راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

چاكسازییه‌كانی‌ عه‌بادی‌ بڵقی‌ سه‌ر ئاو بوون

موسته‌فا حه‌بیب
چه‌ند هه‌فته‌یه‌ك به‌سه‌ر راگه‌یاندنی‌ چاكسازییه‌كانی‌ عه‌بادیدا تێده‌په‌ڕێ‌‌و نه‌ خۆپیشانده‌ران لێی‌ رازین نه‌ سیاسییه‌كان، تائێستاش هیچ یه‌كێ‌ له‌و چاكسازیانه‌ هه‌نگاوی‌ گرنگیان نه‌ناوه‌.
17.09.2015  |  به‌غدا
 ( :وێنه Facebook group)
( :وێنه Facebook group)

ئه‌و پشتیوانییه‌ به‌رفراوانه‌ جه‌ماوه‌رییه‌ی‌ عه‌بادی‌ به‌ر له‌چه‌ند هه‌فته‌یه‌ك هه‌یبوو ورده‌ ورده‌ پاشه‌كشه‌ی‌ كردو ئه‌و دروشم‌و لافیتانه‌ی‌ له‌دوو هه‌فته‌ی‌ رابردوودا به‌رزكرانه‌وه‌ ده‌ریده‌خات كه‌ خه‌ڵك لێی‌ توڕه‌ن، تا ئه‌و راده‌یه‌ی‌ چه‌ندین نوكته‌و ده‌سته‌واژه‌ی‌ گاڵته‌ئامێزیان له‌باره‌یه‌وه‌ بڵاوكردووه‌ته‌وه‌، دیارترین وه‌سفیش كه‌ خستوویانه‌ته‌ پاڵی‌ ناویان ناوه‌ "پزیشكی‌ بێهۆشكردن"، له‌یه‌كێكی‌ تریش له‌دروشمه‌كاندا هاتووه‌ "ده‌ستخه‌ڕۆت كردین.. پشتیوانییه‌كه‌كان ده‌كشێنینه‌وه‌".

 

به‌هۆی‌ چه‌ند هۆكارێكی‌ یاسایی‌‌و سیاسی‌‌و كارگێڕییه‌وه‌ جێبه‌جێكردنی‌ چاكسازییه‌كانی‌ عه‌بادی‌ بووه‌ته‌ هاوكێشه‌یه‌كی‌ قورس، خۆپیشانده‌ران‌و عه‌لی‌ سیستانی‌ مه‌رجه‌عی‌ شیعه‌ داوای‌ چاكسازی‌ پرۆسه‌ی‌ سیاسی‌ ده‌كه‌ن، به‌ڵام ئه‌وه‌ی‌ له‌به‌رچاو نه‌گیراوه‌ ئه‌وه‌یه‌ كه‌ عه‌بادی‌ بۆ خۆی‌ به‌شێكه‌ له‌پرۆسه‌ سیاسییه‌كه‌و كورسییه‌كه‌ی‌ له‌سه‌ر بنه‌مای‌ به‌شه‌ پشكی‌ تایفی‌ به‌ده‌ستهێناوه‌، بۆیه‌ ئاسان نییه‌ چاكسازی‌ بكات.

 

له‌سه‌ر ئاستی‌ سیاسی‌ ئه‌زموونی‌ حوكمڕانی‌ له‌عێراقدا له‌پاش ساڵی‌ 2003وه‌ ده‌ریخستووه‌ بڕیاره‌ چاره‌نوسسازه‌كان نه‌ ده‌رده‌كرێن‌و نه‌ جێبه‌جێ‌ ده‌كرێن ئه‌گه‌ر ره‌زامه‌ندی‌ شیعه‌و سوننه‌و كوردیان له‌سه‌ر نه‌بێت، چاكسازییه‌كانیش گرنگترین بڕیاری‌ چاره‌نوسسازی‌ 13 ساڵی‌ رابردوون كه‌ تیایدا راوێژ به‌حیزب‌و كوتله‌ سیاسییه‌كان نه‌كراوه‌.

