی‌ جه‌ماوه‌ری‌ نه‌ك هه‌ر له‌ئه‌نبار، به‌ڵكو له‌هه‌موو شاره‌ سوننه‌كانی‌ تر پاشه‌كشه‌ی‌ كرد، دووهه‌میشیان هاوپه‌یمانێتییه‌كه‌ به‌سه‌رۆكایه‌تی‌ ئه‌یاد عه‌لاوی‌ سه‌ره‌ك وه‌زیرانی‌ پێشووتر.

 

ته‌ها عه‌بدولغه‌نی‌ ئه‌ندامی‌ ئه‌م هاوپه‌یمانێتییه‌ نوێیه‌ كه‌ ناوی‌ "وه‌ته‌نیه‌ی‌ ئه‌نبار"ه‌ به‌"نیقاش"ی‌ وت "به‌هۆی‌ شكستی‌ سیاسییه‌كانی‌ ئه‌نباره‌وه‌ پارێزگاكه‌ وێران بوو، به‌هه‌زاران كه‌سیش ئاواره‌ بوون، هه‌وڵده‌ده‌ین له‌ئاینده‌دا ئاوه‌دانی‌ بكه‌ینه‌وه‌".

 

هێزی‌ سیاسی‌ سێهه‌م هاوپه‌یمانێتی‌ عه‌شیره‌ته‌كانه‌ كه‌ له‌پاڵ سوپادا شه‌ڕی‌ داعش ده‌كات، دیارترین ئه‌و عه‌شیره‌تانه‌ بریتین له‌"ئه‌لبونمر، جغێفی‌، ئه‌لبو عبێد، ئه‌لبو فه‌هد" ئه‌م عه‌شیره‌تانه‌ جاران هیچ نوێنه‌رایه‌تییه‌كی‌ سیاسیان نه‌بوو، به‌ڵام پاش ئه‌وه‌ی‌ چه‌كداره‌كانیان بوونه‌ هێزی‌ ئه‌منی‌ سه‌ره‌كی‌‌و له‌شاره‌كاندا بڵاوبوونه‌وه‌، ئێستا ده‌نگیان بڵندترو ئامانجیان گه‌وره‌تره‌.

 

محه‌مه‌د فه‌هداوی‌ یه‌كێك له‌فه‌رمانده‌ی‌ شه‌ڕكه‌رانی‌ عه‌شیره‌ته‌كان له‌خوارووی‌ رومادی‌ به‌"نیقاش"ی‌ وت "ئه‌و هێزه‌ سیاسییانه‌ی‌ چه‌ند ساڵێكه‌ فه‌رمانڕه‌وایی‌ ئه‌نبار ده‌كه‌ن هۆكاری‌ سه‌ره‌كی‌ ئه‌م كاولكارییه‌ن، نیو ملیۆن دانیشتووی‌ ئه‌نبار ئاواره‌ بوون‌و شاره‌كان به‌كه‌ڵكی‌ ژیان نه‌ماون، رێگه‌ ناده‌ین جارێكی‌ تر ئه‌و حیزبانه‌ بگه‌ڕێنه‌وه‌".

 

له‌پارێزگای‌ سه‌لاحه‌دینی‌ باشووری‌ به‌غداش له‌دوو ساڵی‌ رابردوودا هێزی‌ داعش زۆر به‌رته‌سك بووه‌ته‌وه‌و تاكه‌ شارێكی‌ به‌ده‌سته‌وه‌یه‌ كه‌ ئه‌ویش "شرگات"ه‌، ورده‌ ورده‌ش ژیان ده‌گه‌ڕێته‌وه‌ بۆ تكریت‌و بێجی‌‌و عه‌له‌م‌و دۆره‌و یه‌سرب سه‌ره‌ڕای‌ ئه‌و وێرانكارییه‌ی‌ به‌هۆی‌ پرۆسه‌ سه‌ربازییه‌كانه‌وه‌ تووشی‌ هاتن.

