راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

ئاینده‌یه‌كی‌ ئاڵۆزو پڕ له‌گرژی‌
حه‌شدی‌ شه‌عبی‌ خۆی‌ بۆ حوكمڕانی‌ عێراق ئاماده‌ ده‌كات

موسته‌فا حه‌بیب
هه‌نگاوه‌ سه‌ره‌تاییه‌كانی‌ گروپه‌كانی‌ حه‌شدی‌ شه‌عبی‌ له‌بواری‌ پرۆسه‌ی‌ سیاسیدا ده‌ستی‌ پێكردووه‌، چاوه‌ڕوانده‌كرێت میلیشیا شیعه‌كان له‌ئێستاوه‌ خۆیان بۆ حوكمڕانی‌ عێراق ئاماد بكه‌ن.
30.07.2015  |  به‌غدا
به‌غدا پشتی‌ به‌میلیشیا شیعه‌كان به‌ستووه‌ بۆ ئه‌وه‌ی‌ له‌مه‌ترسی‌ نزیكبوونه‌وه‌ی‌ داعش بیپارێزن ( :وێنه وكالة الأناضول )
به‌غدا پشتی‌ به‌میلیشیا شیعه‌كان به‌ستووه‌ بۆ ئه‌وه‌ی‌ له‌مه‌ترسی‌ نزیكبوونه‌وه‌ی‌ داعش بیپارێزن ( :وێنه وكالة الأناضول )

به‌هۆی‌ ئه‌و سه‌ركه‌وتنانه‌ی‌ میلیشیا شیعه‌كانی‌ حه‌شدی‌ شه‌عبی‌ له‌به‌رامبه‌ر داعش به‌ده‌ستیانهێناوه‌، رۆژ به‌رۆژ ئاستی‌ لایه‌نداری‌ ئه‌و گروپانه‌ روو له‌هه‌ڵكشانه‌وه‌و وایكردووه‌ بیر له‌به‌شداری‌ پرۆسه‌ی‌ سیاسی‌ بكه‌نه‌وه‌، له‌ئێستاشه‌وه‌ هه‌وڵه‌كانیان له‌وباره‌یه‌وه‌ چڕكردووه‌ته‌وه‌، بۆیه‌ زۆر كه‌س ده‌پرسن: تۆ بڵێیت رۆژێك بێت حه‌شدی‌ شه‌عبی‌ حوكی‌ عێراق بكات؟

 

هه‌رچه‌نده‌ ئێستا هه‌موو عێراقییه‌كان سه‌رقاڵن به‌باس‌و خواسی‌ شه‌ڕی‌ داعشه‌وه‌ كه‌ سێیه‌كی‌ خاكی‌ عێراقی‌ به‌ده‌سته‌وه‌یه‌، كه‌چی‌ پێكهاته‌كانی‌ حه‌شدی‌ شه‌عبی‌ كه‌ سه‌ره‌كیترین هێزی‌ شه‌ڕكه‌رن له‌پاڵ سوپا‌و پۆلیسدا، خه‌یاڵیان له‌سه‌ر ئه‌وه‌یه‌ ورده‌ ورده‌ چالاكییه‌كانیان بگوێزنه‌وه‌ بۆ ناو پرۆسه‌ی‌ سیاسی‌.

 

ئێستا به‌ده‌یان گروپ‌و میلیشیای‌ شیعه‌ له‌ناوچه‌كانی‌ خوراوو خۆرئاوای‌ عێراق له‌شه‌ڕی‌ داعشدان، ئه‌م گروپانه‌ ناوی‌ حه‌شدی‌ شه‌عبییان لێنراوه‌و به‌ر له‌دوو مانگیش وه‌كو دامه‌زراوه‌یه‌كی‌ فه‌رمی‌ سه‌ر به‌حكومه‌ت تۆماركران، ئه‌مه‌ش هه‌وڵێكی‌ عه‌بادی‌ بوو بۆ ئه‌وه‌ی‌ له‌وه‌ زیاتر ده‌سه‌ڵاتی‌ سیاسی‌‌و كۆمه‌ڵایه‌تی‌ ئه‌و گروپانه‌ زیاد نه‌كات.