 

یه‌كه‌میان بڕیاری‌ چاكسازی‌ عه‌بادی‌ هه‌ڵوه‌شاندنه‌وه‌ی‌ پۆستی‌ جێگرانی‌ سه‌ره‌ك كۆمارو سه‌ره‌ك وه‌زیران بوو، هه‌ریه‌ك له‌و جێگرانه‌ش به‌شێوه‌یه‌كی‌ كتوپڕ بڕیاره‌كه‌یان له‌رێی‌ راگه‌یاندنه‌كانه‌وه‌ بیست، ئێستاشی‌ له‌گه‌ڵدا بێت بڕیاره‌كه‌ جێبه‌جێنه‌كراوه‌و هه‌ر سێ‌ جێگره‌كه‌ی‌ سه‌ره‌ك كۆمار، نوری‌ مالیكی‌‌و ئه‌یاد عه‌لاوی‌‌و ئوسامه‌ نوجێفی‌ گومان له‌یاسایی‌ بوونی‌ ده‌كه‌ن.

 

پاش ئه‌وه‌ له‌پڕ عه‌بادی‌ هه‌ڵوه‌شاندنه‌وه‌ی‌ چوار وه‌زاره‌ت‌و تێكه‌ڵكردنی‌ چواری‌ تری‌ راگه‌یاند له‌چوارچێوه‌ی‌ پرۆسه‌یه‌كدا بۆ كه‌مكردنه‌وه‌ی‌ ژماره‌ی‌ وه‌زاره‌ته‌كان، ئه‌مه‌شیان دیسانه‌وه‌ به‌بێ‌ راوێژی‌ كوتله‌ سیاسییه‌كان كراوه‌، هه‌ندێ‌ له‌كوتله‌كان عه‌بادییان تۆمه‌تبار كرد كه‌ ئه‌وانی‌ به‌ئامانج گرتووه‌، كاتێكیش كار هاته‌ سه‌ر جێبه‌جێكردنی‌، رووبه‌رووی‌ كێشه‌ی‌ سیاسی‌‌و یاسایی‌‌و كارگێڕی‌ بووه‌وه‌.

 

وه‌زاره‌تی‌ مافی‌ مرۆڤ له‌نێو ئه‌و وه‌زاره‌تانه‌دایه‌ كه‌ هه‌ڵوه‌شاوه‌ته‌وه‌، محه‌مه‌د به‌یاتی‌ وه‌زیریش له‌كۆنگره‌یه‌كی‌ رۆژنامه‌نووسیدا رایگه‌یاند ئه‌و له‌رێی‌ میدیاكانه‌وه‌ هه‌واڵی‌ هه‌ڵوه‌شاندنه‌وه‌ی‌ وه‌زاره‌ته‌كه‌ی‌ بیستووه‌، له‌به‌ر ئه‌وه‌ی‌ به‌یاتی‌ له‌توركمانی‌ شیعه‌یه‌، بۆیه‌ توركمانه‌ شیعه‌كانی‌ كه‌ركوك خۆپیشاندانێكیان رێكخستوو رێگای‌ كه‌ركوك به‌غدایان داخست، هه‌ڕه‌شه‌ی‌ ئه‌وه‌شیانكرد كه‌ چه‌كداره‌كانیان له‌حه‌شدی‌ شه‌عبی‌‌و به‌ره‌ی‌ شه‌ڕی‌ داعش ده‌كشێننه‌وه‌.

 

عه‌بادی‌ به‌ر له‌ده‌ركردنی‌ بڕیاره‌كان كوتله‌ سیاسییه‌كانی‌ ئاگادار نه‌كردبۆوه‌، ئه‌مه‌ش مه‌ترسی‌ ئه‌وه‌ی‌ له‌لای‌ هێزه‌ سیاسییه‌كان دروستكرد كه‌ عه‌بادی‌ ببێته‌ حوكمڕانێكی‌ تاكڕه‌و، پێیان وابوو ده‌ركردنی‌ ئه‌م بڕیارانه‌ به‌ناوی‌ چاكسازییه‌وه‌ بۆ بچووككردنه‌وه‌ی‌ لایه‌نه‌كانی‌ ترو به‌به‌هێز هێشتنه‌وه‌ی‌ حیزبی‌ ده‌عوه‌و ده‌وڵه‌تی‌ قانونه‌ كه‌ عه‌بادی‌ خۆی‌ سه‌ر به‌م دوانه‌یه‌.

