راگه‌یاندن له‌هه‌ماهه‌نگی‌‌و گواستنه‌وه‌
Brunnenstraße 9, 10119 Berlin, Germany
mict-international.org

پرۆژه‌كانی‌ دیكه‌
afghanistan-today.org
theniles.org
correspondents.org
نيقاش: ‎‫پوخته‌یه‌ك له‌ناوخۆو سه‌رانسه‌ی‌ عێراقه‌وه‌‬
عربي
نقاش: إحاطات من داخل وعبر العراق
English
niqash: briefings from inside and across iraq
ئیمه‌یله‌كه‌ت تۆماركرا

داعش پەنا بۆ رێگای‌ دیبلۆماسی‌ ده‌بات

موسته‌فا حه‌بیب
هه‌ر كه‌ داعش زانی‌ له‌سه‌ر ده‌ستی‌ سوپای‌ عێراقی‌ رووبه‌رووی‌ شكست ده‌بێته‌وه‌، خێرا پلانه‌كه‌ی‌ خۆی‌ گۆڕی‌‌و…
9.01.2014  |  به‌غدا
A local an outside of Fallujah makes a victory sign. Pic: Getty
A local an outside of Fallujah makes a victory sign. Pic: Getty

به‌پێی‌ قسه‌ی‌ چه‌ند سه‌رچاوه‌یه‌كی‌ باوه‌ڕپێكراو له‌ناو هۆزه‌كانی‌ ئه‌نباره‌وه‌، رۆژی‌ سێشه‌ممه‌ی‌ رابردوو له‌نێوان چه‌كدارانی‌ داعش‌و هۆزه‌كانی‌ ئه‌و ناوچه‌یه‌ رێكه‌وتنێك ئه‌نجامدراوه‌و گه‌یشتوونه‌ته‌ ئه‌و ئه‌نجامه‌ی‌ داعش له‌ناوچه‌كه‌ بكشێته‌وه‌ له‌پێناو ئه‌وه‌ی‌ سوپای‌ عێراقی‌ نه‌چێته‌ ناو ئه‌و پارێزگایه‌وه‌.

رێكه‌وتنه‌كه‌ له‌و كاته‌دا روویداوه‌ كه‌ پاش هه‌ڕه‌شه‌كانی‌ مالیكی‌، ژماره‌یه‌كی‌ زۆری‌ سه‌رباز به‌چه‌ك‌و تفاقی‌ زۆره‌وه‌ له‌سه‌ر سنوری‌ فه‌لوجه‌ بوون‌و ئاماده‌بوون بۆ په‌لاماردانی‌ شاره‌كه‌.

به‌پێی‌ قسه‌ی‌ سه‌رچاوه‌كه‌ی‌ "نیقاش" رێكه‌وتنه‌كه‌ له‌كه‌شوهه‌وایه‌كی‌ نهێنیدا له‌ناوجه‌رگه‌ی‌ شاری‌ فه‌لوجه‌ روویداوه‌و سه‌رۆك هۆزه‌كان پێداگرییان كردووه‌ له‌وه‌ی‌ داعش پاشه‌كشه‌ بكات، له‌پێناو ئه‌وه‌ی‌ دوچاری‌ وێرانكاییه‌كی‌ هاوشێوه‌ی‌ ساڵی‌ 2004 نه‌بنه‌وه‌، كاتێك سوپای‌ ئه‌مه‌ریكی‌ له‌به‌رامبه‌ر كوشتن‌و هه‌ڵواسینی‌ چوار به‌ڵێنده‌ری‌ ئه‌مه‌ریكیدا په‌لاماری‌ شاره‌كه‌یدا.

سه‌ره‌ڕای‌ ئه‌وه‌ی‌ رێوشوێنی‌ سیاسی‌‌و دیبلۆمانی‌ به‌هیچ شێوه‌یه‌ك له‌ئه‌جێندای‌ قاعیده‌دا شوێنی‌ نابێته‌وه‌، به‌ڵام ئه‌مجاره‌ په‌نای‌ بۆ برد، هۆكاره‌كه‌شی‌ ئه‌وه‌یه‌ نایه‌وێت جارێكی‌ تر رووبه‌رووی‌ شكست ببێته‌وه‌، به‌تایبه‌تی‌ كه‌ چه‌ند رۆژێكه‌ له‌سوریا خراپی‌ پێده‌كرێت‌و به‌باشیش له‌فه‌لوجه‌ شوێن پێی‌ خۆی‌ قایم نه‌كردووه‌.