 

به‌ڵام حكومه‌تی‌ خۆجێیه‌تی‌ پارێزگاكه‌ هه‌ر ئه‌وه‌ی‌ دوو ساڵ له‌مه‌وبه‌ر نییه‌، چونكه‌ به‌شداری‌ گروپه‌كانی‌ حه‌شدی‌ شه‌عبی‌ له‌شه‌ڕی‌ داعش‌و كه‌رتبوونی‌ عه‌شیره‌ته‌كان‌و كێبڕكێیان له‌سه‌ر ده‌سه‌ڵات‌و سامان وایكردووه‌ دوو گروپی‌ سیاسی‌ دروست ببن، یه‌كه‌میان رائد جبوری‌ پارێزگاری‌ پێشووی‌ له‌خۆگرتووه‌‌و دووهه‌میشیان ئه‌حمه‌د جبوری‌ رێبه‌رایه‌تی‌ ده‌كات كه‌ دوای‌ ململانێیه‌كی‌ زۆر توانی‌ ببێته‌ پارێزگار، سه‌یره‌كه‌ ئه‌وه‌یه‌ هه‌ردووكیان ئامۆزای‌ یه‌كترن.

 

رائد جبوری‌ هاوپه‌یمانێتی له‌گه‌ڵ حه‌شدی‌ شه‌عبی‌ گرێداو پشتی‌ پێبه‌ستن بۆ مانه‌وه‌ له‌پۆسته‌كه‌ی‌، هه‌وڵیدا بیانوو بهێنێته‌وه‌ بۆ ئه‌وه‌ی‌ حه‌شدی‌ شه‌عبی‌ دوای‌ شه‌ڕی‌ داعش شاره‌كه‌ چۆڵ نه‌كه‌ن، به‌ڵام گروپی‌ دووه‌م دژی‌ ئه‌مه‌ وه‌ستانه‌وه‌و هه‌وڵ ده‌ده‌ن حه‌شدی‌ شه‌عبی‌ بنێرنه‌ ده‌ره‌وه‌ی‌ پارێزگاكه‌و ده‌سه‌ڵات بكه‌وێته‌وه‌ ده‌ست حكومه‌تی‌ خۆجێیه‌تی‌.

 

هه‌رچی‌ پارێزگای‌ ئه‌نباره‌ باجی‌ سه‌ره‌كی‌ شه‌ڕی‌ داعشی‌ داوه‌ پاش ئه‌وه‌ی‌ شاری‌ موسڵ بووه‌ پایته‌ختی‌ ده‌وڵه‌ته‌كه‌ی‌ خه‌لیفه‌‌و زۆرینه‌ی‌ ناوچه‌كانی‌ تری‌ گرته‌ ده‌ست، ئه‌م پارێزگایه‌ش بێبه‌ش نه‌بووه‌ له‌گۆڕانی‌ سیاسی‌ به‌هۆی‌ داعشه‌وه‌.

 

موسڵ كه‌ له‌ساڵی‌ 2009وه‌ خێزانی‌ نوجێفی‌ به‌ڕێوه‌ی‌ ده‌به‌ن‌و به‌وه‌ ناسراون كه‌ نه‌یاری‌ سه‌رسه‌ختی‌ حكومه‌تی‌ ناوه‌ندن، ساڵی‌ 2015 ئه‌و ده‌سه‌ڵاته‌یان له‌ده‌ستدا كاتێك په‌رله‌مان ده‌نگیدا بۆ له‌سه‌ركار لابردنی‌ ئه‌سیل نوجێفی‌ پارێزگارو دانانی‌ نۆفل سوڵتان كه‌ له‌حكومه‌تی‌ ناوه‌نده‌وه‌ نزیكه‌.

 

ئه‌و هاوپه‌یمانێتیانه‌ی‌ له‌ئه‌نجومه‌نی‌ پارێزگا پێكهێنران له‌دوای‌ هه‌ڵبژاردنی‌ 2013 ئیتر ئه‌وانیش شكستیان هێنا، ته‌نانه‌ت حیزبه‌كان له‌ناوخۆیاندا كه‌رت بوون، له‌كاتێكدا شاره‌كه‌ هێشتا به‌ده‌ستی‌ داعشه‌وه‌یه‌و باس له‌وه‌ ده‌كرێت ئازادكردنه‌وه‌ی‌ نزیكه‌، بێگومان ئه‌و شه‌ڕه‌ش گۆڕانی‌ سیاسی‌ دیكه‌ ده‌هێنێته‌ ئاراوه‌و بڕیار له‌وه‌ ده‌دات دوای‌ ئه‌بوبه‌كر به‌غدادی‌ رێبه‌ری‌ داعش كێ‌ ده‌بێته‌ ده‌سه‌ڵاتدار له‌موسڵدا.