 

هۆشیار عه‌بدوڵا په‌رله‌مانتاری‌ هاوپه‌یمانی‌ كوردستانی‌ به‌"نیقاش"ی‌ راگه‌یاند "كورد مه‌ترسی‌ ئه‌وه‌ی‌ هه‌یه‌ هه‌ندێ‌ لایه‌نی‌ سیاسی‌ سوننه‌و شیعه‌ بیانه‌وێت ده‌سه‌ڵات بۆ خۆیان پاوان بكه‌ن، به‌دڵنیاییه‌وه‌ ئێمه‌ پشتیوانی‌ چاكسازییه‌كانین، به‌ڵام ده‌مانه‌وێت ئه‌و چاكسازیانه‌ یاسایی‌‌و روون بن‌و پشتیان به‌پێوه‌ری‌ پیشه‌یی‌ به‌ستبێ‌".

 

دواهه‌مین چاكسازی‌ كه‌ عه‌بادی‌ رایگه‌یاند هه‌ڵوه‌شاندنه‌وه‌ی‌ 123 پۆستی‌ حكومی‌ بوو به‌پله‌كانی‌ بریكاری‌ وه‌زیرو به‌ڕێوه‌به‌ری‌ گشتی‌، بۆ ئه‌وه‌ی‌ ئه‌و بڕه‌ پاره‌ زۆره‌ی‌ له‌رێی‌ موچه‌و ئیمتیازه‌وه‌ بۆ ئه‌و كه‌سانه‌ ده‌ڕوات، بگه‌ڕێته‌وه‌، به‌ڵام كێشه‌كه‌ ئه‌وه‌یه‌ له‌عێراقدا ئه‌م پۆستانه‌ ته‌نها كه‌سانی‌ حیزبی‌ وه‌ریده‌گرن‌و حیزبه‌كانیش ئاماده‌ نین ده‌ستبه‌رداریان ببن.

 

له‌سه‌ر ئاستی‌ یاسایی‌ ئه‌م بڕیارانه‌ی‌ عه‌بادی‌ چه‌ندین ئاسته‌نگی‌ یاسایی‌‌و ده‌ستورییان له‌پێشه‌، بۆ نموونه‌ هه‌ڵوه‌شاندنه‌وه‌ی‌ پۆستی‌ جێگرانی‌ سه‌ره‌ك كۆمار له‌ده‌سه‌ڵاتی‌ عه‌بادیدا نییه‌، كه‌چی‌ به‌بێ‌ ئه‌وه‌ی‌ ئاگاداریان بكاته‌وه‌ بڕیاره‌كه‌ی‌ ده‌ركرد، كاتێكیش زانی‌ هه‌ڵه‌ی‌ كردووه‌، داوای‌ له‌په‌رله‌مان كرد ئه‌و پۆستانه‌ هه‌ڵبوه‌شێنێته‌وه‌، ئه‌وانیش رازی‌ بوون، به‌ڵام كوتله‌ سیاسییه‌كان هێشتا به‌نهێنی‌ قه‌ناعه‌تیان به‌و چاكسازییانه‌ نییه‌و ته‌نها له‌به‌رده‌می‌ میدیاكاندا پشتیوانی‌ ده‌كه‌ن.

 

ئاڵۆزترین بڕیار كه‌ ده‌ریكردووه‌ هه‌ڵوه‌شاندنه‌وه‌ی‌ هه‌ر چوار وه‌زاره‌تی‌ مافی‌ مرۆڤ‌و ژنان‌و كاروباری‌ پارێزگاكان‌و كاروباری‌ په‌رله‌مانه‌، هه‌روه‌ها تێكه‌ڵكردنی‌ وه‌زاره‌تی‌ زانست‌و ته‌كنه‌لۆژیا له‌گه‌ڵ وه‌زاره‌تی‌ خوێندنی‌ باڵاو تێكه‌ڵكردنی‌ ژینگه‌ له‌گه‌ڵ ته‌ندروستی‌‌و شاره‌وانی‌ له‌گه‌ڵ ئاوه‌دانكردنه‌وه‌و پێكه‌وه‌ لكاندنی‌ وه‌زاره‌تی‌ گه‌شتوگوزار‌و شوێنه‌وار له‌گه‌ڵ رۆشنبیری‌.