هه‌فته‌ی‌ رابردوو له‌كاتی‌ رووبه‌رووبوونه‌وه‌وی‌ سوپای‌ ئازاد له‌سوریا، داعش له‌هه‌ردوو پارێزگای‌ حه‌له‌ب‌و ئه‌دلیب زیانی‌ گه‌وره‌ی‌ به‌ركه‌وت تا ئه‌و راده‌یه‌ی‌ خۆی‌ داوای‌ ئاگربڕی‌ كرد.

شێخ ئه‌حمه‌د ئه‌لجومێلی‌ كه‌ یه‌كێكه‌ له‌سه‌ره‌ك هۆزه‌كانی‌ فه‌لوجه‌ به‌"نیقاش"ی‌ وت "ئه‌و چه‌كدارانه‌ی‌ هاتنه‌ ناو شاره‌كه‌وه‌ له‌ده‌یان كه‌س تێپه‌ڕیان نه‌ده‌كردو ته‌نها چه‌كی‌ سووك‌و مامناوه‌ندیان پێبوو، نه‌شیان ده‌توانی‌ ده‌ست به‌سه‌ر شاره‌كه‌دا بگرن، چونكه‌ خه‌ڵكی‌ فه‌لوجه‌ زۆربه‌یان له‌ماڵه‌وه‌ ئه‌و جۆره‌ چه‌كانه‌یان هه‌یه‌".

به‌پێی‌ قسه‌كانی‌ ئه‌لجومێلی‌ قاعیده‌ له‌ناو فه‌لوجه‌ هێزێكی‌ زۆریان نه‌بووه‌و هه‌ڕه‌شه‌كانی‌ سوپای‌ عێراق‌و ترسی‌ خه‌ڵكی‌ له‌و هه‌ڕه‌شانه‌ سه‌ره‌ڕای‌ ئه‌وه‌ی‌ له‌گه‌ڵ‌ قاعیده‌ هاوسۆزن وایكردووه‌ قاعیده‌ بكشێته‌وه‌و رێبده‌ن عه‌شایه‌ره‌كان ده‌سه‌ڵات بگرنه‌ ده‌ست، به‌ڵام تۆ بڵێی‌ ئه‌مه‌ مالیكی‌ پاشگه‌ز بكاته‌وه‌ له‌په‌لاماردانی‌ شاره‌كه‌.

رێكخراوی‌ ده‌وڵه‌تی‌ ئیسلامی‌ له‌عێراق‌و شام (داعش) كه‌ باڵی‌ عێراق‌و سوریای‌ قاعیده‌یه‌، زۆربه‌ی‌ چه‌كداره‌كانی‌ له‌هاوڵاتیانی‌ سوننه‌ی‌ سه‌ر به‌هۆزه‌كانی‌ ئه‌نبارن.

ئه‌گه‌ر توڕه‌یی‌ هاوڵاتیانی‌ سوننه‌ش نه‌بوایه‌ له‌حكومه‌ته‌ شیعه‌كه‌ی‌ عێراق، ئه‌وا داعش نه‌یده‌توانی‌ بۆ ماوه‌ی‌ دوو رۆژی‌ ته‌واو ده‌ست به‌سه‌ر ئه‌و شاره‌دا بگرێت كه‌ نزیكه‌ی‌ ساڵێك بوو خه‌ڵكه‌كه‌ی‌ خه‌ریكی‌ خۆپیشاندان بوون‌و دواجار له‌رێی‌ هێزه‌وه‌ مالیكی‌ كۆتایی‌ به‌خۆپیشاندانه‌كه‌ هێنا.

ئه‌مه‌ سه‌ره‌ڕای‌ ئه‌وه‌ی‌ ئه‌م نه‌وه‌یه‌ی‌ قاعیده‌ كه‌ زۆربه‌یان خه‌ڵكی‌ فه‌لوجه‌و رومادین په‌یوه‌ندییه‌كی‌ هاوهۆزی‌ به‌هێز له‌گه‌ڵ‌ خه‌ڵكی‌ ناوچه‌كه‌ گرێیان ده‌داته‌وه‌.