 

پێناچێت هه‌وڵه‌كانی‌ عه‌بادی‌ شوێنی‌ خۆیان بگرن، چونكه‌ گروپه‌كانی‌ حه‌شدی‌ شه‌عبی‌، به‌تایبه‌تی‌ ئه‌وانه‌یان كه‌ له‌ئێرانه‌وه‌ نزیكن، له‌رووی‌ بڕیاری‌ ئه‌منی‌‌و سه‌ربازییه‌وه‌ ناگه‌ڕێنه‌وه‌ بۆ حكومه‌ت‌و ده‌چنه‌ هه‌ر ناوچه‌یه‌ك ده‌یشێوێنن‌و چه‌كداره‌كانیان بێ‌ هیچ پێناس‌و به‌ڵگه‌نامه‌یه‌كی‌ یاسایی‌ ده‌سوڕێنه‌وه‌و به‌ده‌رن له‌لێپرسینه‌وه‌.

 

ئه‌و گروپانه‌ی‌ نزیكن له‌ئێرانه‌وه‌و گرێدراون به‌عه‌لی‌ خامه‌نه‌یی‌ رابه‌ری‌ شۆڕشی‌ ئیسلامی‌ ئێرانه‌وه‌، ئه‌وانه‌ن كه‌ به‌هێزو پڕچه‌كترن له‌گروپه‌كانیتر، له‌نێویاندا، رێكخراوی‌ "به‌در" به‌سه‌رۆكایه‌تی‌ هادی‌ عامری‌‌و "عه‌سائیب ئه‌هلل حه‌ق" به‌سه‌رۆكایه‌تی‌ قه‌یس خزعه‌لی‌‌و "كه‌تیبه‌كانی‌ حیزبوڵا به‌سه‌رۆكایه‌تی‌ ئه‌بو مه‌هدی‌ موهه‌نیس"‌و "سه‌رایا خوراسانی‌"‌و "نوجه‌با" به‌سه‌رۆكایه‌تی‌ ئه‌كره‌م ئه‌لكه‌عبی‌.

 

سه‌ركه‌وتنی‌ حه‌شدی‌ شه‌عبی‌ له‌چه‌ند شارێكی‌ عێراق، هانی‌ سه‌ركرده‌كانی‌ داون له‌هه‌وڵی‌ به‌هێزكردنی‌ هه‌ژموونی‌ خۆیاندا بن، به‌و پێیه‌ی‌ هێزێكی‌ سه‌ربازی‌ سه‌ره‌كین‌و چه‌ك‌و چه‌كدارو پاره‌یان به‌خشیوه‌ بۆ ئازادكردنی‌ شاره‌كان‌و ئه‌وه‌ی‌ به‌خوێن گرتویانه‌ ئاماده‌نین وه‌ها به‌ئاسانی‌ بیده‌نه‌ ده‌ست حكومه‌ت، هاوشێوه‌ی‌ ئه‌وه‌ی‌ له‌پارێزگاكانی‌ سه‌لاحه‌دین‌و دیاله‌و باكوری‌ بابل روویداوه‌.

 

عه‌لی‌ بدێری‌ په‌رله‌مانتاری‌ كوتله‌ی‌ "هاوپه‌یمانی‌ نیشتیمانی‌" كه‌ هێزه‌ شیعه‌كانی‌ له‌خۆگرتووه‌، به‌ر له‌چه‌ند رۆژێك له‌كۆنگره‌یه‌كی‌ رۆژنامه‌نووسیدا رایگه‌یاند "سه‌ركرده‌كانی‌ حه‌شدی‌ شه‌عبی‌ به‌ڵێنیان داوه‌ پاش كۆتایی‌ هاتنی‌ شه‌ڕی‌ داعش، ره‌وتی‌ پرۆسه‌ی‌ سیاسی‌ له‌وڵاتدا بگۆڕن"، هه‌روه‌ها وتی‌ "شه‌ڕی‌ دژی‌ گه‌نده‌ڵكاران، زۆر قورستره‌ له‌شه‌ڕی‌ داعش".

 

له‌و شه‌ڕه‌ی‌ له‌دژی‌ داعش به‌ڕێوه‌ ده‌چێت هاوكێشه‌ی‌ "زه‌وی‌ بۆ ئه‌و كه‌سه‌یه‌ كه‌ ئازادی‌ ده‌كات" كاری‌ پێده‌كرێت، هێزه‌ شیعه‌كان ئێستا جڵه‌وی‌ پارێزگاكانی‌ سه‌لاحه‌دین‌و دیاله‌یان به‌ده‌سته‌وه‌یه‌، با به‌شێك له‌دانیشتوانی‌ ئه‌و ناوچانه‌ش سوننه‌ بن، هه‌روه‌ك چۆن پێشمه‌رگه‌ چه‌ند ناوچه‌یه‌كی‌ نه‌ینه‌وای‌ به‌ده‌سته‌وه‌یه‌ كه‌ دانیشتوانه‌كه‌ی‌ عه‌ره‌بن‌و هیچیان ئاماده‌نین ئه‌وه‌ی‌ ئازادیان كردووه‌ بیده‌ن به‌ده‌سته‌وه‌.