 

هه‌ڵوه‌شاندنه‌وه‌و تێكه‌ڵكردنی‌ وه‌زاره‌ت پرۆسه‌یه‌كی‌ زه‌حمه‌ته‌و پێویستی‌ به‌هه‌ڵوه‌شاندنه‌وه‌ی‌ چه‌ند یاسایه‌ك‌و ده‌ركردنی‌ یاسای‌ نوێیه‌ كه‌ ده‌بوو به‌ر له‌بڕیاره‌كان ئاماده‌ بكرێن.

 

ئه‌وه‌ روونه‌ كه‌ موچه‌ی‌ فه‌رمانبه‌رانی‌ وه‌زاره‌ته‌كانی‌ عێراق جێگیر نییه‌، وه‌زاره‌ت هه‌یه‌ موچه‌كه‌ی‌ به‌رزو وه‌زاره‌تیش هه‌یه‌ موچه‌كه‌ی‌ كه‌مه‌، بۆ نموونه‌ تێكڕای‌ موچه‌ی‌ فه‌رمانبه‌رێكی‌ وه‌زاره‌تی‌ ژینگه‌ 500 دۆلاره‌، له‌كاتێكدا موچه‌ی‌ فه‌رمانبه‌ری‌ وه‌زاره‌تی‌ ته‌ندروستی‌ ده‌گاته‌ 800 دۆلار، كاتێك ئه‌م دوو وه‌زاره‌ته‌ تێكه‌ڵ ده‌كرێن ده‌بێت حكومه‌ت هاوسه‌نگی‌ دروست بكات، چونكه‌ هه‌موو فه‌رمانبه‌ره‌كان ده‌بنه‌ فه‌رمانبه‌ری‌ وه‌زاره‌تێكی‌ نوێ‌ به‌ناوی‌ (ته‌ندروستی‌‌و ژینگه‌)، ئه‌م كێشه‌یه‌ بۆ هه‌موو وه‌زاره‌ته‌كانی‌ تر به‌هه‌مان شێوه‌یه‌.

 

قوته‌یبه‌ جبوری‌ وه‌زیری‌ ژینگه‌ له‌به‌یاننامه‌یه‌كدا ره‌خنه‌ی‌ له‌هه‌ڵوه‌شاندنه‌وه‌ی‌ وه‌زاره‌ته‌كه‌ی‌ گرت‌و رایگه‌یاند "بڕیاری‌ تێكه‌ڵكردنی‌ وه‌زاره‌تی‌ ژینگه‌ له‌گه‌ڵ وه‌زاره‌تی‌ ته‌ندروستی‌ به‌پێچه‌وانه‌ی‌ ده‌ستووره‌وه‌یه‌، چونكه‌ وه‌زاره‌تی‌ ژینگه‌ یاسایه‌كی‌ تایبه‌تی‌ خۆی‌ هه‌یه‌ كه‌ له‌ساڵی‌ 2008ه‌وه‌ ده‌رچووه‌‌و كاره‌كه‌ی‌ چاودێریكردنه‌، هه‌رچی‌ وه‌زاره‌تی‌ ته‌ندروستییه‌ وه‌زاره‌تێكی‌ خزمه‌تگوزارییه‌، بۆیه‌ ده‌بێت پێش هه‌موو شت یاساكان هه‌موار بكرێنه‌وه‌".

 

له‌راستیدا هیچ یه‌كێك له‌م وه‌زاره‌تانه‌ وه‌زاره‌تی‌ كاریگه‌ر نین‌و كوتله‌ سیاسییه‌كان له‌ساڵانی‌ 2005و 2009 دروستیان كردوون بۆ رازیكردنی‌ سه‌ركرده‌ سیاسییه‌كان كه‌ به‌شوێن پۆستدا ده‌گه‌ڕان، له‌به‌ر ئه‌وه‌ی‌ ژماره‌ی‌ وه‌زاره‌ته‌كانیش به‌شی‌ سه‌ركرده‌كانی‌ نه‌ده‌كرد، بۆیه‌ وه‌زاره‌تی‌ نوێ‌ دروست كران، عه‌بادیش له‌م پرۆسه‌یه‌یدا چاوی‌ له‌وه‌زاره‌ته‌ گه‌وره‌و گرنگه‌كان داخست‌و چاكسازی‌ تیا نه‌كردن.