 

جێی‌ سه‌رنجه‌ ئه‌و چوار پارێزگایه‌ی‌ داعش ده‌ستی‌ به‌سه‌رداگرتن (ئه‌نبارو دیاله‌و نه‌ینه‌واو سه‌لاحه‌دین) رووبه‌رووی‌ گۆڕانی‌ گه‌وره‌ بوونه‌وه‌و پارێزگاری‌ هه‌رچواریان گۆڕدرا‌و ته‌نانه‌ت نه‌خشه‌ی‌ هاوپه‌یمانێتییه‌ سونییه‌كانیش وه‌ك پێش داعش نه‌مایه‌وه‌.

 

هێزه‌ سیاسییه‌ شیعه‌ نوێیه‌كان

كاریگه‌رییه‌ سیاسییه‌كانی‌ داعش ته‌نها به‌سه‌ر شاره‌ سوننه‌كانه‌وه‌ نه‌بووه‌، به‌ڵكو شاره‌ شیعه‌كانی‌ باشوریشی‌ گرتووه‌ته‌وه‌، ته‌نانه‌ت كاریگه‌ری‌ له‌سه‌ر هه‌رێمی‌ كوردستانیش هه‌بووه‌، سه‌ڕای‌ ئه‌وه‌ی‌ داعش نه‌یتوانیوه‌ هیچ شارێكی‌ كوردو شیعه‌ داگیر بكات، به‌ڵام به‌هۆی‌ هه‌ڕه‌شه‌ ئه‌منییه‌كانیه‌وه‌ ململانێیه‌كی‌ سیاسی‌ دروستكردووه‌ كه‌ هیچی‌ كه‌متر نییه‌ له‌ململانێی‌ ناوچه‌ سوننه‌كان.

 

كاتێك داعش هێرشی‌ كرده‌ سه‌ر عێراق، عه‌لی‌ سیستانی‌ مه‌رجه‌عی‌ باڵای‌ شیعه‌ فه‌رمانی‌ "جیهاد"ی‌ راگه‌یاند، به‌هۆیه‌وه‌ سه‌دان هه‌زار شیعه‌ له‌هه‌شت پارێزگا شیعه‌نشینه‌كه‌ به‌ده‌م داواكارییه‌كه‌وه‌ چوون (بابل، كه‌ربه‌لا، نه‌جه‌ف، واست، میسان، زیقار، موسه‌ننا، به‌سره‌) له‌گه‌ڵ به‌غداد كه‌ دانیشتوانه‌كه‌ی‌ تێكه‌ڵن.

 

به‌ده‌یان گروپی‌ چه‌كداری‌ شیعه‌ دروستبوون له‌گه‌ڵ ئه‌و گروپانه‌ی‌ كه‌ پێش داعش هه‌بوون‌و شه‌ڕی‌ ئه‌مه‌ریكایان ده‌كرد، هه‌روه‌ها ئه‌وانه‌ی‌ له‌سوریا شه‌ڕیان بۆ رژێمه‌كه‌ی‌ ئه‌سه‌د ده‌كرد.

 

ئێستا له‌گه‌ڵ سه‌ركه‌وتنی‌ گروپه‌ چه‌كداره‌ شیعه‌كان له‌شه‌ڕی‌ داعش، بوونه‌ته‌ خاوه‌نی‌ پێگه‌و ده‌سه‌ڵاتێكی‌ به‌هێزو له‌گه‌ڵ نزیكبوونه‌وه‌ی‌ هه‌ڵبژاردنیشدا خواستی‌ سیاسیان بۆ دروست بووه‌، ته‌نانه‌ت بوونه‌ته‌ ركابه‌ری‌ حیزبه‌ شیعه‌ به‌هێزه‌كانی‌ جاران كه‌ ئێستا جه‌ماوه‌ری‌ شیعه‌ لێیان نیگه‌رانن‌و به‌رپرسیارێتی‌ هه‌ژاری‌‌و بێكاری‌ ده‌خه‌نه‌ ئه‌ستۆیان.