 

له‌م چه‌ند رۆژانه‌ی‌ دواییدا كاره‌كانی‌ حه‌شدی‌ شه‌عبی‌ په‌ڕیوه‌ته‌وه‌ بۆ بواری‌ سیاسه‌ت، هه‌رچه‌نده‌ هه‌نگاوه‌كان سه‌ره‌تایین، به‌ڵام وه‌ك ئاماده‌كارییه‌ك ده‌بینرێ‌ بۆ به‌شدارییه‌كی‌ كاریگه‌ر، ئێستا فه‌رمانده‌كانی‌ ئه‌و هێزانه‌ چه‌ند لێدوانێكی‌ سیاسی‌ ده‌ده‌ن‌و هه‌ڵوێست ده‌رده‌بڕن له‌به‌رامبه‌ر په‌رله‌مان‌و حكومه‌ت‌و ئه‌نجوومه‌نی‌ پارێزگاكان.

 

به‌ر له‌چه‌ند رۆژێك قه‌یس خزعه‌لی‌ فه‌رمانده‌ی‌ "عه‌سائیب ئه‌هلل حه‌ق"، له‌بۆنه‌یه‌كدا له‌به‌غدا وتی‌ "ئه‌و سیسته‌مه‌ په‌رله‌مانییه‌ی‌ ئێستا له‌عێراق په‌یڕه‌و ده‌كرێت شكستی‌ هێناوه‌و ده‌بێت بگۆڕێت بۆ سیسته‌می‌ سه‌رۆكایه‌تی‌".

 

له‌گه‌ڵ به‌رزبوونه‌وه‌ی‌ پله‌كانی‌ گه‌رماو كه‌مبوونه‌وه‌ی‌ كاره‌با، به‌هه‌زاران هاوڵاتی‌ له‌شاره‌كانی‌ خوارووی‌ عێراق رژانه‌ سه‌ر شه‌قامه‌كان بۆ ناڕه‌زایی‌ ده‌ربڕین، به‌تایبه‌تی‌ له‌هه‌ردوو شاری‌ به‌سره‌و ناسرییه‌ كه‌ خه‌ڵكه‌كه‌ داوای‌ ده‌ست له‌كاركێشانه‌وه‌ی‌ وه‌زیری‌ كاره‌بایان ده‌كرد.

 

شه‌ممه‌ی‌ رابردوو پاش كۆتایی‌ هاتنی‌ پشووی‌ په‌رله‌مان، میوانداری‌ قاسم فه‌هداوی‌ وه‌زیری‌ كاره‌با كراو له‌دانیشتنه‌كه‌دا ناكۆكی‌ سیاسی‌ سه‌ریهه‌ڵداو لایه‌نه‌كان تۆمه‌تیان ده‌گۆڕییه‌وه‌ له‌سه‌ر هۆكاری‌ ئه‌وه‌ی‌ رۆژانه‌ ته‌نها شه‌ش كاتژمێر كاره‌با ده‌درێت به‌هاوڵاتیان.

 

سه‌یره‌كه‌ ئه‌وه‌ بوو "كه‌تیبه‌كانی‌ حیزبوڵا" كه‌ گروپێكی‌ سه‌ر به‌ئێرانن له‌سه‌ر وێبسایته‌كه‌یان به‌یاننامه‌یه‌كیان ده‌ركرد كه‌ تیایدا هاتبوو "ده‌مانه‌وێت دانیشتنێك له‌گه‌ڵ وه‌زیری‌ كاره‌با ئه‌نجام بده‌ین له‌باره‌ی‌ هۆكاره‌كانی‌ كێشه‌ی‌ كاره‌باو گه‌نده‌ڵكاران بده‌ین به‌دادكا"، هه‌روه‌ك چۆن داوایان له‌پۆلیسی‌ به‌سره‌ كردبوو رووبه‌رووی‌ خۆپیشانده‌ران نه‌بنه‌وه‌.