سه‌ره‌ڕای‌ ئه‌وه‌ی‌ له‌زۆربه‌ی‌ جێگه‌كان ئاین پێش عه‌شیره‌ت‌و هۆز ده‌كه‌وێت، به‌ڵام له‌عێراق باره‌كه‌ پێچه‌وانه‌یه‌، چونكه‌ چه‌كدارانی‌ قاعیده‌ له‌عێراق سه‌ره‌ڕای‌ توندڕه‌وی‌‌و دڕنده‌یی‌‌و تاڵانكارییان، كه‌ هه‌موو ئه‌مانه‌ له‌گه‌ڵ‌ ئاینی‌ ئیسلام یه‌ك ناگرێته‌وه‌، به‌ڵام ناتوانن له‌قسه‌ی‌ عه‌شیره‌ته‌كه‌یان ده‌ربچن.

له‌مڕووه‌وه‌ ئه‌حمه‌د كبه‌یسی‌ توێژه‌ری‌ كۆمه‌ڵایه‌تی‌ به‌"نیقاش"ی‌ وت "به‌هۆی‌ نائاماده‌یی‌ چه‌مكی‌ ده‌وڵه‌ت‌و هاونیشتیمانێتی‌ له‌پاش ساڵی‌ 2003ه‌وه‌، خه‌ڵكی‌ عێراق بۆ خۆپارێزی‌ په‌نایان بۆ عه‌شیره‌ت بردووه‌".

هه‌ڵبژاردنی‌ فه‌لوجه‌ له‌لایه‌ن قاعیده‌وه‌ بۆ دوو هۆكار ده‌گه‌ڕێته‌وه‌، یه‌كه‌میان په‌یوه‌ندی‌ به‌وه‌وه‌ هه‌یه‌ كه‌ خه‌ڵكی‌ سوننه‌ی‌ ئه‌و شاره‌ ئێجگار له‌فه‌رمانڕه‌وا شیعه‌كان توڕه‌ن‌و پێیان وایه‌ به‌هۆی‌ ئه‌وه‌ی‌ به‌سه‌ر پشتی‌ تانكی‌ ئه‌مه‌ریكییه‌وه‌ هاتوونه‌ته‌ سه‌ر حوكم بۆیه‌ خۆفرۆشن، ئه‌مه‌ جگه‌ له‌وه‌ی‌ له‌ماوه‌ی‌ ده‌ ساڵی‌ رابردوودا سوننه‌یان په‌راوێز خستووه‌.

ئه‌و تێڕوانینه‌ له‌ناو خه‌ڵكی‌ ناوچه‌كه‌ رۆژ به‌رۆژ زیاتر گه‌شه‌ی‌ ده‌كردو كاتێكیش مالیكی‌ له‌بری‌ به‌جێهێنانی‌ خواستی‌ خۆپیشانده‌ران، به‌هێز بڵاوه‌ی‌ پێكردن، ئیتر خه‌ڵكی‌ ناوچه‌كه‌ ده‌ستیان دایه‌ هه‌ڵگرتنی‌ چه‌ك.

عه‌لی‌ ئه‌لحاته‌م كه‌ یه‌كێكه‌ له‌سه‌رۆك هۆزه‌كان‌و چالاكوانێكی‌ خۆپیشاندانه‌كان بوو ده‌ڵێت "ئامانجی‌ خۆپیشاندانه‌كان گێڕانه‌وه‌ی‌ مافی‌ زه‌وتكراوی‌ سوننه‌ بوو له‌ماوه‌ی‌ ده‌ ساڵی‌ رابردوودا".

هه‌روه‌ها ده‌ڵێت "چاوه‌ڕێمان ده‌كرد حكومه‌ت خواستی‌ خه‌ڵكی‌ ناڕازی‌ جێبه‌جێ بكات، به‌ڵام به‌هێز بڵاوه‌ی‌ پێكردو خه‌ڵكیش چه‌كیان هه‌ڵگرت". له‌م سه‌روبه‌نده‌دا داعش سوودی‌ له‌بارودۆخه‌كه‌ بینی‌‌و خۆی‌ وه‌ك پارێزه‌ری‌ سوننه‌ ده‌رخست.

هه‌ر له‌پاش ساڵی‌ 2003ه‌وه‌ قاعیده‌ په‌ناگه‌یه‌كی‌ كۆمه‌ڵایه‌تی‌ له‌ئه‌نبار بۆ خۆی‌ دۆزییه‌وه‌، به‌ڵام كاتێك كه‌وته‌ وێزه‌ی‌ كوشتن‌و تاڵانكردنی‌ خه‌ڵكی‌ ناوچه‌كه‌، له‌ساڵانی‌ 2006و 2007 هۆزه‌كانی‌ ناوچه‌كه‌ خه‌ڵكیان هاندا له‌دژیان بكه‌ونه‌ شه‌ڕو ده‌ریان په‌ڕاندن.