 

هیشام سوهێل په‌رله‌مانتار به‌"نیقاش"ی‌ وت "بڕیاری‌ تێكه‌ڵكردنی‌ وه‌زاره‌ته‌كان ده‌بوو وه‌زاره‌ته‌ گه‌وره‌كانی‌ بگرتایه‌وه‌، وه‌ك كاره‌باو نه‌وت، كشتوكاڵ‌و سه‌رچاوه‌كانی‌ ئاو كه‌ به‌هه‌زاران فه‌رمانبه‌رو پۆستی‌ باڵایان هه‌یه‌‌و پاره‌یه‌كی‌ زۆری‌ ده‌وڵه‌تیان ده‌وێ‌".

 

كێشه‌ی‌ هه‌ره‌ گه‌وره‌ له‌گه‌ڵ ئه‌و چوار وه‌زاره‌ته‌یه‌ كه‌ هه‌ڵوه‌شاونه‌ته‌وه‌‌و به‌هه‌زاران فه‌رمانبه‌ریان هه‌یه‌، حكومه‌ت وه‌زاره‌تی‌ دارایی‌ راسپاردووه‌ كه‌ موچه‌كانیان بدات، به‌ڵام پرسیاره‌كه‌ ئه‌وه‌یه‌: ئاخۆ به‌بێ‌ كار ده‌مێننه‌وه‌؟ چاودێران ده‌ڵێن ده‌بوو حكومه‌ت پلانێكی‌ هه‌بوایه‌ بۆ دابه‌شكردنی‌ فه‌رمانبه‌ری‌ ئه‌و وه‌زاره‌تانه‌ به‌سه‌ر وه‌زاره‌ته‌كانی‌ تردا به‌ر له‌وه‌ی‌ بڕیاری‌ هه‌ڵوه‌شاندنه‌وه‌یان بدات.

 

بڕیاری‌ كه‌مكردنه‌وه‌ی‌ ژماره‌ی‌ پاسه‌وانی‌ به‌رپرسه‌كانیش دیسان كێشه‌ی‌ گه‌وره‌ی‌ تێدایه‌، چونكه‌ بڕیاره‌كه‌ 90% پاسه‌وانه‌كان ده‌گرێته‌وه‌و ده‌یانخاته‌ سه‌ر وه‌زاره‌ته‌كانی‌ ناوخۆو به‌رگری‌ بۆ ئه‌وه‌ی‌ له‌شه‌ڕی‌ داعشدا به‌شداربن، ئه‌م بڕیاره‌ دوو كێشه‌ی‌ تێدایه‌، یه‌كه‌میان: موچه‌ی‌ پاسه‌وانی‌ به‌رپرسه‌كان زۆر به‌رزتره‌ له‌موچه‌ی‌ سه‌ربازو پۆلیس.

 

كێشه‌ی‌ دووه‌میان ئه‌وه‌یه‌ زۆربه‌ی‌ پاسه‌وانه‌كان هه‌ڕه‌شه‌ی‌ وازهێنان ده‌كه‌ن، چونكه‌ ئه‌وان كاره‌كه‌یان وه‌ك پاسه‌وان قبوڵكردووه‌ نه‌ك به‌شداریكردن له‌شه‌ڕی‌ داعش، بۆیه‌ به‌بێ‌ كار ده‌مێننه‌وه‌.

 

ته‌نانه‌ت ئه‌و بڕیاره‌ش كه‌ عه‌بادی‌ ده‌ریكردووه‌ بۆ هه‌ڵوه‌شاندنه‌وه‌ی‌ 123 پۆستی‌ حكومی‌ به‌پله‌ی‌ بریكاری‌ وه‌زیرو به‌ڕێوه‌به‌ری‌ گشتی‌ وا ده‌كات چاره‌نووسی‌ ئه‌وانه‌ به‌نه‌زانراوی‌ بمێنێته‌وه‌، پرسیار له‌سه‌ر ئه‌وه‌ ده‌كرێت ئایا حكومه‌ت خانه‌نشینیان ده‌كات یان موچه‌كه‌یان ده‌داتێ‌.