 

ئه‌م به‌یاننامه‌یه‌ كاردانه‌وه‌ی‌ جیاوازی‌ لێكه‌وته‌وه‌، هه‌ندێك به‌مه‌ترسییان زانی‌ له‌ده‌ستێوه‌ردانی‌ حه‌شدی‌ شه‌عبی‌ بۆ ناو پرۆسه‌ی‌ سیاسی‌‌و هه‌ندێكی‌ تریش پێشوازییان لێكردو پێیان وابوو تاكه‌ چاره‌سه‌ر بۆ ئه‌م قه‌یرانانه‌ی‌ ئێستا ده‌ستوه‌ردانی‌ حه‌شدی‌ شه‌عبییه‌.

 

خزێر عامری‌ كه‌ یه‌كێكه‌ له‌سه‌رۆك عه‌شیره‌ته‌كان‌و نیشته‌جێی‌ ناوچه‌ی‌ سه‌دری‌ به‌غدایه‌ به‌"نیقاش"ی‌ وت "هه‌موو سیاسه‌تمه‌داره‌كان گه‌نده‌ڵن‌و رێز له‌یاسا ناگرن‌و پاره‌ی‌ خه‌ڵك ده‌دزن‌و خزمه‌تگوزاری‌ پێشكه‌ش ناكه‌ن، بۆیه‌ ده‌بێ‌ حه‌شدی‌ شه‌عبی‌ ته‌مبێیان بكات‌و دزییه‌كانیان رابگرێت، هیوادارم حه‌شدی‌ شه‌عبی‌ به‌شداری‌ هه‌ڵبژاردنه‌كانی‌ داهاتوو بكات، بۆ خۆم ده‌نگیان ده‌ده‌مێ‌".

 

چه‌كدارانی‌ حه‌شدی‌ شه‌عبی‌ به‌چڕی‌ له‌به‌غداو شاره‌كانی‌ خوارووی‌ عێراق بڵاوبوونه‌ته‌وه‌، ئه‌مانه‌ش ئه‌و ناوچانه‌ن كه‌ دوورن له‌شه‌ڕه‌وه‌، به‌ڵام لێره‌ كێبڕكێیانه‌ بۆ ئه‌وه‌ی‌ زۆرترین ده‌سه‌ڵاتیان هه‌بێت‌و سوود له‌هه‌ڵه‌ی‌ سوپاو پۆلیس ببینن بۆ سه‌پاندنی‌ ده‌سه‌ڵاتی‌ خۆیان.

 

هه‌رچه‌نده‌ هه‌نگاوه‌كانیان روونه‌، به‌ڵام سه‌ركرده‌كانی‌ حه‌شدی‌ شه‌عبی‌ خۆیان ده‌پارێزن له‌باره‌ی‌ ئه‌وه‌ی‌ به‌شداری‌ پرۆسه‌ی‌ سیاسی‌ ده‌كه‌ن یان نا، ئاماژه‌ به‌وه‌ ده‌كه‌ن كه‌ ئه‌وان ئێستا سه‌رقاڵی‌ رزگاركردنی‌ ناوچه‌كانی‌ ده‌ستی‌ داعشن، به‌ڵام زیادبوونی‌ جه‌ماوه‌ریان‌و ناكۆكی‌ نێوان ئه‌و گروپانه‌ ده‌ریده‌خات كه‌ ئاینده‌یه‌كی‌ سیاسی‌ ئاڵۆز چاوه‌ڕێی‌ عێراقه‌.

 

سه‌میر تائی‌ چاودێری‌ سیاسی‌ به‌"نیقاش"ی‌ وت "له‌ئاینده‌دا حه‌شدی‌ شه‌عبی‌ باڵی‌ سیاسی‌ ده‌بێت‌و به‌شداری‌ هه‌ڵبژاردنی‌ په‌رله‌مان‌و پارێزگاكان ده‌كه‌ن‌و گه‌وره‌ترین براوه‌ ده‌بن، له‌به‌ر ئه‌وه‌ی‌ ئه‌وان له‌سه‌ر زه‌وی‌ باڵاده‌ستن‌و له‌ناو خه‌ڵكدا ده‌ژین، بۆیه‌ كاریگه‌رییان به‌سه‌ر ده‌نگده‌ره‌وه‌ ده‌بێت".