سه‌ره‌ڕای‌ ئه‌وه‌ی‌ خه‌ڵكی‌ ناوچه‌كه‌ باش ئه‌و كرده‌وانه‌ی‌ قاعیده‌یان له‌بیره‌و ده‌زانن داعش له‌سوریا خه‌ریكی‌ چ وێرانكارییه‌كه‌و به‌دڕنده‌یی‌ كه‌وتووه‌ته‌ گیانی‌ خه‌ڵكی‌ ناوچه‌كه‌، به‌ڵام توڕه‌یی‌ خه‌ڵكی‌ سوننه‌ له‌حكومه‌ت، وایكرد په‌نا ببه‌نه‌ به‌ر قاعیده‌و له‌سه‌ر بنه‌مای‌ "دوژمنی‌ دوژمنه‌كه‌م دۆستمه‌" هه‌ڵسوكه‌وتیان كرد.

ئه‌م نه‌وه‌یه‌ی‌ ئێستای‌ قاعیده‌ جیاوازه‌ له‌نه‌وه‌كانی‌ پێشووی‌، به‌و پێیه‌ی‌ به‌شی‌ هه‌ره‌ زۆریان له‌عێراقییه‌كانن‌و ئه‌ندامانی‌ هۆزی‌ ناوچه‌كه‌ن‌و ته‌نانه‌ت سه‌ركرده‌كه‌شیان عێراقییه‌، هه‌رچی‌ ئه‌ندامانی‌ پێشووی‌ قاعیده‌ بوو، به‌تایبه‌تی‌ ئه‌وانه‌ی‌ له‌ساڵی‌ 2006 له‌گه‌ڵ‌ خه‌ڵكی‌ ناوچه‌كه‌ ده‌جه‌نگان، به‌شی‌ هه‌ره‌ زۆریان عه‌ره‌بی‌ وڵاتانی‌ تر بوون‌و سه‌ركرده‌كه‌شیان ئه‌بو موسعه‌ب زه‌رقاوی‌ بوو كه‌ ئه‌ویش ئه‌رده‌نی‌ بوو هه‌ر له‌و ساڵه‌دا ئه‌مه‌ریكییه‌كان كوشتیان.

له‌پاش زه‌رقاویه‌وه‌ چه‌ند عێراقییه‌ك سه‌ركرده‌یه‌تی‌ گروپه‌كه‌یان گرته‌ ده‌ست كه‌ یه‌كه‌میان ئه‌بو عومه‌ر به‌غدادی‌ خه‌ڵكی‌ سه‌لاحه‌دین بوو، ئه‌ویش كوژرا، له‌دوای‌ ئه‌وه‌وه‌ تائێستا ئه‌بو به‌كر به‌غدادی‌ سه‌رۆكایه‌تی‌ گروپه‌كه‌ی‌ گرتووه‌ته‌ ده‌ست كه‌ ئه‌ویش له‌عه‌شیره‌تێكی‌ سوننه‌یه‌.

له‌پاش هێرشه‌كه‌ی‌ سوپای‌ عێراقییه‌وه‌ ئه‌وه‌ی‌ له‌فه‌لوجه‌ روویدا به‌م شێوه‌یه‌ بوو، له‌پاش نوێژی‌ هه‌ینی‌ كه‌سێك له‌گروپی‌ داعش چووه‌ سه‌ر مایكرۆفۆنی‌ مزگه‌وته‌كه‌و به‌هه‌زاران نوێژخوێنی‌ ئاماده‌بووی‌ مزگه‌وته‌كه‌ی‌ وت "ئێمه‌ گروپی‌ ده‌وڵه‌تی‌ ئیسلامین، نامانه‌وێ‌ ئازاری‌ كه‌ستان بده‌ین، به‌ڵكو یارمه‌تیتان ده‌ده‌ین بۆ به‌ره‌نگاربوونه‌وه‌ی‌ حكومه‌تی‌ شیعه‌".

پاش ئه‌وه‌ وتی‌ "له‌خۆوه‌ هیچ كارێك ناكه‌ین، هه‌رچییه‌ك ئێوه‌ وه‌ك خه‌ڵكی‌ شاره‌كه‌و عه‌شیره‌ته‌كان فه‌رمانی‌ پێبكه‌ن ئێمه‌ ئه‌وه‌ ده‌كه‌ین".