 

پێده‌چێت كه‌س له‌بڕیاره‌كانی‌ عه‌بادی‌ رازی‌ نه‌بێت، نه‌ خۆپیشانده‌ران‌و نه‌ حیزبه‌ سیاسییه‌كان‌و نه‌ خه‌ڵكی‌ ئاسایش، هه‌ریه‌كه‌یان ره‌خنه‌و هۆكاری‌ خۆیان هه‌یه‌.

 

شمخی‌ جه‌بر یه‌كێك له‌چالاكوانانی‌ خۆپیشاندانه‌كانی‌ گۆڕه‌پانی‌ ته‌حریر به‌"نیقاش"ی‌ وت "به‌داخه‌وه‌ چاكسازییه‌كان هه‌نگاوی‌ راسته‌قینه‌یان هه‌ڵنه‌هێناوه‌ بۆ جێبه‌جێكردنی‌ خواستی‌ خۆپیشانده‌ران، بڕیاره‌كان كاریگه‌ر نین‌و ته‌نها بۆ بێده‌نگكردنی‌ خۆپیشانده‌رانه‌، له‌سه‌ر ئاستی‌ سیاسی‌‌و خزمه‌تگوزاری‌ هیچ گۆڕانكارییه‌كی‌ روون نابینین".

 

تائێستا چه‌ندین كۆڕو كۆبوونه‌وه‌و سیمینار بۆ گفتوگۆ له‌باره‌ی‌ چاكسازییه‌كانی‌ عه‌بادییه‌وه‌ گرێدراون، سه‌رجه‌میشیان ناڕازین له‌و چاكسازییانه‌، یه‌كێك له‌و كۆڕانه‌ كه‌ "ئه‌نجومه‌نی‌ عێراقی‌ بۆ ئاشتی‌‌و پشتیوانی‌" سازیكردبوو به‌ناوی‌ (تێڕوانینێكی‌ جدی‌ بۆ چاكسازییه‌كانی‌ عه‌بادی‌)‌و په‌یامنێری‌ "نیقاش" ئاماده‌ی‌ بوو، تیایدا په‌رله‌مانتاری‌ پێشوو وائیل عه‌بدولله‌تیف له‌كۆتایی‌ كۆڕه‌كه‌دا وتی‌ "چاكسازییه‌كانی‌ عه‌بادی‌ ده‌ستی‌ نه‌بردووه‌ بۆ ناوه‌خنی‌ كێشه‌كانی‌ عێراق، ده‌بێت لێپرسینه‌وه‌ له‌گه‌نده‌ڵكاران‌و گه‌وره‌ به‌رپرسان بكرێت، ئه‌مه‌ش نابێت ئه‌گه‌ر چاكسازی‌ له‌ده‌سه‌ڵاتی‌ دادوه‌ریدا نه‌كرێت".

 

هه‌رچی‌ خه‌ڵكی‌ ئاساییه‌ پێیان وانییه‌ هیچ گۆڕانكارییه‌ك له‌ژیانی‌ ئه‌واندا روویدابێت، قاسم روبێعی‌ كه‌ كرێكارێكی‌ بینایه‌‌و له‌ناوچه‌ی‌ سه‌دری‌ خۆرهه‌ڵاتی‌ به‌غدا نیشته‌جێیه‌ به‌"نیقاش"ی‌ وت "چاكسازییه‌كان یارییه‌كی‌ سیاسین، هیچ له‌ژیانی‌ ئێمه‌ نه‌گۆڕاوه‌، تائێستا كاره‌با خراپه‌و ئاو پیسه‌و شه‌قامه‌كانیش وه‌ك خۆیان قه‌ره‌باڵغن، سیاسییه‌كانیش هه‌ر ده‌ستكه‌وت ده‌چنه‌وه‌، پێم ناڵێن گۆڕانكاری‌ چییه‌؟".

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