 

تائی‌ ئاماژه‌ به‌وه‌ ده‌كات كه‌ سیناریۆی‌ حیزبوڵای‌ لوبنان له‌عێراق دووباره‌ ده‌بێته‌وه‌، به‌و پێیه‌ی‌ حیزبوڵا له‌و وڵاته‌ چه‌كی‌ پێیه‌و ئاماده‌ نییه‌ راده‌ستی‌ حكومه‌تی‌ بكات، هاوكات له‌ناو په‌رله‌مان‌و حكومه‌تیشدا به‌شداره‌.

 

حیزبه‌ شیعه‌ ته‌قلیدییه‌كان كه‌ له‌ساڵی‌ 2003وه‌ حوكمی‌ عێراقیان به‌ده‌سته‌وه‌یه‌، ده‌زانن حه‌شدی‌ شه‌عبی‌ ركابه‌رێكی‌ به‌هێزه‌ بۆ ئه‌وان، بۆیه‌ ئه‌وانیش هێزی‌ چه‌كداریان دروستكردووه‌ تا جه‌ماوه‌ری‌ پێ رابكێشن.

 

حیزبی‌ ده‌عوه‌ ئێستا خاوه‌نی‌ میلیشیای‌ "كه‌تائیب غه‌زه‌ب حه‌یده‌ری"ه‌و ئه‌نجومه‌نی‌ باڵای‌ ئیسلامی‌ "سه‌رایا جیهادو بینا"‌و "سه‌رایا عاشور"‌و "سه‌رایا ئه‌نسار عه‌قیده‌"ی‌ دروستكردووه‌‌و حیزبی‌ فه‌زیله‌ خاوه‌نی‌ "لیوا شه‌باب ریسالی‌"ه‌و ئه‌م گروپانه‌ به‌شێوه‌یه‌كی‌ سنوردار به‌شداری‌ شه‌ڕه‌كانیان كردووه‌.

 

مه‌سه‌له‌كه‌ ته‌نها په‌یوه‌ست نییه‌ به‌پارێزگا شیعه‌ نشینه‌كانه‌وه‌، به‌ڵكو په‌ڕیوه‌ته‌وه‌ بۆ پارێزگا سوننه‌كانیش، چونكه‌ شه‌ڕی‌ داعش كێرڤی‌ هێزه‌ عه‌شایه‌رییه‌كانی‌ دژه‌ داعشی‌ به‌رزكردووه‌ته‌وه‌، له‌به‌رامبه‌ردا جه‌ماوه‌ری‌ هێزه‌ سونییه‌ ته‌قلیدییه‌كانی‌ وه‌ك حیزبی‌ ئیسلامی‌‌و هاوپه‌یمانێتی‌ "موته‌حیدون" كه‌مبووه‌ته‌وه‌، وه‌ك ئه‌وه‌ی‌ ئێستا له‌سه‌لاحه‌دین رووده‌دات.

 

كاتێك حه‌شدی‌ شه‌عبی‌ ویستی‌ تكریت ئازاد بكات، هاوپه‌یمانێتییه‌كی‌ له‌گه‌ڵ عه‌شیره‌تی‌ جبور ئه‌نجامدا كه‌ له‌ناوچه‌ی‌ عه‌له‌می‌ باكوری‌ تكریت نیشته‌جێن، ئه‌مانه‌ش له‌و عه‌شیره‌ته‌ سوننه‌ كه‌مانه‌ن كه‌ تا كۆتایی‌ شه‌ڕی‌ داعشیان كرد له‌شاره‌كانی‌ خۆیاندا، به‌ڵام دواجار داعش توانی‌ بچێته‌ ناوشاره‌كه‌وه‌و كۆمه‌ڵكوژی‌ ئه‌نجام بدات.

 

ئه‌مڕۆ عه‌شیره‌تی‌ جبور به‌هێزترین عه‌شیره‌تی‌ شاره‌كه‌یه‌و هێزه‌ شیعه‌كان پشتیوانی‌ ده‌كه‌ن، به‌م هۆیه‌وه‌ حیزبه‌ سوننیه‌كان كه‌ له‌ساڵی‌ 2003وه‌ به‌شداری‌ پرۆسه‌ی‌ سیاسی‌ ده‌كه‌ن ترسیان لێ‌ نیشتووه‌.