سه‌رچاوه‌یه‌كی‌ پۆلیس كه‌ بوونی‌ ئه‌م جۆره‌ وتاره‌ پشتڕاست ده‌كاته‌وه‌ به‌"نیقاش"ی‌ رایگه‌یاند بۆ ئه‌وه‌ی‌ خه‌ڵكی‌ ناوچه‌كه‌ لێیان بێزار نه‌بن، قاعیده‌ به‌توندوتیژی‌ هه‌ڵسوكه‌وتیان له‌گه‌ڵدا ناكات، ئه‌مه‌ جگه‌ له‌وه‌ی‌ ئه‌ندامانی‌ ئه‌و عه‌شیره‌تانه‌ چه‌ك له‌دژی‌ یه‌كتر هه‌ڵناگرن‌و له‌ئێستادا یه‌ك دوژمنیان هه‌یه‌.

زۆربه‌ی‌ دانیشتوانی‌ فه‌لوجه‌ مه‌یلێكی‌ عه‌شایه‌رییان هه‌یه‌و عه‌شیره‌تی‌ دلێم باڵاده‌سترینیانه‌ له‌ناوچه‌كه‌دا، ئه‌مه‌ جگه‌ له‌وه‌ی‌ له‌و شاره‌ بچوكه‌دا زیاتر له‌ 500 مزگه‌وت هه‌یه‌.

ئه‌وه‌ی‌ له‌ئێستادا رووده‌دات له‌پارێزگای‌ ئه‌نبارو به‌تایبه‌تیش له‌فه‌لوجه‌ سێ‌ گروپ له‌به‌ره‌ی‌ شه‌ڕدان، یه‌كه‌میان هێزه‌كانی‌ سوپای‌ عێراقین كه‌ زۆربه‌یان شیعه‌ن‌و له‌ناوچه‌كانی‌ ناوه‌ڕاست‌و خواروی‌ عێراقه‌وه‌ به‌پاڵپشتی‌ حكومه‌ت هاتوون، دووه‌میان چه‌كداره‌ عه‌شایه‌ره‌كانن كه‌ خۆیان خه‌ڵكی‌ ناوچه‌كه‌ن، سێهه‌میشیان رێكخراوی‌ قاعیده‌یه‌.

پێده‌چێت له‌م مه‌سه‌له‌یه‌دا عه‌شایه‌ر خاڵی‌ یه‌كلاكه‌ره‌وه‌ بێت‌و هه‌ریه‌ك له‌دوو گروپه‌كه‌ی‌ تر بیانه‌وێت به‌لای‌ خۆیاندا رایبكێشن.

چانسی‌ حكومه‌ت بۆ راكێشانی‌ عه‌شایه‌ره‌كان لاوازه‌، چونكه‌ له‌رابردوودا په‌راوێزی‌ خستبوون، ئه‌مه‌ جگه‌ له‌وه‌ی‌ سوكایه‌تی‌ كرد به‌ناڕه‌زاییه‌كان‌و ئه‌حمه‌د عه‌لوانی‌ په‌رله‌مانتاری‌ لێ ده‌ستگیركردن كه‌ سه‌ر به‌یه‌كێك له‌گه‌وره‌ عه‌شیره‌ته‌كانی‌ ناوچه‌كه‌یه‌، هه‌رچی‌ قاعیده‌شه‌ سوودی‌ له‌توڕه‌ییان بینیوه‌‌و ئه‌ویش تاشوێن پێی‌ خۆی‌ قایم ده‌كات توندوتیژی‌ نه‌نواندووه‌.

چاودێران پێیان وایه‌ له‌ئاینده‌یه‌كی‌ دووردا سه‌ره‌نجام عه‌شایه‌ره‌كان دژی‌ قاعیده‌ ده‌وه‌ستنه‌وه‌، حكومه‌تیش له‌سه‌ری‌ پێویسته‌ هه‌نگاو بنێت به‌ئاراسته‌ی‌ ئاشتكردنه‌وه‌ی‌ خه‌ڵكی‌ ناوچه‌كه‌و دوركه‌وتنه‌وه‌ له‌سیاسه‌تی‌ په‌راوێزخستن.