 

سالم تائی‌ كه‌ فه‌رمانده‌ی‌ لیوایه‌كی‌ حه‌شدی‌ شه‌عبییه‌ له‌شاری‌ بێجی‌ به‌"نیقاش"ی‌ وت "به‌دڵنیاییه‌وه‌ به‌شداری‌ هه‌ڵبژاردنه‌كانی‌ داهاتوو ده‌كه‌ین، چونكه‌ ده‌مانه‌وێت پاش شه‌ڕی‌ داعش دژی‌ گه‌نده‌ڵی‌ سیاسی‌ بوه‌ستینه‌وه‌، ئێمه‌ پێمان وایه‌ گه‌نده‌ڵی‌ سیاسی‌‌و داعش یه‌ك شتن".

 

ئه‌و سێ حیزبه‌ سه‌ره‌كییه‌ی‌ شیعه‌ كه‌ پشكه‌كانی‌ شیعه‌یان له‌ده‌وڵه‌تدا به‌ده‌سته‌وه‌یه‌ بریتین له‌حیزبی‌ ده‌عوه‌و ئه‌نجومه‌نی‌ باڵاو ره‌وتی‌ سه‌در، ئێستا هه‌ست به‌مه‌ترسی‌ له‌ده‌ستدانی‌ جه‌ماوه‌ر ده‌كه‌ن‌و ده‌زانن كاریگه‌ری‌ هێزه‌ شیعه‌ نوێیه‌كان چه‌ندن، بۆیه‌ له‌ئێستاوه‌ كه‌وتوونه‌ته‌ گفتوگۆی‌ گرێدانی‌ هاوپه‌یمانێتی‌ له‌گه‌ڵیان، چونكه‌ دڵنیان له‌وه‌ی‌ ده‌نگی‌ زۆری‌ جه‌ماوه‌ری‌ باشووری‌ عێراق بۆ خۆیان ده‌به‌ن.

 

كه‌رتبوونی‌ هێزه‌ كوردییه‌كان

ئه‌وه‌نده‌ی‌ په‌یوه‌ندی‌ به‌هه‌رێمی‌ كوردستانه‌وه‌یه‌ كاریگه‌رییه‌كانی‌ داعش ناكۆكی‌ زیاتری‌ نێوان به‌ره‌ی‌ پارتی‌ دیموكرات‌و به‌ره‌ی‌ یه‌كێتی‌ نیشتیمانی‌‌و گۆڕانی‌ لێكه‌وتووه‌ته‌وه‌.

 

له‌ساڵی‌ 2005ه‌وه‌ پارتی‌‌و یه‌كێتی‌ رێكه‌وتننامه‌ی‌ ستراتیژییان هه‌یه‌و زۆر گۆڕانكاری‌ ناوخۆو ده‌ره‌وه‌ كاری‌ تێنه‌كردوون، به‌ڵام ده‌رهاویشته‌كانی‌ شه‌ڕی‌ داعش گۆڕانی‌ دروستكرد.

 

ئێستا هه‌ولێرو سلێمانی‌ زیاتر له‌یه‌ك دووركه‌وتوونه‌ته‌وه‌و زۆر به‌رپرس هه‌یه‌ داوا ده‌كه‌ن ئیداره‌كان جیا بكرێنه‌وه‌‌و هه‌ر شاره‌و بۆ خۆی‌ به‌ڕێوه‌ ببرێت.

 

ئه‌وه‌ی‌ روونه‌ له‌گه‌ڵ نزیكبوونه‌وه‌ی‌ هه‌ڵبژاردنی‌ ئه‌نجومه‌نی‌ پارێزگاكان ململانێێ‌ نێوان هێزه‌ كۆنه‌كان‌و هێزه‌ تازه‌ ده‌ركه‌وتووه‌كان قوڵتر ده‌بێته‌وه‌، ئه‌مه‌ش ئه‌و ئاسته‌نگه‌یه‌ كه‌ له‌دوای‌ شه‌ڕی‌ داعش زیاتر ده‌رده‌كه‌وێت‌و نه‌خشه‌ی‌ سیاسی‌ عێراق به‌هۆیه‌وه‌ به‌ته‌واوی‌ ده‌گۆڕێت.

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