 

هه‌فته‌ی‌ پێشوو چه‌ند حیزب‌و كه‌سایه‌تییه‌كی‌ سوننه‌ كۆبوونه‌وه‌یه‌كیان له‌مباره‌یه‌وه‌ ئه‌نجامدا، یه‌كێك له‌ئاماده‌بووانی‌ ئه‌و كۆبوونه‌وه‌یه‌ كه‌ خۆی‌ داوایكرد ناوی‌ بڵاو نه‌كرێته‌وه‌ به‌"نیقاش"ی‌ راگه‌یاند حیزبه‌ سونییه‌كان ترسیان له‌وه‌یه‌ حه‌شدی‌ شه‌عبی‌ له‌رێی‌ پشتیوانی‌ عه‌شیره‌ته‌كانه‌وه‌ ده‌ست بگرێت به‌سه‌ر شاره‌كانیاندا له‌هه‌ڵبژاردنی‌ داهاتوودا.

 

باسی‌ له‌وه‌ش كرد كه‌ حه‌شدی‌ شه‌عبی‌‌و به‌شێك له‌عه‌شیره‌ته‌ سوننه‌كان ئێستا شاره‌ سوننه‌نشینه‌كانیان به‌ده‌سته‌وه‌یه‌و به‌ڕێوه‌ی‌ ده‌به‌ن، ئه‌گه‌ر بارودۆخه‌كه‌ به‌م شێوه‌یه‌ بمێنێته‌وه‌، هه‌ڵبژارنی‌ داهاتوو پاك‌و بێگه‌رد نابێت، چونكه‌ ئه‌و چه‌كدارانه‌ی‌ له‌ناو شاره‌كاندان كاریگه‌رییان له‌سه‌ر ده‌نگده‌ران ده‌بێت، به‌قسه‌ی‌ ئه‌و حه‌شدی‌ شه‌عبی‌ رقیان له‌حیزبه‌ سونییه‌كانه‌و پاڵپشتی‌ عه‌شیره‌ته‌كان ده‌كه‌ن بۆ بردنه‌وه‌ی‌ هه‌ڵبژاردن.

 

گۆڕانكاری‌ سیاسی‌ له‌عێراقدا دواخراوه‌ بۆ دووساڵ‌و نیوی‌ تر، تا ئه‌و كاته‌ی‌ هه‌ڵبژاردنی‌ په‌رله‌مان به‌ڕێوه‌ ده‌چێت، به‌ڵام به‌شداریكردن له‌پرۆسه‌ی‌ سیاسی‌ له‌ئێستاوه‌ ده‌ستی‌ پێكردووه‌، چونكه‌ لایه‌نگرانی‌ حه‌شی‌ شه‌عبی‌ داوا له‌میلیشیاكان ده‌كه‌ن ده‌ست وه‌ربده‌نه‌ كاروباری‌ سیاسی‌‌و ناكۆكی‌ نێوان هێزه‌ ته‌قلیدییه‌كان كۆتایی‌ پێبهێنن، به‌تایبه‌تی‌ كه‌ حكومه‌ت شكستی‌ هێناوه‌ له‌دابینكردنی‌ خزمه‌تگوزاری‌.

 

كێشه‌كه‌ ئه‌وه‌یه‌ گروپه‌ شیعه‌كانی‌ حه‌شدی‌ شه‌عبی‌ یه‌كگرتوو نین‌و ناكۆكی‌ قوڵ له‌نێوانیاندا هه‌یه‌ له‌سه‌ر به‌رژه‌وه‌ندییه‌ سیاسی‌‌و ئابوری‌‌و سه‌ربازییه‌كان.

 

چاودێران پێیان وایه‌ له‌هه‌ڵبژاردنی‌ داهاتوو ناكۆكی‌‌و ململانێكان قوڵتر ده‌بنه‌وه‌، چونكه‌ حیزبه‌ شیعه‌كان چه‌كیان هه‌یه‌و له‌شه‌ڕی‌ داعشه‌وه‌ ده‌كه‌ونه‌ شه‌ڕی‌ یه‌كتر، وه‌ك چۆن گومان ده‌كرێت له‌پاك‌و بێگه‌ردی‌ هه‌ڵبژاردنه‌كان له‌ژێر سایه‌ی‌ هه‌زاران چه‌كدارانی‌ نا نیزامی‌ كه‌ به‌شاره‌كاندا بڵاوبوونه‌ته‌وه‌.

سه‌ربه‌ستن له‌دووباره‌ بڵاوكردنه‌وه‌ی‌ بابه‌ته‌كانمان، به‌و مه‌رجه‌ی‌ ناوی‌ نیقاش بهێنن، تكایه‌ به‌ئیمه‌یل ئاگادارمان بكه‌نه‌وه‌