فه‌رمانده‌یه‌كی‌ سه‌ربازی‌ ئه‌مه‌ریكی‌ خانه‌نشین كه‌ خۆی‌ داوایكرد ناوی‌ نه‌هێنرێت به‌"نیقاش"ی‌ وت "هیچ چاره‌سه‌رێكی‌ سه‌ربازی‌ له‌فه‌لوجه‌و ئه‌نبار ئه‌نجامی‌ نابێت، چونكه‌ خه‌ڵكه‌كه‌ی‌ ده‌زانن چۆن به‌رگری‌ بكه‌ن‌و ته‌نانه‌ت دژی‌ به‌هێزترین سوپاكانیش بوه‌ستنه‌وه‌".

خه‌ڵكی‌ باش ئه‌وه‌یان له‌بیره‌ كه‌ ساڵی‌ 2004 چۆن پاش په‌لاماری‌ شاره‌كه‌یداو له‌وێ‌ به‌ده‌ستی‌ چه‌كداره‌كان شكستی‌ گه‌وره‌ی‌ هێنا.

ئه‌و فه‌رمانده‌ ئه‌مه‌ریكییه‌ ده‌ڵێت "له‌سه‌ر حكومه‌ت پێویسته‌ خه‌ڵكی‌ ناوچه‌كه‌ ئاشت بكاته‌وه‌و لێبوردنی‌ گشتی‌ بۆ ئه‌وانه‌ ده‌ربكات كه‌ به‌هۆی‌ ده‌ستكورتییه‌وه‌ ده‌ستیان له‌گه‌ڵ‌ قاعیده‌ تێكه‌ڵ‌ بووه‌‌و حه‌زیان به‌توندوتیژی‌ نییه‌".

هه‌روه‌ها ده‌ڵێت "له‌رابردوودا ئێمه‌ ئه‌و ئه‌زموونه‌مان تاقیكرده‌وه‌، له‌گه‌ڵ‌ ژماره‌یه‌ك له‌چه‌كدارانی‌ قاعیده‌ دانیشتین، له‌گه‌ڵیاندا رێككه‌وتین‌و موچه‌مان دانێ‌، ئه‌وانیش چوونه‌ هێزه‌كانی‌ سه‌حوه‌وه‌و دژی‌ قاعیده‌ جه‌نگان، پاش كشانه‌وه‌ی‌ ئێمه‌ حكومه‌ت ئه‌و هه‌نگاوه‌ی‌ فه‌رامۆشكرد".

پێكهاته‌ی‌ عه‌شایه‌ری‌ ئه‌نبار كه‌شێكی‌ وه‌های‌ خولقاندووه‌ كه‌ خه‌ڵكی‌ ئه‌و ناوچه‌یه‌ له‌پێناو عه‌شیره‌تدا ده‌ستبه‌رداری‌ زۆر شتی‌ تر ببن‌و دژی‌ ده‌سه‌ڵات بجه‌نگن، ته‌نانه‌ت له‌سه‌رده‌می‌ فه‌رمانڕه‌وایی‌ سه‌دام حسێندا، كاتێك رژێمی‌ به‌عس محه‌مه‌د مه‌زلومی‌ سه‌ر به‌عه‌شیره‌تی‌ دلێمی‌ له‌سێداره‌دا كه‌ ئه‌فسه‌رێكی‌ پله‌دار بوو، خه‌ڵكی‌ ناوچه‌كه‌ له‌دژی‌ راپه‌رین‌و بۆ ماوه‌ی‌ ده‌ رۆژ له‌حكومه‌ت یاخی‌ بوون، دواجار سه‌دام له‌رێی‌ تانكه‌وه‌ په‌لاماری‌ دان‌و راپه‌ڕینه‌كه‌ی‌ دامركانده‌وه‌.

خه‌ڵكی‌ ئه‌نبارو دانیشتوانی‌ ناوچه‌ سوننه‌نشینه‌كانی‌ تریش ده‌بینن كه‌ چۆن حكومه‌ت به‌دووفاقی‌ مامه‌ڵه‌ له‌گه‌ڵ‌ خه‌ڵكی‌ عێراق ده‌كات، له‌كاتێكدا لێبوردن بۆ چه‌كدارانی‌ میلیشیا شیعه‌كان ده‌رده‌كات كه‌چی‌ هه‌مان هه‌نگاو به‌ئاراسته‌ی‌ سوننه‌كان نانێت، ئه‌مه‌ش هێنده‌ی‌ تر توڕه‌ی‌ كردوون.